1. Nn'aⁿ na cwiluiindye tmaaⁿ' nn'aⁿ fariseos tyondyena na majndyendyeti nn'aⁿ teits'oomndye cantyja ‘naaⁿ' Jesús, nchiiti cantyja ‘naaⁿ' Juan.
2. Sa̱a̱ na mayuu'cheⁿ nquii Jesús tîcatseits'oomñê nn'aⁿ. Macanda̱ jâ nn'aⁿ na t'maaⁿ na cala'jomndyô̱ ñ'eⁿñê, jâ l'aayâ ts'iaaⁿ'ñeeⁿ.
3. Jo' chii quia na jñeeⁿ na luaa' cwilue fariseos'ñeeⁿ, jlueeⁿ'eⁿ ts'o̱ndaa Judea ñ'eⁿndyô̱ na nntsaayâ Galilea.
4. Ndo' na cwitsaayâ jo' jo' majndaa' na nncwino̱o̱ⁿyâ ts'o̱ndaa Samaria.
5. Jo' chii squia̱a̱yâ cwii tsjoom na jndyu Sicar ts'o̱ndaa Samaria. Tsjoom'ñeeⁿ manndyoo' m'aaⁿna' yuu waa tyuaa na jndaa' José nnom tsotyeeⁿ Jacob.
6. Jo' jo' tyowaa tsui' na s'aa Jacob. Ndo' Jesús, na teijñaⁿ'aⁿ na jñoom nato, tjacjom nacañoom' tsui'ñeeⁿ. Ndo' jnda̱ tuee' quiajmeiⁿ'.
7. Xjeⁿ'ñeeⁿ tyje'cañoom cwii yuscu Samaria jo' jo' na nncwji' ndaatioo. Matsoom nnom:—Quiaa' ndaatioo nnc'ua.
8. Ndo' jâ nn'aⁿ na t'maaⁿ na cala'jomndyô̱ ñ'eⁿñê, xjeⁿ'ñeeⁿ jnda̱ saayâ quii' tsjoom. Saalajndaayâ na nlcwaa'â ñ'eⁿñê.
9. Matso yuscu Samaria nnoom:—¿Chiuu na macaⁿ' ndaatioo no̱o̱ⁿ, ee ‘u cwiluiindyu' ts'aⁿ judío ndo' ja cwiluiindyo̱ samaritana?Luaa' tso yuscu'ñeeⁿ nc'e nn'aⁿ judíos tiquila'tjoom'ndyena ñequio nn'aⁿ samaritanos.
10. T'o̱ Jesús nnom, tsoom:—Xeⁿ cwe' matsei'no̱ⁿ' na jeeⁿ jnda tseixmaⁿ naya na ñe'cats'aa Ty'o̱o̱ts'om ‘u, ndo' xeⁿ matsei'no̱ⁿ' ‘ñeeⁿ cwiluiindyo̱ na macaⁿ'a ndaatioo njom', nntseity'oondyu' no̱o̱ⁿ na cateijndeiya ‘u, ndo' ja jnda̱ tquiaya cwii na matseijomna' ndaatioo na nñequiaana' na ticantycwii na wando'.
11. Matso yuscu'ñeeⁿ nnoom:—Ta, tjaa'naⁿ ‘naⁿ c'oom' na nncwji' ndaatioo, ndo' tsui'waa, jeeⁿ njoomna'. Quia jo' ¿yuu nnc'oom'yu' ndaatioo'ñeeⁿ na nntseixmaⁿya na ticantycwii na wando̱'a?
12. ¿Aa nnts'aacheⁿna' na mache' na ‘u cwiluiit'maⁿndyu'ti' nchiiti weloo welooya Jacob? Ee jom tyo'om ndaa tsui'waa, mati ntseinaaⁿ ñequio quioo' ntsmeiiⁿ'eⁿ, ndo' tquiaaⁿ juuna' nda̱a̱ jâ.
13. T'o̱ Jesús nnom, matsoom:—Cha'tso nn'aⁿ na cwiwe ndaatioomeiiⁿ nndyo na ñe'cwennda'na.
14. Sa̱a̱ nn'aⁿ na cwiwena ndaa na mañequia tixocats'aana' na ñecwetina ee nnts'aana' naquii' n'omna cha'cwijom ndaa na cwilei'wo̱o̱na' ts'om xo̱' na ticantquiee'na' na nnts'aana' na tijoom cantycwii na nnta'ndo'na.
15. Ndo' yuscu'ñeeⁿ matso:—Jeeⁿ ‘u Ta quiaa' ndaatioowaa' cha na tacandyo na ñe'c'uatya̱, meiⁿ tantseicachjuundyo̱ na ñequii'cheⁿ na candyo̱cwjii'a juuna'.
16. Matso Jesús nnom:—Cja', cwaaⁿ' sa', ndo' jnda̱ jo' quio'yo' ñjaaⁿ.
17. T'o̱ yuscu'ñeeⁿ nnoom:—Ja tjaa'naⁿ s'aya.Matso Jesús nnom:—Majo'ndyo ñ'oom na matsu' na ‘u tjaa'naⁿ sa'.
18. Ee jnda̱ ñet'oom ‘om sa' ndo' juu ts'aⁿ na m'aaⁿ ñ'eⁿndyu' je', nchii sa' jom. Cantyja na luaa' waa, mayuu' ñ'oom tsu'.
19. Jnda̱ na jndii yuscu'ñeeⁿ ñ'oomwaa', tsoom:—Jeeⁿ ‘u Ta, matsei'no̱ⁿ'a na ‘u cwiluiindyu' profeta.
20. Weloo weloo jâ nn'aⁿ samaritanos tyola't'maaⁿ'ndyena Ty'o̱o̱ts'om sjo̱waa. Sa̱a̱ ‘o nn'aⁿ judíos cwindu'yo' wats'om t'maⁿ ‘naⁿ'yo' Jerusalén jo' jo' cala't'maaⁿ'ndye nn'aⁿ jom.
21. Matso Jesús nnom yuscu'ñeeⁿ:—'U yuscu, catseiyu' ñ'oom na matsjo̱o̱ njom' na manncue'ntyjo̱ xjeⁿ na nla't'maaⁿ'ndye nn'aⁿ Tsotya̱ya meiⁿquiayuucheⁿ, nchii cwe' sjo̱waa oo Jerusalén.
22. ‘O nn'aⁿ Samaria jeeⁿ cachjoo cwila'no̱ⁿ'yo' cantyja ‘naaⁿ' Ty'o̱o̱ts'om, ndo' cwe' cwila't'maaⁿ'ndyo'to'yo' jom. Sa̱a̱ jâ nn'aⁿ judíos cwila'no̱o̱ⁿ'yayâ ‘ñeeⁿ cwila't'maaⁿ'ndyô̱. Ee cantyja ‘naaⁿyâ jo' na macwji'n'maaⁿñê nn'aⁿ.
23. Sa̱a̱ manncue'ntyjo̱ xjeⁿ, ndo' je' mamawe'ntyjo̱ na joo nn'aⁿ na mayuu'cheⁿ na cwila't'maaⁿ'ndye Tsotya̱ya, macaⁿna' na cala'tmaaⁿ'ndyena jom cantyja ‘naaⁿ' Espíritu na cwiluiiñê ndo' ñequio na mayoona. Ee l'ue ts'om Tsotya̱ya na luaa' cala't'maaⁿ'ndye nn'aⁿ jom.
24. Ty'o̱o̱ts'om cwiluiiñê Espíritu. Jo' chii joo nn'aⁿ na ñe'cala't'maaⁿ'ndye jom, macaⁿna' na c'omna nacje ‘naaⁿ' Espíritu Santo, ndo' ñequio na mayoona.
25. Matso yuscu'ñeeⁿ nnoom:—Ja ntyjii na nncwje'cañoom Mesías, manqueⁿ na cwiluiiñê Cristo. Jom quia na nncwjeeⁿ'eⁿ, nntseinchoom'm cha'tso ñ'oommeiⁿ' nda̱a̱ya.
26. Matso Jesús nnom:—Mannco̱ na matseina̱ⁿya ñ'eⁿndyu' cwiluiindyo̱ nqueⁿ.
27. Majuu xjeⁿ'ñeeⁿ jâ nn'aⁿ na cwila'jomndyô̱ ñ'eⁿñê squie'caño̱o̱ⁿyâ joona. Ticjawee' n'o̱o̱ⁿyâ na matseineiiⁿ ñ'eⁿ cwii yuscu, sa̱a̱ meiiⁿ na ljo' tjaa'naⁿ na ta'x'a̱a̱yâ ‘ndyoo yuscu'ñeeⁿ: “¿Ljo' l'ue ts'om'?” oo na l'uuyâ nnom Ta Jesús: “¿Cwaaⁿ ñ'oom matseineiⁿ' ñequio yuscum'aaⁿ'?”
28. Ndo' ‘ndii yuscu'ñeeⁿ tsjoo ‘naaⁿ'aⁿ, tjalcweeⁿ'eⁿ tsjoom. Tjacatsoom nda̱a̱ nn'aⁿ na m'aⁿ jo' jo':
29. —Quio'yo' na nntsaacanty'ia'yo' cwii tsaⁿs'a na jnda̱ tso no̱o̱ⁿ cha'tso na tijo'ndyo na jnda̱ ñes'aa. M'aaⁿ' ts'o̱o̱ⁿ na juu cwiluiiñe Mesías.
30. Ndo' jlui' naⁿ'ñeeⁿ tsjoomna, ty'ena yuu na m'aaⁿyâ ñ'eⁿ Jesús.
31. Yocheⁿ na tyooquiena, jâ nn'aⁿ na t'maaⁿ na cala'jomndyô̱ ñ'eⁿñê l'uuyâ nnoom:—'U Maestro, cwa sa, cwa'.
32. Sa̱a̱ matsoom nda̱a̱yâ:—Ja mañ'o̱ⁿ cwii na nlcwaa'a na ‘o ticaliu'yo'.
33. Quia jo' jâ na cwindya̱a̱yâ ñ'oom na mañequiaaⁿ jlana̱a̱ⁿ cheⁿncjo̱o̱yâ nda̱a̱ nc'iaayâ. L'uuyâ:—¿Aa nnts'aacheⁿna' na jndyoñ'oom cwii ts'aⁿ na nlcwaaⁿ'aⁿ?
34. Sa̱a̱ matso Jesús nda̱a̱yâ:—Luaa waa na matseijomna' nantquie ‘naⁿya, na cats'aaya yuu na l'ue ts'om nqueⁿ na jñoom ja, hasta na jnda̱ jnda̱a̱' ts'iaaⁿ na ty'ioom ja.
35. ‘O waa ñ'oom tjañoom' na cwindu'yo' na ñequiee chi' cwii tjo̱o̱ ndo' nntyjeendye nn'aⁿ. Sa̱a̱ ja matsjo̱o̱ nda̱a̱'yo': Caleity'iom nda̱a̱'yo', ndo' canty'ia'yo' ndiocheⁿ na m'aⁿ nn'aⁿ cha'cwijom ntjom na jnda̱ tmaⁿ na nncwantjom ts'aⁿ cwentaa' Ty'o̱o̱ts'om. Matseijomna' joona na jnda̱ tue'ntyjo̱ xjeⁿ na ntyjeeñe ts'aⁿ.
36. Juu ts'aⁿ na matyjee ntjom na jnda̱ tue' waa na mawantjoom ee matseitjoom nn'aⁿ na nndaana na ticantycwii na cwita'ndo'na. Ndo' na luaa' waa, juu ts'aⁿ na manom' ntjom ñecwiixjeⁿ na nñequiaana' na neiiⁿ'eⁿ cha'xjeⁿ juu ts'aⁿ na matyjee ntjom.
37. Ee juu ñ'oom na cwilue nn'aⁿ na cwii ts'aⁿ manom' sa̱a̱ cwiicheⁿ ts'aⁿ matyjeeñe, ñ'oom na mayuu' jo'.
38. Na majño̱o̱ⁿya ‘o naquii' ts'iaaⁿ ‘naⁿya matseijomna' cha'cwijom na cwitsacatyjeendyo' yuu na nchii ncjo'yo' jla'cato̱'yo' ts'iaaⁿ. Nt'omcheⁿ nn'aⁿ jnda̱ jla'nchu'na na nncuaa ts'iaaⁿ ‘naaⁿ' Ty'o̱o̱ts'om naquii' n'om nn'aⁿ ndo' ‘o jnda̱ macwitsaquie'yo' ts'iaaⁿ'ñeeⁿ.
39. Ndo' jndyendye nn'aⁿ samaritanos tsjoom'ñeeⁿ tyola'yu'na ñ'eⁿ Jesús, cwe' nc'e ñ'oom ‘ndyoo yuscu'ñeeⁿ na tjei'yuu'ñe nda̱a̱na na matso: “Jnda̱ t'mo̱o̱ⁿ no̱o̱ⁿ cha'tso na tijo'ndyo na jnda̱ ñes'aa.”
40. Jnda̱ na tquie'cañom nn'aⁿ samaritanos'ñeeⁿ yuu na m'aaⁿ Jesús, tyotaⁿna nnoom na caljoo'ñê ñ'eⁿndyena, ndo' ljoo'ñê tsjoomna we xuee.
41. Ndo' quia tyondyena ñ'oom na tyoñequiaaⁿ, jndyendyetina tyola'yu'na.
42. Ndo' tyoluena nnom yuscu'ñeeⁿ:—Je' tachii macanda̱ cwe' ñ'oom na tsu', jo' chii cwilayuu'â. Ee mancjo̱o̱tya̱a̱yâ jnda̱ jndya̱a̱yâ ñ'oom ‘ñom. Je' cwila'no̱o̱ⁿ'â na jom mayuu'cheⁿ cwiluiiñê Cristo na macwji'n'maaⁿñê nn'aⁿ tsjoomnancue. Sein'maⁿ Jesús jnda ts'aⁿ na cwiluiit'maⁿñe
43. Ndo' quia na jnda̱ teinom we xuee'ñeeⁿ jlui' Jesús jo' jo'. Saalcwa̱a̱'â ñ'eⁿñê Galilea.
44. Ee manquiityeeⁿ tjei'yuu'ñê na ticala't'maaⁿ'ndye nn'aⁿ cwii profeta na mañe'cwii ndyuaaⁿ'aⁿ ñ'eⁿndyena.
45. Ndo' quia na squia̱a̱yâ Galilea ñ'eⁿñê nn'aⁿ na m'aⁿ jo' jo' jeeⁿ neiiⁿna jom, jla'ljona jom. Ee mati joona ty'ena Jerusalén quia tuee' ncuee Pascua, ndo' nty'iaana cha'tso ‘naaⁿ t'maⁿ na tyoch'eeⁿ jo' jo'.
46. Jnda̱ jo' saanndaa'â ñ'eⁿñê Caná ts'o̱ndaa Galilea, yuu na seicwaqueeⁿ ndaa na s'aana' winom. Ndo' tsjoom Capernaum tyom'aaⁿ cwii ts'aⁿ na cwiluiit'maⁿñe cantyja ‘naaⁿ' gobiernom. Tyochjoo, jnda tsaⁿ'ñeeⁿ, m'aaⁿ na wii'.
47. Quia na jndii tsaⁿ'ñeeⁿ na jnda̱ squia̱a̱yâ Galilea ñ'eⁿ Jesús na jnaaⁿyâ Judea, tja tsaⁿ'ñeeⁿ na m'aaⁿyâ. S'aa ty'oo nnoom na cjaⁿ waa', na catsein'maaⁿ tyochjoo jnda, ee juu mañe'cue'.
48. Ndo' matso Jesús nnom:—'O maxjeⁿ tixocala'yu'yo' na waa najndo̱ xeⁿ ticanty'ia'nda̱a̱'yo' na nnts'aa yuu na xocanda̱a̱ na nluii na cwe' ts'aⁿ nnts'aa.
49. Nquii ts'aⁿ na cwiluiit'maⁿñe ñ'eⁿ gobiernom t'o̱ ‘ndyoo Jesús. Tso:—Jeeⁿ ‘u Ta, maje'ndyo cja' w'aya, cwii tyoowe' ti'jndaaya.
50. Tso Jesús nnom tsaⁿ'ñeeⁿ:—Cja' ee maxjeⁿ nlco'yana' tyochjoo jnda'.Ndo' juu tsaⁿs'a'ñeeⁿ seiyoom'm ñ'oom na tso Jesús. Tjalcweeⁿ'eⁿ waⁿ'aⁿ.
51. Ndo' yocheⁿ na mawjaaweⁿ'eⁿ Capernaum, tquiocatjomndye mosoom'm. Jla'candiina jom, jluena:—Jnda̱ wjaaco'yana' tyochjoo jnda'.
52. Tax'eeⁿ nda̱a̱ naⁿ'ñeeⁿ ljo' xjeⁿ jnaⁿna' na tjaco'yana' jnaaⁿ. Ndo' t'o̱o̱ naⁿ'ñeeⁿ nnoom:—Wjacheⁿ chjooti na teinom na quiajmeiⁿ' ‘ndii tycu na matseicona' jom.
53. Quia jo' tsotye tyochjoo'ñeeⁿ sei'no̱o̱ⁿ'o̱ⁿ na mañejuu xjeⁿ'ñeeⁿ tso Jesús nnoom na nlco'yana' tyochjoo jnaaⁿ. Ndo' seiyoom'm ñ'eⁿ Jesús, mati cha'tsondye nn'aⁿ waⁿ'aⁿ.
54. Luaa' ts'iaaⁿ na jnda̱ we na s'aa Jesús na tueⁿ'eⁿ Galilea na jnaaⁿ Judea, na juu ts'iaaⁿ'ñeeⁿ tixocaluii na cwe' meiⁿnquia ts'aⁿ nnts'aa.