1. Xuee jnda̱ ndyee na tuii na luaa' toco cwii ts'aⁿ tsjoom Caná, ts'o̱ndaa Galilea. Ndo' seijomñe tsondyee Jesús.
2. Ndo' joo nn'aⁿ na t'unco t'maⁿna Jesús ñequio jâ nn'aⁿ na cwila'jomndyô̱ ñ'eⁿñê na mati calajomndyô̱ ñ'eⁿndyena na cwi'uncona.
3. Jnda̱ na ntquie' winom, tsondyee Jesús tso nnoom:—Ticwijndeii winom.
4. T'o̱ Jesús nnom, matsoom:—Naⁿ, ¿ljo' nntsa' ja? Tyoowe'ntyjo̱ xjeⁿ na nnts'aa cwii nnom na tixocanda̱a̱ nluii na cwe' ts'aⁿ nnts'aa.
5. Matso tsoñeeⁿ nda̱a̱ nn'aⁿ na cwindye'ntjom jo' jo':—Cal'a'yo' cha'tso na nntsa̱'ntjoom ‘o.
6. Maniom ñ'oom na cwiqua̱a̱ⁿ jaa nn'aⁿ judíos na cwinndyuu'a ñequio na cwitmaaⁿya ‘naⁿ. W'aa yuu na toco tsaⁿ'ñeeⁿ meintyjee' yom ljoo t'maⁿ na tuiina' ñ'eⁿ ljo̱', na quiwil'uee'ndyena na cwila'canda̱a̱'ndyena costumbre'ñeeⁿ. Cwiwijndeii cwii cwii tsjoo'ñeeⁿ cha'na ñequiee hasta yom xjo lata ndaa.
7. Seineiⁿ Jesús nda̱a̱ nn'aⁿ na cwindye'ntjom jo' jo'. Matsoom:—Calacato'yo' ljoomeiⁿ' ñequio ndaatioo.Ndo' jla'catoo' naⁿ'ñeeⁿ joona' hasta too' cwijomna'.
8. Jnda̱ jo' matsoom nda̱a̱na:—Je' catjei'yo' chjoowi' juuna'. Catsaañ'om'yo' na m'aaⁿ ts'aⁿ na matsa̱'ntjom nn'aⁿ na cwila'ñ'oom'ndye nantquie.Jo' chii ty'eñ'omna juuna' na m'aaⁿ tsaⁿ'ñeeⁿ.
9. Ndo' juu ts'aⁿ na matsa̱'ntjom naⁿ'ñeeⁿ t'uu chjoowi' ndaatioo na jnda̱ seicwaqueⁿ Jesús na winom. Ticaljeii tsaⁿ'ñeeⁿ yuu jnaⁿna' sa̱a̱ nn'aⁿ na cwindye'ntjom jo' jo' nquiucheⁿna yuu tjeii'na juuna'. Quia jo' tcwaⁿ tsaⁿ'ñeeⁿ ts'aⁿ na macoco.
10. Matsoom nnom:—Ticwii cwii joo na ñetjo̱ na t'unco nn'aⁿ, najndyee tyoñe'quia nn'aⁿ winom na yaticheⁿ na nncwe nc'iaana. Ndo' quia na jnda̱ mawjaacjoo naⁿ'ñeeⁿ na cwiwena, quia jo' cwiñe'quiana winom na ticue'ntyjo̱ na yana'. Sa̱a̱ ‘u je', jnda̱ seiljo' winom na yaticheⁿ na quia je'cheⁿ nleil'uena'.
11. M'aaⁿ Jesús Caná ts'o̱ndaa Galilea quia s'aajñeeⁿ ts'iaaⁿ na tixocaluii na cwe' ts'aⁿ nnts'aa. Ndo' na luaa' s'aaⁿ t'mo̱o̱ⁿ na t'maⁿ cwiluiiñê. Manc'e jo' na jâ nn'aⁿ na cwila'jomndyô̱ ñ'eⁿñê, jnaⁿna' na cwilayuu'â ñ'eⁿñê.
12. Jnda̱ na tuii na luaa', quia jo' jâ nn'aⁿ na cwindya̱a̱yâ ñ'oom na mañequiaaⁿ, saayâ Capernaum ñ'eⁿñê, ñequio tsoñeeⁿ ñequio ntyjeeⁿ. Ndo' ljoo'ndyô̱ jo' jo' cwantindyo xuee. Tjei' Jesús nn'aⁿ quii' wats'om t'maⁿ Jerusalén
13. Juu xjeⁿ'ñeeⁿ jnda̱ wjaawindyoo' nncuee' ncuee pascua quia jaa nn'aⁿ judíos cwilacwja̱a̱ canmaⁿ. Jo' chii saayâ Jerusalén ñ'eⁿ Jesús.
14. Tach'eeⁿ' wats'om t'maⁿ, jo' jo' ljeiiⁿ nn'aⁿ na cwinda̱a̱ quioondyo ñ'eⁿ canmaⁿ ñ'eⁿ cantu'. Ndo' mati meindyuaandye nn'aⁿ na cwila'jndyoondye s'om ‘naaⁿ nn'aⁿ na cwi'ooquie' wats'om.
15. Ndo' jnda̱ na nty'iaaⁿ'aⁿ na luaa', quia jo' s'aaⁿ l'uaa tsja'jneiⁿ, jnda̱ chii jleintyjo̱o̱ⁿ naⁿ'ñeeⁿ. Tjeiiⁿ'eⁿ cha'tsondye joona ch'eeⁿ' tach'eⁿ wats'om'ñeeⁿ. Mati canmaⁿ ñ'eⁿ quioondyo. Ndo' seicantqueeⁿ meiⁿsa na cwilei'cho nn'aⁿ na cwila'jndyoondye s'om jo' jo'. Seiquiaⁿ s'om ‘naaⁿ naⁿ'ñeeⁿ.
16. Ndo' nda̱a̱ nn'aⁿ na cwinda̱a̱ cantu' matsoom:—Catjei'yo' quioo'm'aⁿ' ñjaaⁿñe. Tacal'a'yo' na waa' Tsotya̱ya na matseijomna' cha'na ts'ua.
17. Quia jo' jâ nn'aⁿ na t'maaⁿ na cala'jomndyô̱ ñ'eⁿñê ts'iaaⁿ na mach'eeⁿ tjañjoom' n'o̱o̱ⁿyâ ñ'oom na mawaa cjoo' libro Salmos. Matsona': “Nla'cuee' nn'aⁿ ja jnaaⁿ' na queeⁿ ts'o̱o̱ⁿya na nleil'uee'ndyena waa' Ty'o̱o̱ts'om cha'xjeⁿ na matsa̱'ntjomna'.”
18. Ndo' ta'x'ee nn'aⁿ judíos nnoom, jluena:—¿Cwaaⁿ ts'iaaⁿ nntsa' na tixocaluii juuna' na cwe' ts'aⁿ nnts'aa na m'mo̱ⁿna' nda̱a̱yâ na waa najndeii na matseixmaⁿ' na nmeiiⁿ' mache'?
19. T'o̱ Jesús nda̱a̱na, matsoom:—Calatyui'yo' wats'omwaañe ndo' ñe'ndyee xuee nntseiwa̱nnda'a juuna'.
20. Ndo' t'o̱o̱ nn'aⁿ judíos'ñeeⁿ:—Wen'aaⁿ nchoo' yom ntyu tjacaa na tuii wats'omwaañe, ndo' ‘u je' ¿aa cwe' ñe'ndyee xuee nntseiwe' juuna'?
21. Sa̱a̱ seijoom'ñê na juu seiiⁿ'eⁿ cwiluiiñena' wats'om.
22. Jo' chii jnda̱ na tquiaa Ty'o̱o̱ts'om na tando'xcoom jnda̱ na tueeⁿ'eⁿ, jâ nn'aⁿ na cwindya̱a̱yâ ñ'oom na mañequiaaⁿ tjañjoom' n'o̱o̱ⁿyâ na ljo' tsoom. Ndo' jlayuu'â ñ'oom na seineiiⁿ ndo' mati ñ'oom' Ty'o̱o̱ts'om na teiyo teiljeii. Ntyjii Jesús chiuu waa naquii' ts'om ts'aⁿ
23. Yocheⁿ na tyom'aaⁿ Jesús Jerusalén na tyowaa xuee Pascua quia jaa nn'aⁿ judíos cwila'wja̱a̱ya canmaⁿ, nn'aⁿ na m'aⁿ jo' jo' tyonty'iaana jndye nnom ts'iaaⁿ na tyoch'eeⁿ na tixocanda̱a̱ nluii na cwe' ts'aⁿ nnts'aa. Jo' chii jndyendyena tyola'yu'na na cwiluiiñê Cristo.
24. Sa̱a̱ tînquiaañê ñ'eⁿndyena, ee ntyjeeⁿ chiuu n'omna.
25. Meiⁿ ticaⁿna' na cwji'yuu'ñe ts'aⁿ nnoom cantyja ljo' la'xmaⁿ nn'aⁿ, ee maxjeⁿ mantyjeeⁿ chiuu n'omna.