1. Xuee jnda̱ ‘om tjacue Ananías tsjoom Cesarea. Jom tyee na cwiluiitquieñe. Mati nt'omcheⁿ nn'aⁿ na cwiluiitquiendye quii'ntaaⁿ nn'aⁿ judíos tsjoom Jerusalén ty'ena ñ'eⁿñê. Jnda̱ na tquiena Cesarea ty'entyjaa'na gobiernom na nñe'quiana jnaaⁿ' Pablo. Mati Tértulo, ts'aⁿ na ‘naaⁿ'ti na nntseitjoom' ñ'oom, tjañ'eeⁿ ñ'eⁿndyena.
2. Quia jo' tqueeⁿ'ñe gobiernom Pablo. Jnda̱ chii to̱' Tértulo tyoñequiaaⁿ jnaaⁿ' Pablo. Tsoom nnom gobiernom:—Cwe' cantyja na jndo̱' ts'om' ‘u ta Félix cwic'a̱a̱ⁿyâ na tjaa'naⁿ ntia' quii'ntaaⁿyâ. Ndo' t'maⁿ waa na matsei'jndaa'ndyu'ti' naquii' njoommeiiⁿ.
3. Jo' chii jâ cwila't'maaⁿ'ndyô̱ ‘u. Ndo' ñequii'cheⁿ cwil'uuyâ na quianl'ua' cha'tso naya na mache'.
4. Sa̱a̱ ticaⁿna' na jeeⁿ jndye ñ'oom nla'cachjuuyâ ‘u. Macaⁿ'a cwii naya'ñeeⁿ njom' na catseit'maⁿ ts'om' na nndi' ljo' nl'uuyâ meiiⁿ na tiyo.
5. Jâ jnda̱ jliuuyâ Pablom'aaⁿ' jeeⁿcheⁿ ndya' tia ljo' mach'eeⁿ. Tia' macwjaa'ñê jâ nn'aⁿ judíos cha'waa tsjoomnancue. Ndo' majuutyeeⁿ cwiluiiñê xqueⁿ ñ'oom quii'ntaaⁿ ntmaaⁿ' nn'aⁿ na cwila'yu' ñ'eⁿ ts'aⁿ na jnaⁿ tsjoom Nazaret.
6. Ñe'cjaachom nn'aⁿ na nchii judíos naquii' wats'om t'maⁿ ‘naaⁿyâ. Ndo' na luaa' nnts'aaⁿ nntseits'iaaⁿñê juuna'. Jo' chii jâ t'ua̱a̱yâ jom na ñe'catu'xa̱a̱ⁿyâ jom ñequio ljeii na tqueⁿ Moisés na cwileiñ'o̱o̱ⁿyâ.
7. Sa̱a̱ tjacatii'ñe nquii Claudio Lisias, tsaⁿ na cwiluiitquieñe nda̱a̱ sondaro. Ndo' ñequio na jndei'na' tjacwjii'ñê Pablom'aaⁿ' lua̱a̱yâ.
8. Tsoom na jâ nn'aⁿ na cwiqua̱a̱ⁿyâ ñ'oom nacjoo' tsaⁿm'aaⁿ' quio̱o̱yâ na m'aaⁿ'. Quia jo' ‘u nnda̱a̱ nncwax'e' nnom tsaⁿm'aaⁿ' ndo' nljei' na mayuu' cha'tso ñ'oom na cwiqua̱a̱ⁿyâ nacjoom'm.
9. Ndo' mati nn'aⁿ judíos na ñ'eeⁿna ñ'eⁿ Tértulo jla'jomndyena. Jluena na mayuu' na luaa' waa.
10. Quia jo' gobiernom s'o̱o̱ l'o̱o̱ⁿ na catseineiⁿ Pablo. Jo' chii t'o̱ Pablo matsoom:—Ntyjiiyaya ‘u ta na jndye ndyu macu'xeⁿ' ndyuaa njoomyâ. Jo' chii t'maⁿya ts'o̱o̱ⁿya na nnc'o̱ya ‘ndyo'.
11. Ja cwe' jnda̱'ti canchoo'we xuee na tjo̱waa Jerusalén na tjo̱catseit'maaⁿ'ndyo̱ Ty'o̱o̱ts'om, ndo' ‘u ta nnda̱a̱ nljei' na mayuu' na ljo'.
12. Ja meiⁿcwii tîcatseintja'ndyo̱ ñ'eⁿ nn'aⁿ meiⁿ ticwjaa'ndyo̱ tia' nn'aⁿ naquii' wats'om t'maⁿ meiⁿ naquii' lan'om nch'u oo meiⁿquia joo naquii' tsjoom.
13. Jo' chii naⁿm'aⁿ' xocalui'yuu' ñ'oom na cwiluena nacjoya.
14. Sa̱a̱ xonquiu'nn'aⁿya ‘u ta. Ja maxjeⁿ matseit'maaⁿ'ndyo̱ Ty'o̱o̱ts'om na tyola't'maaⁿ'ndye weloya na ñet'om teiyo. M'aaⁿya na matseijomndyo̱ majuu nato xco na cwilue naⁿm'aⁿ' na tachii jo'ndyo. Sa̱a̱ tiyuu' na tachii jo'ndyo ee matseiyu'a cha'tso ljeii na tqueⁿ Moisés ñequio cha'tso ñ'oom na tyola'ljeii profetas.
15. Ja ljo'waayu ntyjaa'ya ts'o̱o̱ⁿya cantyja ‘naaⁿ' Ty'o̱o̱ts'om cha'xjeⁿ na ntyjaa'ya n'om naⁿm'aⁿ'. Ntyjaa'ya ts'o̱o̱ⁿya na cha'tso nn'aⁿ na jnda̱ tja̱ nnta'ndo'nnda' meiiⁿ laxmaⁿna nn'aⁿ na jnda̱ jlui'ya oo meiiⁿ nn'aⁿ na waa jnaaⁿ.
16. Jo' chii maqueⁿndyo̱ na ñequii'cheⁿ nnc'o̱o̱ⁿya na tico'tiana' ntyjiiya jo nnom Ty'o̱o̱ts'om ndo' ticatseitjo̱o̱ndyo̱ meiⁿ nnom jom meiⁿ jo nda̱a̱ nn'aⁿ.
17. 'Je' jnda̱ s'aa xuee na tacoca ndyuaa tsjomya Jerusalén. Jo' chii tjo̱lcwa̱'a na nñe'quiaya cwentaa' Ty'o̱o̱ts'om ndo' mati na nnts'aaya naya nn'aⁿ ndyuaaya.
18. Majo' mats'aaya naquii' wats'om t'maⁿ. Jnda̱ tqueⁿlju'ndyo̱ cha'xjeⁿ costumbre na cwil'aayâ nnom Ty'o̱o̱ts'om. Nchii na jeeⁿ jndye nn'aⁿ m'aⁿ ñ'eⁿndyo̱ ndo' meiⁿ nchii c'uaa ndyueena na cwila'ntja'ndyena. Sa̱a̱ jnda̱ na tqueⁿlju'ndyo̱ cwanti nn'aⁿ judíos na jnaⁿ ndyuaa Asia jliuna ja jo' jo'.
19. Maty'iomna' na nquiee naⁿ'ñeeⁿ quiocaluena njom' xeⁿ na mayuu' waa ñ'oom na cwituee'na nacjoya.
20. Oo xeⁿ tinquio naⁿ'ñeeⁿ quia jo' calue naⁿm'aⁿ' ljo' waa na tis'a jliuna na s'aaya quia na tyom'aaⁿya jo nda̱a̱ naⁿman'iaaⁿ cwentaa jâ nn'aⁿ judíos.
21. Macanda̱ cwii waa na c'uaa seina̱ⁿya quii'ntaaⁿ naⁿ'ñeeⁿ. Tsjo̱o̱ya nda̱a̱na: “Meintyja̱a̱'a jo nda̱a̱'yo' xuee je' na cwitu'xeⁿ'yo' ja cwe' nc'e na matseiyu'a na nta'ndo'nnda' nn'aⁿ xeⁿ jnda̱ tja̱.”
22. Ndo' Félix mantyjiitcuuñê chiuu waa ñ'oom cantyja ‘naaⁿ nn'aⁿ na cwila'jomndyena cantyja ‘naaⁿ' Cristo. Jo' chii tîcatsein'oom'ñê nn'aⁿ na tquionquia jnaaⁿ' Pablo. Matsoom:—Quia na nncwjee' nquii Lisias, tsaⁿ na cwiluiitquieñe nda̱a̱ sondaro, nncwax'a̱tya̱ ‘ñom cha nljeijndaa'ndyo̱ ñ'oom na cwindu'yo'.
23. Ndo' jo' sa̱'ntjom Félix capeitaⁿ na cal'ana cwenta Pablo na cwe' nnc'oomjnaⁿyaaⁿ ndo' nchii na nla'cu'na na nnquiocajndoo' nc'iaaⁿ'aⁿ jom.
24. Tyoowijndyecheⁿ xuee matyjee'nnda' Félix ndi ñ'eⁿ scoom'm Drusila, ts'aⁿ judía. Tqueeⁿ'ñê Pablo na nndyena nntseineiiⁿ cantyja na nntseiyu' ts'aⁿ ñequio Jesucristo.
25. Quia jo' Pablo tyotseineiiⁿ na cats'aa ts'aⁿ cantyja na maty'iomyana' ndo' na tiñequiaañe ts'aⁿ na nnts'aaⁿ yuu na tis'a. Mati tyotseineiiⁿ na maxjeⁿ nncuee' xuee na nncu'xeⁿ Ty'o̱o̱ts'om nn'aⁿ. Quia na jndii Félix ñ'oommeiⁿ', ty'ueeⁿ. Mana tsoom nnom Pablo:—Cja'nnda' je'. Nnty'iaa cwaaⁿ na nncju'naaⁿñena' ja, nlqueeⁿ'ndyo̱nnda'a ‘u.
26. Mati macantyjaa' ts'om Félix na nntso Pablo nnoom aa xoquiñoom s'om cha nntseicandyaañê tsaⁿ'ñeeⁿ. Jo' chii jndye ndii' tyoqueeⁿ'ñê Pablo na tyola'neiⁿna.
27. Jnda̱ teinom we chu na m'aaⁿ Pablo jo' jo' teijndyooñe gobiernom Félix, to'ñom Porcio Festo. Ndo' cwe' na jeeⁿ l'ue ts'om Félix na cala'tiuu nn'aⁿ judíos na jom ya ts'aⁿñê, ‘ñeeⁿ Pablo na ndicwaⁿ m'aaⁿ tsaⁿ'ñeeⁿ na pra̱so.