1. Ndo' Pablo ñ'eⁿ Bernabé majo'ti l'ana tsjoom Iconio. Ty'equie'na naquii' wats'om ‘naaⁿ nn'aⁿ judíos. Tyoñequiana ñ'oom' Ty'o̱o̱ts'om. Jeeⁿ ya tyola'neiⁿna. Jo' chii jndyendye nn'aⁿ judíos jlayu' ndo' mati nt'omcheⁿ nn'aⁿ na nchii judíos.
2. Sa̱a̱ nn'aⁿ judíos na tyoolayu' tyola'ndaa'na n'om nn'aⁿ na nchii judíos. Tyol'ana na calancjoo'ndye naⁿ'ñeeⁿ nacjoo nn'aⁿ na cwilayu'.
3. Jo' chii Pablo ñ'eⁿ Bernabé majndye xuee ljoo'ndyena tsjoom'ñeeⁿ. Ndo' ñequio na t'maⁿya n'omna tyoñequiana ñ'oom cantyja ‘naaⁿ' naya na matseixmaⁿ Ty'o̱o̱ts'om ee nquiuna na ñ'eⁿñ'eeⁿ ñ'eⁿndyena. Ndo' jom t'mo̱o̱ⁿ na mayuu' ñ'oom na tyoñequiana ee s'aaⁿ na tyol'ana ‘naaⁿ t'maⁿ na xocanda̱a̱ nnts'aa na cwe' najndeii nquii ts'aⁿ meiⁿ xocatsei'no̱ⁿ' ts'aⁿ chiuu tuiiyuu.
4. Sa̱a̱ nn'aⁿ tsjoom'ñeeⁿ to̱ⁿ'na' joona. Ee nt'omndyena tyola'jomndyena ñequio nn'aⁿ judíos ndo' nt'omcheⁿ tyola'jomndye ñequio apóstoles.
5. Quia jo' nn'aⁿ judíos ñequio nn'aⁿ na nchii jo' jla'jomndyena ñequio naⁿmaⁿn'iaaⁿ tsjoomna na tyol'ueendyena chiuu nnta'wi'na naⁿ'ñeeⁿ ndo' na njñomna ljo̱'.
6. Sa̱a̱ Pablo ñ'eⁿ Bernabé jndyena na ljo'. Jo' chii jleinomna. Ty'ena tsjoom Listra ñequio tsjoom Derbe, jo' jo' ndyuaa Licaonia. Ndo' ty'ena ndyuaa na mat'uiina' ñ'eⁿ ndyuaa'ñeeⁿ.
7. Jo' jo' tyoñequiana ñ'oom naya ‘naaⁿ' Ty'o̱o̱ts'om. Nn'aⁿ tsjoom Listra cwijñomna ljo̱' Pablo
8. Tsjoom Listra tyowacatyeeⁿ cwii tsaⁿs'a na tileicjaacaa ee maxjeⁿ ntjeiⁿ nc'eeⁿ tuiiñê. Meiⁿjom ndii' tyoojaacaⁿ.
9. Jndii tsaⁿ'ñeeⁿ na seineiⁿ Pablo. Ndo' nquiee nty'iaaⁿ'aⁿ juu, ee sei'no̱o̱ⁿ'o̱ⁿ na tseixmaⁿ tsaⁿ'ñeeⁿ na matseiyu'ya ts'om na nlco'yana' juu.
10. Quia jo' jndeii seineiiⁿ, matsoom:—Quintyja', cwintyje'.Quia jo' mañoom' teintyjee', to̱' tjacaa.
11. Ndo' nn'aⁿ ndyuaa Licaonia, quia na nty'iaana na luaa' s'aa Pablo, to̱'na tyola'xuaana ñequio ñ'oomna. Tyoluena:—Cwa we nty'o̱o̱ cha'na nn'aⁿ jnda̱ tquiecañomna jaa.
12. Jo' chii jluena na Bernabé ty'o̱o̱ Júpiter jom, ndo' Pablo je' jluena na jom ty'o̱o̱ Mercurio ee jom mañequiaaⁿ ñ'oom nda̱a̱na.
13. Nnom tsjoom meintyjee' wats'om cwentaa' ty'o̱o̱ Júpiter. Ndo' tyee cwentaa' Júpiter'ñeeⁿ jndyochom quioo'ndyo na ta'njoom' l'uaaljaa' cantyo'yo' hasta ‘ndyoots'atioom' tsjoom ee jom ñequio nn'aⁿ quii' tsjoom ñe'cala'cwjeena quioo'ñeeⁿ na nla't'maaⁿ'ndyena Bernabé ñ'eⁿ Pablo.
14. Sa̱a̱ apóstoles, quia na nty'iaana na luaa' nl'a nn'aⁿ, to̱'na tyojndii'ndyena liaana na matsei'ndaa'na' nquiuna na luaa' cwil'a naⁿ'ñeeⁿ. Jndeii ty'equie'na quii'ntaaⁿ nn'aⁿ.
15. Tyolaxuaana tyoluena:—Chiuu sa ‘o nn'aⁿ na luaa' ñe'cal'a'yo'. Mann'aⁿ jâ cha'na ‘o. Tquioñ'o̱o̱ⁿyâ ñ'oom naya na nndye'yo' cha ca'ndye'yo' nmeiⁿ' na cwe' ts'iaaⁿ'ndyo. Calat'maaⁿ'ndyo' nquii Ty'o̱o̱ts'om na wando' ee jom tqueeⁿ cañoom'luee ñequio tsjoomnancue ñequio ndaaluee ndo' cha'tso nnom na cwilaxmaⁿna'.
16. Ncuee na ñejndyowaana' ñe'ndiitoom na cal'a cha'tso nn'aⁿ meiⁿljo'cheⁿ na l'ue n'omna.
17. Sa̱a̱ tîca'ñeeⁿ na ticwji'yuu'ñê cantyja ‘naaⁿ' nqueⁿ, ee mach'eeⁿ naya cha'tsondye nn'aⁿ. Mañequiaaⁿ ndaaluaa' na cwinaⁿna' tsjo̱'luee. Ndo' mach'eeⁿ na cwiquie ntjom. Mach'eeⁿ na cwijaacjooya ñ'eⁿ nantquie na mañequiaaⁿ ndo' mach'eena' na neiiⁿya.
18. Sa̱a̱ meiiⁿ na jluena ñ'oommeiⁿ' jeeⁿ nc'uaa' tjawitsaaⁿ' na ñe'calacwjee nn'aⁿ quioo' jo nda̱a̱na na nlat'maaⁿ'ndye naⁿ'ñeeⁿ joona.
19. Juu xjeⁿ'ñeeⁿ tquiecañom nn'aⁿ judíos na jnaⁿ tsjoom Antioquía ñequio Iconio. L'ana na ñe'cwii ñ'oom t'maⁿna ñequio nn'aⁿ tsjoom Listra. Jo' chii tyojñomna ljo̱' Pablo. Jnda̱ chii ty'eñ'omtsco̱o̱'ndyena jom nnom tsjoom ee jla'tiuuna na jnda̱ tueeⁿ'eⁿ.
20. Sa̱a̱ nn'aⁿ na cwilayu' ty'ecwintyjee'na ndiocheⁿ nacañom'm. Quia jo' teicantyjaaⁿ, tjaquie'nnaaⁿ'aⁿ quii' tsjoom. Ndo' teincoo cwiicheⁿ xuee jlueeⁿ'eⁿ tjaaⁿ ñ'eⁿ Bernabé tsjoom Derbe.
21. Tyoñequiana ñ'oom naya nda̱a̱ nn'aⁿ tsjoom'ñeeⁿ, ndo' jndye nn'aⁿ jlayu'. Jnda̱ chii ty'elcwee'nnda'na Listra ñequio Iconio ñequio Antioquía.
22. Njoom'ñeeⁿ tyoteijndeiitina nn'aⁿ na cwilayu' na c'omt'maaⁿ'ndyeti naⁿ'ñeeⁿ n'omna. Tyola'jndo̱'na n'om naⁿ'ñeeⁿ na cwintyjee'tyeⁿna na cwilayu'na. Ndo' tyoluena:—Maxjeⁿ cwilaxmaaⁿya na jndye nawi' nntjo̱o̱ⁿya na cwitsaaquia̱a̱'a cantyja ‘naaⁿ' na matsa̱'ntjom Ty'o̱o̱ts'om.
23. Mati tjeii'ndyena nn'aⁿ na nntioona ts'iaaⁿ na nluiitquiendye cwentaa' cwii cwii tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ. Tyola'neiⁿna nnoom Ty'o̱o̱ts'om ndo' tyola'cwejndo'ndyena. Ndo' tioona naⁿ'ñeeⁿ l'o̱o̱ⁿ ee na ñ'eⁿ jom jnda̱ jlayu'na. Cwi'oolcwee'nnda'na tsjoom Antioquía ndyuaa Siria
24. Jnda̱ jo' tei'nomna ndyuaa Pisidia, tquiena ndyuaa Panfilia.
25. Jo' jo' tyoñequiana ñ'oom tsjoom Perge. Jnda̱ chii ty'ena tsjoom Atalia.
26. Tsjoom'ñeeⁿ tuo̱na w'aandaa. Ty'elcwee'nnda'na tsjoom Antioquía yuu na jnaⁿna jnda̱ na tioo nn'aⁿ joona l'o̱ Ty'o̱o̱ts'om ndo' je' jnda̱ jlacanda̱na ts'iaaⁿ'ñeeⁿ.
27. Ndo' jnda̱ na tquiena Antioquía jla'tjomna nn'aⁿ tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ. Tyoluena nda̱a̱ naⁿ'ñeeⁿ cha'tso na tyoteijndeii Ty'o̱o̱ts'om na tyol'ana ndo' na mati s'aaⁿ na cwilayu' nn'aⁿ na nchii judíos.
28. Jndye xuee ljoo'ndyena ñequio nn'aⁿ na cwilayu' jo' jo'.