1. Matsoom:—'O ta ñequio ‘o re nn'aⁿya, candye'yo' nntseina̱ⁿya nda̱a̱'yo' cantyja ‘naⁿya.
2. Quia na jndyena na seineiiⁿ nda̱a̱na ñequio ñ'oomna ñ'oom hebreo, jla'cheⁿna, tyoqueⁿtina cwenta.
3. Matsoom nda̱a̱na:—Ja ts'aⁿ judío. Tuiindyo̱ tsjoom Tarso ndyuaa Cilicia, sa̱a̱ tjo̱wijndo̱ya tsjoom Jerusalénwaa na tyotsei'naⁿya na tyo'mo̱ⁿ maestro Gamaliel no̱o̱ⁿ. Jom tcuu tyo'mo̱o̱ⁿ ljeii na tqueⁿ Moisés na tyoleiñ'om welooya na ñet'om teiyo. Ñequio na xcwee' ts'o̱o̱ⁿya mandi'ntjo̱ⁿ nnom Ty'o̱o̱ts'om majo'ti cha'xjeⁿ na xcwee' n'om' ‘o na cwindye'ntjom'yo' nnoom.
4. Ja ñetco̱'wi'a nn'aⁿ na m'aⁿ natoo' Jesús, hasta s'a na tja̱ joona. Tyowjaya naⁿnom ndo' naⁿlcu, tyotio̱o̱ⁿya joona w'aancjo.
5. Nquii tyee na cwiluiitquieñe ñequio cha'tso nn'aⁿ na cwiluiitquiendye nda̱a̱'yo' manquiuna na to'ño̱ⁿ carta lueena na nncjo̱ñ'o̱ⁿya na m'aⁿ nn'aaⁿya nn'aⁿ judíos na m'aⁿ tsjoom Damasco. Tjo̱cacho̱o̱ya nn'aⁿ na cwila'yu' na m'aⁿ tsjoom'ñeeⁿ na nñequiona w'aancjo ñjaaⁿñe Jerusalén na nntioomna cantyja na cwila'yu'na ñ'eⁿ Jesús. Pablo matseineiiⁿ cantyja na nlcwe' ts'oom jnaaⁿ'aⁿ
6. Tsoti Pablo:—Xcwe na wa'njo̱o̱ⁿ nato na jo̱ Damasco na manndyoo' nncua̱ya, ndo' cha'na quiajmeiⁿ' ñejomto tioo chom ndiocheⁿ nacañomya. Jnaⁿna' cañoom'luee ndo' jeeⁿ ndya' xueena'.
7. Quia jo' tioondyo̱ nomtyuaa ndo' jndiiya na matseineiⁿ ts'aⁿ no̱o̱ⁿ, matso: “Aa ndi' Saulo, ¿chiuu na maco'wi' ja?”
8. Ndo' t'o̱ya: “¿'Ñeeⁿ ‘u Ta?” Quia jo' tso no̱o̱ⁿ: “Ja Jesús ts'aⁿ Nazaret na maco'wi'.”
9. Ndo' nn'aⁿ na ñ'eeⁿ ñ'eⁿndyo̱ nty'iaana chom'ñeeⁿ ndo' tyuena, sa̱a̱ tîcandyena ñ'oom na seineiⁿ ts'aⁿ ñ'eⁿndyo̱.
10. Ndo' tsjo̱o̱ya: “¿Chiuu nnts'aayo̱ Ta?” Quia jo' matsoom no̱o̱ⁿ: “Quicantyja', cja' quii' tsjoom Damasco. Jo' jo' nndi' cha'tso ts'iaaⁿ na matsa̱'ntjo̱ⁿya na nntsa'.”
11. Seinchjaaⁿ'na' ja na jeeⁿ ndya' xuee chom'ñeeⁿ. Jo' chii nn'aⁿ na ñ'eeⁿ ñ'eⁿndyo̱ cwe' ts'o̱o̱ ty'et'uena chii tua̱ya Damasco.
12. 'Jo' jo' m'aaⁿ cwii ts'aⁿ na jndyu Ananías. Jom ñequio na xcwee' ts'oom matseicana̱a̱ⁿ ljeii na tqueⁿ Moisés. Ndo' cha'tso nn'aⁿ judíos na m'aⁿ tsjoom'ñeeⁿ tyotjeii'yana jom.
13. Tueⁿ'eⁿ na m'aaⁿya. Matsoom no̱o̱ⁿ: “‘U re nn'aⁿya Saulo canty'ia'nnda'.” Ndo' majuu xjeⁿ'ñeeⁿ teitquionnda'a, mana teitquioo'ñê nty'ia.
14. Tsotyeeⁿ no̱o̱ⁿ: “Nquii Ty'o̱o̱ts'om cwentaa welooya na ñet'om teiyo majnda̱ seijndaa'ñê na ‘u nljei' chiuu waa na l'ue ts'oom. ‘U nnty'ia' nquii Jnaaⁿ tsaⁿ na tja jnaⁿ tseixmaⁿ, ndo' na nndi' ñ'oom na nntseineiiⁿ njom'.
15. Ee nncwji'yuu'ndyu' cantyja ‘naaⁿ'aⁿ nda̱a̱ cha'tso nn'aⁿ. Nntsu' nda̱a̱na cantyja na jnda̱ nty'ia' jom ndo' na jnda̱ jndi' ñ'oom na seineiiⁿ njom'.
16. Quia jo' ¿ljo' meindo' je'? Quicantyja' ndo' cwits'oomndyu'. Caⁿ' nnom Ta Jesús na catseiljoom'm ‘u jnaⁿ' na matsei'xmaⁿ'.” Matseineiiⁿ Pablo na jñom Ty'o̱o̱ts'om jom na m'aⁿ nn'aⁿ na nchii judíos
17. Tsoti Pablo:—Quia na jnda̱ jndyo̱o̱lcwa̱'a ñjaaⁿñe Jerusalén waa na tco'na' no̱o̱ⁿ naquii' wats'om t'maⁿ xcwe na matseina̱ⁿya nnom Ty'o̱o̱ts'om.
18. Nty'iaya Jesús. Matsoom no̱o̱ⁿ: “Catseityua' calui' quii' tsjoomwaa ee xocandye nn'aⁿ ñ'oom na nncwji'yuu'ndyu' cantyja ‘naⁿya.”
19. Quia jo' tsjo̱o̱ nnoom: “Nquieena, Ta, nquiuna na ja tyojo̱quia̱'a naquii' cha'tso lan'om ‘naaⁿna. Nquiuna na tyocwjaa'a nn'aⁿ na cwila'yu' ñ'eⁿndyu' ndo' tyotio̱o̱ⁿya joona w'aancjo.
20. Ndo' quia na jla'cuee' nn'aⁿ Esteban, ts'aⁿ na tyocwji'yuu'ñe cantyja ‘naⁿ', ja ñ'a̱ⁿya. Seijomndyo̱ na cal'ana na ljo' jom, ndo' tyots'aa cwenta liaa naⁿ'ñeeⁿ xjeⁿ na jla'cuee'na jom.”
21. Sa̱a̱ matso Ta Jesús no̱o̱ⁿ: “Cja', ee tquia majño̱o̱ⁿya ‘u na m'aⁿ nn'aⁿ na nchii judíos.” Pablo m'aaⁿ l'o̱ ts'aⁿ na cwiluiitquieñe nda̱a̱ sondaro
22. Tyotqueⁿ nn'aⁿ cwenta ñ'oom na tyotseineiⁿ Pablo, sa̱a̱ quia na tsoom ñ'oomwaa' taticandyetina. To̱'na tyolaxuaana. Tyoluena nda̱a̱ sondaro:—Calacue'yo' tsaⁿm'aaⁿ ee tacatseixmaaⁿ na nncwanoom'm.
23. Jndeii tyola'xuaana. Tjeii'na liaana, tyola'caandyena joona' na jeeⁿ ndya' lioona. Ndo' tyotju'ndyeendyena ts'ojnda̱a̱ na ticuee' n'omna.
24. Jo' chii ts'aⁿ na cwiluiitquieñe nda̱a̱ sondaro sa̱'ntjoom na c'ooñ'om naⁿ'ñeeⁿ Pablo naquii' w'aa yuu cwic'eeⁿna. Matsoom:—Catja'yo' tsaⁿm'aaⁿ' cha nntsoom ljo' s'aaⁿ ee ñe'caljeiiya chiuu na jeeⁿ jla'xuaa nn'aⁿ nacjoom'm.
25. Quia jo' jla'tyeⁿna jom na nntjaa'na jom. Sa̱a̱ tsoom nnom capeitaⁿ na meintyjee' jo' jo':—¿Aa wanaaⁿ na nntja'yo' ts'aⁿ meiiⁿ na matseixmaaⁿ ts'aⁿ tsjoom Roma ndo' tyoowijndaa' jnaaⁿ'aⁿ?
26. Ndo' capeitaⁿ'ñeeⁿ quia na jñeeⁿ ñ'oomwaa' tjaaⁿ na m'aaⁿ ts'aⁿ na cwiluiitquieñe nda̱a̱ cha'tso sondaro. Matsoom nnom tsaⁿ'ñeeⁿ:—Catsa' cwenta na luaa' ñe'catsa' ñ'eⁿ tsaⁿm'aaⁿ' ee tseixmaaⁿ ts'aⁿ tsjoom Roma.
27. Quia jo' ts'aⁿ na cwiluiitquieñe nda̱a̱ sondaro tjaaⁿ na m'aaⁿ Pablo. Matsoom:—Catsu' no̱o̱ⁿ ¿aa ts'aⁿ tsjoom Roma matsei'xmaⁿ'?Ndo' t'o̱o̱ⁿ matsoom:—Mayuu' na jo' ja.
28. Quia jo' tso ts'aⁿ na cwiluiitquieñe nda̱a̱ sondaro:—Ja t'maaⁿ' s'om tquiaya chii tseixmaⁿya ts'aⁿ tsjoom Roma.Matso Pablo nnom:—Sa̱a̱ ja cantyja na tuiindyo̱ tseixmaⁿya jo'.
29. Jo' chii sondaro na manntjaa' Pablo mana ‘ndyena jom, tei'ndyo̱na nacañom'm. Ndo' ts'aⁿ na cwiluiitquieñe nda̱a̱na quia na jñeeⁿ na ts'aⁿ tsjoom Roma matseixmaⁿ Pablo ty'ueeⁿ ee nqueⁿ sa̱'ntjoom na cwityeⁿñe tsaⁿ'ñeeⁿ. Pablo m'aaⁿ jo nda̱a̱ naⁿmaⁿn'iaaⁿ ‘naaⁿ nn'aⁿ judíos
30. Sa̱a̱ juu tsaⁿ na cwiluiitquieñe nda̱a̱ sondaro ñe'caljeiiⁿ chiuu na cwiqueⁿ nn'aⁿ judíos ñ'oom nacjoo' Pablo. Jo' chii teincoo cwiicheⁿ xuee sa̱'ntjoom na catjomndye ntyee na cwiluiitquiendye ñequio cha'tso naⁿmaⁿn'iaaⁿ ‘naaⁿ nn'aⁿ judíos. Jnda̱ chii seicanaaⁿ'aⁿ l'uaancjo na chu'tyeⁿñe Pablo, tjañ'oom tsaⁿ'ñeeⁿ jo nda̱a̱ naⁿmaⁿn'iaaⁿ'ñeeⁿ.