Home / Amuzgo / Amuzgo Bible / Web / Hechos

 

Hechos, Chapter 3

  
1. Cwii xuee Pedro ñ'eⁿ Juan ljo'yu ty'ena wats'om t'maⁿ na ndyee na matmaaⁿ xjeⁿ na cwi'oola'neiⁿ nn'aⁿ nnom Ty'o̱o̱ts'om.
  
2. Ndo' jo' jo' m'aaⁿ cwii tsaⁿs'a na tuiiñe na ntjeiⁿ nc'ee. Juu tsaⁿ'ñeeⁿ ‘io ndi ‘io tyo'ooñ'om nn'aⁿ jom wats'om t'maⁿ, tyoqueⁿna jom ‘ndyoots'a na jndyuna' Jeeⁿ Neiⁿncoo' cha nnda̱a̱ nlcaaⁿ ljo' na matseitjo̱o̱na' jom nda̱a̱ nn'aⁿ na cwi'ooquie' jo' jo'.
  
3. Quia na nty'iaaⁿ'aⁿ Pedro ñ'eⁿ Juan na macwi'ooquie'na naquii' wats'om'ñeeⁿ tcaaⁿ s'om nda̱a̱na.
  
4. Ndo' nty'iaa' Pedro ñequio Juan jom. Tso Pedro nnoom:—Aa re sa, canty'ia' nda̱a̱yâ.
  
5. Quia jo' nty'iaaⁿ'aⁿ nda̱a̱na ee seitioom waa na nñequiana na nnco'ñoom.
  
6. Sa̱a̱ matso Pedro nnoom:—Ja meiⁿ s'om xuee meiⁿ s'om cajaⁿ tjaa'naⁿ na maleiñ'o̱ⁿya, sa̱a̱ cantyja na maleiñ'o̱ⁿtya̱ nñequiaya na nnco'ñom'. Ñequio xuee' Jesucristo, tsaⁿ na jnaⁿ Nazaret, quicantyja' ndo' cja'ca'.
  
7. Jnda̱ chii t'uii Pedro ts'o̱o̱ⁿ ntyjaya seiwe tsaⁿ'ñeeⁿ jom. Mañoom' tco'yana' nda'nc'eeⁿ ñequio candyo'nc'eeⁿ.
  
8. Jo' na ñejomto teicantyjaaⁿ. Teintyjeeⁿ'eⁿ ndo' to̱o̱ⁿ'o̱ⁿ na tjacaⁿ. Tjaqueⁿ'eⁿ naquii' wats'om t'maⁿ ñ'eⁿndyena. Tyojaacaⁿ ndo' tyowantyjaaⁿ ndo' tyotseit'maaⁿ'ñê Ty'o̱o̱ts'om.
  
9. Ndo' cha'tsondye nn'aⁿ na too'ndye naquii' wats'om tyonty'iaana na tyojaacaⁿ ndo' tyotseit'maaⁿ'ñê Ty'o̱o̱ts'om.
  
10. Ee tajnaaⁿ'na na jom ts'aⁿ na ñetacatyeeⁿ ‘ndyoots'a wats'om t'maⁿ'ñeeⁿ na jndyuna' Jeeⁿ Neiⁿncoo'. Majom na tyocaaⁿ ljo' na matseitjo̱o̱na' jom nda̱a̱ nn'aⁿ. Jo' na jeeⁿ tyotseitsaⁿ'na' joona ndo' jeeⁿ tjawee' n'omna na jnda̱ tco'yana' nc'eeⁿ. Ñ'oom na seineiⁿ Pedro leiroo' wats'om t'maⁿ
  
11. Wats'om'ñeeⁿ waa cwii leiroo'na' na jndyuna' Salomón. Jo' jo' tquiontyjaa' cha'tsondye nn'aⁿ na cwityueneiiⁿna. Ee ts'aⁿ na tco'yana' nc'ee jo' jo' tiñe'ca'ñeeⁿ Pedro ñequio Juan.
  
12. Quia na nty'iaa' Pedro na cha'tsondye nn'aⁿ jnda̱ jla'candyoo'ndyena, matsoom nda̱a̱na:—'O re nn'aⁿya Israel, ¿chiuu na jeeⁿ matseitsaⁿ'na' ‘o? ¿Chiuu na jeeⁿ cwinty'ia'yo' nda̱a̱yâ na chacwijom cwila'tiuu'yo' na cwe' na jnda̱a̱ ncjo̱o̱yâ oo cwe' nc'e na jeeⁿ cwila't'maaⁿ'ndyô̱ Ty'o̱o̱ts'om jo' na majaacaa tsaⁿm'aaⁿ'? Meiⁿchjoo nchiijo'.
  
13. Ee nquii Ty'o̱o̱ts'om na tyotseit'maaⁿ'ñe welooya Abraham na ñet'oom teiyo, na tyotseit'maaⁿ'ñe welooya Isaac, ndo' welooya Jacob, ndo' tyola't'maaⁿ'ndye nt'omcheⁿ welooya na jndyowi'cantyjoo', jom seit'maaⁿ'ñê Jnaaⁿ Jesús, na jla'quioo'yo' luee naⁿmaⁿn'iaaⁿ cha cue'. Ndo' meiiⁿ Pilato ñe'catseicandyaañe jom, sa̱a̱ tîtancue'yo'. Sa'yo' nacjoom'm meiiⁿ juu ñe'catseicandyaañe jom.
  
14. ‘O nchii taⁿ'yo' na nndyaañe nquii na cwiluiiñe na lju' ts'om ndo' na tyoch'ee yuu na maty'iomyana'. ‘O taⁿ'yo'yo' na nndyaañe ts'aⁿ na ñeseicwjee nn'aⁿ.
  
15. Jla'cue'yo' nqueⁿ na mañequiaaⁿ na cwitando' nn'aⁿ. Sa̱a̱ Ty'o̱o̱ts'om tquiaa na tando'xcoom na tueeⁿ'eⁿ ndo' jâ cwitjei'yuu'ndyô̱ na ljo'.
  
16. Nc'e na cwilayu'ya cwii n'o̱o̱ⁿyâ ñ'eⁿ xuee' Jesús, jo' na tquiaana' najnda̱ nc'ee tsaⁿm'aaⁿ' na cwinty'ia'yo' ndo' na cwita'jnaⁿ'yo'. Ee nc'e juu na cwilayuu'yâ n'o̱o̱ⁿyâ ñequio Jesús, jo' na cha'tsondyo' cwinty'ia'yo' na canda̱a̱' tco'yana' tsaⁿm'aaⁿ'.
  
17. 'Ndo' ntyjiiya, ‘o nn'aⁿya, na tîcala'no̱ⁿ'yo' ljo' l'a'yo' ñequio naⁿmaⁿn'iaaⁿ ‘naⁿ'yo' jla'cue'yo' Jesús.
  
18. Sa̱a̱ laa'ti' waa na seicanda̱a̱'ñe Ty'o̱o̱ts'om ñ'oom na seineiiⁿ ñequio ndyuee profetas na maxjeⁿ nncue' Cristo tsaⁿ na jñoom.
  
19. Jo' chii calcwe' n'om'yo' ndo' cata'ndyo'xcwe'yo' nnom Ty'o̱o̱ts'om cha nntseicanoom'm jnaⁿ'yo' ndo' na nñequiaaⁿ na ntseixcona' cantyja na cwitsaam'aⁿ'yo' joo nnoom.
  
20. Ndo' na ljo' njñomnnaaⁿ'aⁿ Jesucristo, tsaⁿ na nncwji'n'maaⁿñe ‘o, ee teiyo seijndaa'ñê na luaa' nnts'aaⁿ.
  
21. Sa̱a̱ macaⁿna' na caljoo'ñe Jesucristo cañoom'luee hasta quia na jnda̱ seicanda̱a̱'ñena' cha'tso ñ'oom na seineiiⁿ ñequio ndyuee profetas na tyoñequia ñ'oom'm tandyo xuee.
  
22. Ee tyotso Moisés nda̱a̱ welooya na ñet'om teiyo: “Nquii Ta Ty'o̱o̱ts'om njñoom cwii nn'aⁿ'yo' na m'aⁿ'yo' na nñequiaa ñ'oom'm cha'xjeⁿ na jñoom ja. Queⁿ'yo' cwenta cha'tso ñ'oom na nntseineiⁿ tsaⁿ'ñeeⁿ nda̱a̱'yo'.
  
23. Ee meiⁿcwi'ñeeⁿcheⁿ ts'aⁿ na tiqueⁿ cwenta ñ'oom na nntso tsaⁿ'ñeeⁿ nncwji'ndyo̱na' juu quii'ntaaⁿ nn'aⁿ Israel.”
  
24. Tsoti Pedro:—Cha'tsondye profetas cha'na Samuel ñequio nn'aⁿ na cwiñet'om jnda̱ na tue' tsaⁿ'ñeeⁿ, tyoluena na nluii cha'xjeⁿ na cwiluii je'.
  
25. Ñequio ndyuee profetas tquiaa Ty'o̱o̱ts'om ñ'oomtyeⁿ ndo' ‘o laxmaⁿ'yo' na nnda'yo' naya na cwit'mo̱o̱ⁿ joona' ndo' cha'xjeⁿ ñ'oom na seijndaa'ñetyeⁿ Ty'o̱o̱ts'om nda̱a̱ welooya na ñet'om teiyo quia tsoom nnom welooya Abraham: “Quii'ntaaⁿ nn'aⁿ tsjaaⁿ ‘naⁿ' na nncjaawi'cantyjoo' nluiiñe ts'aⁿ na njño̱o̱ⁿya na m'aⁿ'yo'. Ndo' nc'e juu nntio'naaⁿndyo̱ cha'tsondye nn'aⁿ tsjoomnancue.”
  
26. Jo' chii quia na s'aa Ty'o̱o̱ts'om na ta'ndo'xco Jnaaⁿ na tue', najndyee tio'naaⁿñê ‘o na jñoom juu na m'aⁿ'yo' cha tincwiindyo' ‘o nlcwe' n'om'yo' natia na cwil'a'yo'.