1. Jnda̱ teinom na nmeiiⁿ', teity'io̱o̱'â ndaaluee Galilea ñ'eⁿ Jesús na mati jndyu juuna' Tiberias.
2. Ndo' cwii tmaaⁿ' nn'aⁿ na jndyendye ty'entyjo̱na naxeeⁿ'eⁿ ee jnda̱ nty'iaanda̱a̱na ts'iaaⁿ t'maⁿ na tyoch'eeⁿ na tyotsein'maaⁿ nn'aⁿwii.
3. Quia jo' jâ nn'aⁿ na t'maaⁿ na cala'jomndyô̱ ts'iaaⁿ na mach'eeⁿ, saawaayâ cwii sjo̱ ñ'eⁿñê. Jo' jo' saawindyuaandyô̱.
4. Ndo' quia ljo' manndyoo' nncuee' xuee pascua na jaa nn'aⁿ judíos cwilacwja̱a̱ya canmaⁿ.
5. Ndo' Jesús jleity'iom nnoom, manty'iaaⁿ'aⁿ jnda̱ manquioquie cwii tmaaⁿ' nn'aⁿ na jndyendye. Quia jo' matsoom nnom Felipe:—¿Yuu nla'jndaaya nantquie cha nnda̱a̱ nlcwa' cha'tsondye naⁿm'aⁿ'?
6. Luaa' matsoom cha nleitquioo' chiuu m'aaⁿ' ts'om Felipe. Ee nqueⁿ mantyjiicheeⁿ ljo' nnts'aaⁿ.
7. T'o̱ Felipe nnoom, matso:—Meiⁿ xeⁿ we siaⁿnto s'om denarios na nlacatsuuya na nla'jndaaya ntyoo', sa̱a̱ maxjeⁿ xocwijndeii juuna' na nlcwa' cwii cwii joona meiiⁿ ñe'chjoowi'.
8. Cwii ncjo̱o̱ndyô̱ nn'aⁿ na cwindya̱a̱yâ ñ'oom na mañequiaaⁿ, tsaⁿ na jndyu Andrés, tyjee Simón Pedro, matso nnom Jesús:
9. —Ñjaaⁿ m'aaⁿ cwii tyochjoo na maleiñ'oom ‘om taⁿ' tyoo' na tuiina' ñequio jnda̱a̱tyoo' lqueeⁿ cebada ñ'eⁿ we catscaa chjoo na jnda̱ jneiiⁿ sa̱a̱ ¿cwaaⁿ nnda̱a̱' nmeiⁿ' na jndyendye nn'aⁿ?
10. T'o̱ Jesús, matsoom nda̱a̱yâ:—Candu'yo' nda̱a̱ nn'aⁿ na cwindyuaandyena.Ndo' jo' jo' jndye jnda̱ nch'u niom. Quia jo' teindyuaandye nn'aⁿ, ndo' tuee' cha'na ‘om meiⁿndye naⁿnom.
11. Quia jo' to'ñom Jesús ntyoo'ñeeⁿ. Tquiaaⁿ na quianl'uaa' Tsotyeeⁿ cantyja ‘naaⁿ joona'. Jnda̱ jo' tyoc'oom joona' nda̱a̱ jâ nn'aⁿ na t'maaⁿ na cala'jomndyô̱ ñ'eⁿñê. Ndo' jâ t'o̱o̱ⁿyâ joona' nda̱a̱ nn'aⁿ na meindyuaandye. Ndo' malaa'ti' s'aaⁿ ñequio calcaa nch'u, cwanti na ñe'catquiina na cwii cwiindyena.
12. Jnda̱ na tjacjoona, quia jo' nda̱a̱ jâ na cwila'jomndyô̱ ñ'eⁿñê tsoom:—Cala'tjom'yo' ntaⁿ' cajnda̱a̱ na ‘ndiina' cha tints'aana' na cwe' nlei'ndaa'na'.
13. Ndo' jlatjo̱o̱ⁿyâ ntaⁿ' ntyoo' na ‘ndiina' na tcwa' naⁿ'ñeeⁿ na tuiina' ñ'eⁿ jnda̱a̱tyoo' cebada. Jla'cato̱o̱'â canchoo'we tsquiee ñ'eⁿ joona'.
14. Ndo' naⁿ'ñeeⁿ, jnda̱ na nty'iaana ts'iaaⁿ'ñeeⁿ na s'aaⁿ na ma'mo̱ⁿna' na waa najndeii na cwiluiiñê, tyoluena:—Mayuu'cheⁿ tsaⁿs'am'aaⁿ' cwiluiiñê nquii profeta na mawaa ljeii na matsona' na nncwje'cañoom tsjoomnancue na nñequiaa ñ'oom' Ty'o̱o̱ts'om.
15. Ndo' sei'no̱ⁿ' Jesús na mawaa xjeⁿ na nnquioc'om naⁿ'ñeeⁿ jom ndo' ñequio najndei'na' na nlqueⁿna jom na nluiiñê rey. Cwe' jo' cwiicheⁿ cwii ndii' tjannaaⁿ'aⁿ na ñenqueⁿ jo sjo̱. Tjacaa Jesús nnom ndaaluee
16. Ndo' quia na tuee' na jnda̱ tmaaⁿ, jâ nn'aⁿ na t'maⁿ Jesús na cala'jomndyô̱ ñ'eⁿñê, saacua̱a̱yâ, squia̱a̱yâ ‘ndyoo ndaaluee.
17. Jo' jo' tuo̱o̱yâ cwii w'aandaa, na nncwity'io̱o̱'â ndaaluee na nntsquia̱a̱yâ Capernaum. Ndo' quia tuee' na teijaaⁿ, ticando' na nncwje'cañoom jâ.
18. Ndo' nc'e na jndeii tioo jndye tyotseiwena' ndaaluee'ñeeⁿ.
19. Jo' chii ñe'om oo yom kilómetros jnda̱ tjacaa w'aandaa'ñeeⁿ na cwicantyjaandyô̱ n'oom pala'. Xjeⁿ'ñeeⁿ nty'iaayâ na mandyocaa Jesús nnom ndaaluee na matseicandyoo'ñê na m'aaⁿyâ. Jeeⁿ ndya' jla'catyuendyô̱.
20. Tsoom nda̱a̱yâ:—Mannco̱ luaañe, tilacatyuendyo'.
21. Jeeⁿ ndya' neiiⁿyâ s'aana' na to'ño̱o̱ⁿyâ jom ts'om w'aandaa. Ndo' mantyjacheⁿ tue'cañoom juuna' yuu na cwitsaayâ. Cwil'uee nn'aⁿ Jesús
22. Ndo' teincoo cwiicheⁿ xuee, nn'aⁿ na jndyendye na ljoo'ndye xndyaa' ndaaluee yuu na tquiaa Jesús na tcwa'na, tyoqueⁿna cwenta na ñe'cwii w'aandaa chjoo ñetuaa. Tjañjoom' n'omna na tîcuo̱o̱ⁿ juuna' ñequiondyô̱ jâ nn'aⁿ na cwila'jomndyô̱ ts'iaaⁿ na mach'eeⁿ.
23. Sa̱a̱ nt'omcheⁿ l'aandaa nch'u na jnaⁿ Tiberias, tquie'cañomna' yuu na tcwa' naⁿ'ñeeⁿ ntyoo'ñeeⁿ na jnda̱ tquiaa Ta Jesús na quianl'uaa' Tsotyeeⁿ.
24. Quia jo' tuo̱ naⁿ'ñeeⁿ l'aandaa nch'u'ñeeⁿ. Ty'ena tquiena Capernaum na ty'ecal'ueena Jesús. Ee jla'no̱ⁿ'na na tac'oomñê yuu na tquiaaⁿ na tcwa'na, meiⁿ jâ nn'aⁿ na t'maaⁿ na cala'jomndyô̱ ñ'eⁿñê ts'iaaⁿ na mach'eeⁿ. Jesús cwiluiiñê tyoo' na cwita'ndo' nn'aⁿ
25. Ndo' quia na jnda̱ jliuna Jesús cwiicheⁿ xndyaa' ndaaluee, tyoluena nnoom:—Maestro, ¿ljo' xjeⁿ jndyo' luaa?
26. T'o̱o̱ⁿ nda̱a̱na, matsoom:—Ñ'oom na mayuu'cheⁿ na matsjo̱o̱ nda̱a̱'yo'. ‘O cwil'ue'ya'yo' ja nchii nc'e na nty'ia'yo' ts'iaaⁿ na s'aa na tixocanda̱a̱ nts'aa cwe' meiⁿquia ts'aⁿ sa̱a̱ cwe' nc'e na tcwa'yo' tyoo' na tquiaana' na tjacjo'yo'.
27. ‘O cwijoo' n'om'yo' na nleijndaa' nantquie, ndo' joona' ‘naⁿ na cwilei'ndaa'. Sa̱a̱ ticaty'iomna' na cwil'a'yo' na ljo'. Calajnda̱'yo' na nliu'yo' cwii na cha'cwijom nantquie na cantyja ‘naaⁿ' juu jo' nla'xmaⁿ'yo' na ticantycwii na cwitando'yo'. Ja na cwiluiindyo̱ ts'aⁿ na jnaⁿ cañoom'luee nñequia juu na matseijomna' nantquie naquii' n'om'yo' ee Tsotya̱ya Ty'o̱o̱ts'om ma'mo̱o̱ⁿ na jnda̱ tqueeⁿ ja ts'iaaⁿmeiiⁿ.
28. Quia jo' nt'omndyena jluena nnoom:—¿Ljo' macaⁿna' na cal'aayâ cha na nncjaawee' ntyjii Ty'o̱o̱ts'om jâ?
29. T'o̱ Jesús nda̱a̱na, matsoom:—Luaa waa na l'ue ts'oom ñ'eⁿndyo' na cala'yu'yo' ñequio ja na jñoom.
30. Jo' chii t'o̱o̱na nnoom:—¿Cwaaⁿ cwii nnom na nntsa' nnty'iaayâ na tixocaluii na cwe' ts'aⁿ nnts'aa cha m'mo̱ⁿna' nda̱a̱yâ na waa na cwiluiindyu' ndo' cha na nla'yuu'â ñ'eⁿndyu'?
31. Nquiee weloo welooya tyocwa'na maná quia tyom'aⁿna ndyuaa yuu na tjaa nn'aⁿ c'om, cha'xjeⁿ na matso ljeii ñ'oom' Ty'o̱o̱ts'om na teiyo teiljeii: “Tquiaa Ty'o̱o̱ts'om tyoo' na jnaⁿ cañoom'luee na tcwa'na.”
32. T'o̱ Jesús nda̱a̱na, matsoom:—Ñ'oom na mayuu'cheⁿ matsjo̱o̱ nda̱a̱'yo'. Juu maná na tquiaa Moisés nchii cwiluiiñena' tyoo' na jnaⁿ na m'aaⁿ Ty'o̱o̱ts'om. Sa̱a̱ nquii Tsotya̱ya mañequiaaⁿ juu na mayuu' na jnaⁿ na m'aaⁿ cañoom'luee na matseijomna' juu cha'na tyoo'.
33. Juu na cwiluiiñe tyoo' na mañequiaa Ty'o̱o̱ts'om, cañoom'luee jnaⁿ jndyocue. Juu mañequiaa na la'xmaⁿ nn'aⁿ na ticantycwii na cwita'ndo'na.
34. Quia jo' tyoluena nnoom:—Jeeⁿ ‘u Ta, ñenquii'cheⁿ quiaa' tyoo'meiⁿ' nda̱a̱yâ.
35. Ndo' t'o̱ Jesús nda̱a̱na, matsoom:—Ja cwiluiindyo̱ tyoo' na mañequiaya na la'xmaⁿ nn'aⁿ na ticantycwii na cwita'ndo'na. ‘Ñeeⁿ juu ts'aⁿ na nntioñe l'o̱o̱, matseijomna' juu cha'cwijom ts'aⁿ na jnda̱ tjacjoo' na macwa'. Ndo' ‘ñeeⁿ ts'aⁿ na matseiyu' ñ'eⁿndyo̱ nquioo na teiiⁿ naquii' ts'om cha'na quia ma'uu ts'aⁿ ndaa.
36. Sa̱a̱ cha'na ñ'oom na jnda̱ tsjo̱o̱ya nda̱a̱'yo', meiiⁿ na jnda̱ nty'ia'nda̱a̱'yo' ts'iaaⁿ na mats'aa, maxjeⁿ tîcala'yu'yo'.
37. Cha'tso nn'aⁿ na mañequiaa Tsotya̱ya l'o̱o̱, nntioondyena l'o̱o̱. Ndo' ‘ñeeⁿ juu ts'aⁿ na nntioñe l'o̱o̱ya tijoom nnts'aa na tico'ño̱ⁿ juu.
38. Ee ja na jnaaⁿya caáoom'luee nchii na jndyo̱o̱ na cats'aa ljo' na l'ue ts'o̱o̱ⁿ. Sa̱a̱ jndyo̱o̱ na cats'aaya yuu na l'ue ts'om nqueⁿ na jñoom ja.
39. Ndo' Tsotya̱ya na jñoom ja luaa waa na l'ue ts'oom na cats'aa, na cha'tsondye nn'aⁿ na jnda̱ tquiaaⁿ l'o̱o̱ya, meiⁿcwiindye joona ticatsuuñe añmaaⁿ'. Ndo' xuee na macanda̱ nñequia na nnta'ndo'xco cha'tsondye joona.
40. Ee Tsotya̱ya l'ue ts'oom na cha'tsondye nn'aⁿ na cwinty'iaa ja na cwiluiindyo̱ Jnaaⁿ na cwila'yu' ñ'eⁿndyo̱ nnto'ñoomna na ticantycwii na cwita'ndo'na. Ndo' xuee na macanda̱ ja nñequia na nnta'ndo'xco joo nn'aⁿ na jnda̱ tja̱.
41. Jnda̱ na tso Jesús ñ'oomwaa', tyola'ncjoo'ndye nn'aⁿ judíos'ñeeⁿ ñ'oom na tsoom: “Ja cwiluiindyo̱ tyoo' na jnaaⁿya cañoom'luee.”
42. Ee tyoluena:—Jesúsm'aaⁿ' ¿aa nchii jnda José jom? Cwita'jnaaⁿ'a tsotyeeⁿ, tsoñeeⁿ. ¿Chiuu na tsoom na jnaaⁿ cañoom'luee, jndyocueeⁿ?
43. T'o̱ Jesús, matsoom nda̱a̱ naⁿ'ñeeⁿ:—Tala'ncjoo'ndyo' cantyja ‘naaⁿ' ñ'oomwaa'.
44. Ee tjaa'naⁿ cwii ts'aⁿ na nnda̱a̱ nntioñe l'o̱o̱ xeⁿ nchii Tsotya̱ na jñoom ja nnts'aaⁿ na cats'aa tsaⁿ'ñeeⁿ na ljo'. Ndo' xuee na macanda̱ ja nnts'aa na nncwando'xco tsaⁿ'ñeeⁿ.
45. Ee profetas, waa ñ'oom na jla'ljeiina na matsona': “M'mo̱ⁿ Ty'o̱o̱ts'om nda̱a̱ cha'tso nn'aⁿ.” Luaa' ñe'catsona' na ticwii cwii ts'aⁿ na jnda̱ jndii ñ'oom na ma'mo̱ⁿ Ty'o̱o̱ts'om ndo' jnda̱ sei'no̱ⁿ' juuna', tsaⁿ'ñeeⁿ nntioñe l'o̱o̱ya.
46. 'Ñ'oomwaa' tica'mo̱ⁿna' na jnda̱ nty'iaa' ts'aⁿ Tsotya̱ya Ty'o̱o̱ts'om. Macanda̱ ja na jñoom quii'ntaaⁿ'yo', ja jnda̱ nty'iano̱o̱ⁿya jom.
47. Ñ'oom na mayuu'cheⁿ matsjo̱o̱ nda̱a̱'yo', ñeeⁿ juu na matseiyu' ñ'eⁿndyo̱ juu matseixmaⁿ na ticantycwii na wando' añmaaⁿ'.
48. Ja cwiluiindyo̱ tyoo' na mañequiaya na cwita'ndo' nn'aⁿ.
49. Weloo weloo'yo' tcwa'na maná jo ndyuaa yuu na tjaa nn'aⁿ c'om, ndo' tja̱na.
50. Ja cwiluiindyo̱ tyoo' na jnaaⁿya cañoom'luee. Meiⁿcwi'ñeeⁿcheⁿ ts'aⁿ na nlcwa', tixocatsuuñe.
51. Ja na jnaaⁿya cañoom'luee cwiluiindyo̱ tyoo' na mañequiaya na cwita'ndo' nn'aⁿ. Meiⁿcwi'ñeeⁿcheⁿ ts'aⁿ na nlcwa' tyoo'waa mamatseixmaⁿ na ticantycwii na wando'. Ndo' juu tyoo' na mañequiaya cha na nnta'ndo'na jo nnom Ty'o̱o̱ts'om, seii'a cwiluiiñe Jo'.
52. Ñ'oomwaa' s'aana' na jla'ncjoo'ndye nn'aⁿ judíos'ñeeⁿ ñequio nc'iaana. Tyoluena:—Manquiuuya na xocanda̱a̱ nñequiaa tsaⁿm'aaⁿ' seiiⁿ'eⁿ na nntquia̱a̱
53. Quia jo' tsoticheⁿ Jesús nda̱a̱na:—Ñ'oom na mayuu'cheⁿ matsjo̱o̱ nda̱a̱'yo', xeⁿ ticatquie'yo' seii' ja na cwiluiindyo̱ ts'aⁿ na jnaⁿ cañoom'luee ndo' na cwe'yo' nioom'a, ticala'xmaⁿ'yo' nn'aⁿ na tando' añmaaⁿ.
54. Nquii ts'aⁿ na jnda̱ tquii seii'a ndo' jnda̱ t'uu nioom'a tseixmaⁿ na ticantycwii na wando'. Ndo' xuee na macanda̱ nnts'aaya na nncwando'xcoom.
55. Ee seii'a matseixmaⁿna' nantquie na tjacantyja naya ndo' nioom'a matseixmaⁿna' juu na nnc'uu ts'aⁿ na tjacantyja naya.
56. Meiⁿcwi'ñeeⁿcheⁿ ts'aⁿ na maquii seii'a ndo' ma'uu nioom'a, tyeⁿ matseitjoom'na' tsaⁿ'ñeeⁿ ñ'eⁿndyo̱, ndo' tyeⁿ matseitjoom'na' ja ñ'eⁿñê.
57. Nquii Tsotya̱ya na jñoom ja quii'ntaaⁿ'yo', jom wanoom'm ndo' cantyja ‘naaⁿ'aⁿ mati wando̱'a. Maluaa' matseijomna' ñ'eⁿ ts'aⁿ na maquii seii'a, nncwando' añmaaⁿ' cantyja ‘naⁿya.
58. Matseina̱ⁿya cantyja ‘naaⁿ' nquii na cwiluiiñe tyoo' na jnaⁿ cañoom'luee. Tyoo'waa titseixmaⁿna' cha'na maná na tcwa' weloo welo'yo' ndo' tja̱na. Sa̱a̱ ticatseijomna' cantyja ‘naⁿya cha'na maná'ñeeⁿ. Ee meiⁿcwi'ñeeⁿcheⁿ ts'aⁿ na nlcwa' tyoo' na matseixmaⁿya, tijoom nncue', m'aaⁿ ndo' m'aaⁿ na wando'.
59. Ñ'oommeiⁿ' seineiⁿ Jesús yocheⁿ na tyo'mo̱o̱ⁿ nda̱a̱ nn'aⁿ quii' wats'om ‘naaⁿ nn'aⁿ judíos tsjoom Capernaum. Ñ'oom na ticantycwii na wando' añmaaⁿ' ts'aⁿ.
60. Majndye nn'aⁿ na tyola'jomndye ñ'oom na tyoñequiaaⁿ, quia jndyena ñ'oomwaa' jluena:—Jeeⁿ jndei'na' ñ'oom na matseineiiⁿ, tixocanda̱a̱ nlajomndyo̱ juuna'.
61. Ntyjii Jesús naquii' ts'oom na cwila'ncjoo'ndye naⁿ'ñeeⁿ cantyja ñ'oom na seineiiⁿ nda̱a̱na. Jo' chii tsoom nda̱a̱na:—¿Aa cwila'lcwe' ñ'oommeiⁿ' ‘o?
62. Quia jo' c'oom'yaya n'om'yo' chiuu nnts'aana' ‘o quia nnty'ia'nda̱a̱'yo' ja na cwiluiindyo̱ ts'aⁿ na jnaⁿ cañoom'luee na nncjo̱waannda'a nandye yuu na ñet'o̱o̱ⁿjndya̱a̱.
63. Macanda̱ nquii Espíritu mañequiaaⁿ na cwita'ndo' nn'aⁿ jo nnom Ty'o̱o̱ts'om. Nchii cantyja ‘naaⁿ seiina na la'xmaⁿna na ljo'. Ñ'oom na mañequiaya cwiluiiñena' cantyja ‘naaⁿ' Espíritu ndo' nc'e juuna' jo' na wando' ts'aⁿ.
64. Sa̱a̱ ndicwaⁿ ñ'eeⁿ'ndyo' na ticalayu'yo' ñ'eⁿndyo̱.Luaa' matsoom nda̱a̱na ee cantyjati na to̱o̱ⁿ'o̱ⁿ na mañequiaaⁿ ñ'oom, mantyjeeⁿ ‘ñeeⁿ joo na ticala'yu' ñ'eⁿñê, ndo' ‘ñeeⁿ juu na nñequiaa cwenta jom.
65. Matsotyeeⁿcheⁿ:—Cwe' nc'e jo' na jnda̱ tsjo̱o̱ nda̱a̱'yo' macanda̱ nnda̱a̱ ntseijomñe ts'aⁿ ñ'eⁿndyo̱ quia mañequiaa Tsotya̱ya na caluii na ljo'.
66. Ndo' nc'e ñ'oomwaa', majndye nn'aⁿ na tyondyejndyeena ñ'oom na tyoñequiaaⁿ, ty'elcwee'na. Taticala'jomndyetina ñ'eⁿñê.
67. Jo' na tax'eeñê nda̱a̱ jâ nn'aⁿ na canchoo'we na t'maaⁿ na cala'jomndyô̱ ñ'eⁿñê, matsoom:—Ndo' ‘o je' ¿aa mati nnto̱ⁿ'ndyo' ñ'eⁿndyo̱?
68. Simón Pedro t'o̱o̱ⁿ, matsoom:—Jeeⁿ ‘u Ta, ticatsona' na nla'jomndyô̱ ñ'eⁿ cwiicheⁿ ts'aⁿ, ee ñ'oom na matseineiⁿ' mañequiaana' na ticantycwii na cwitando̱o̱'â.
69. Ndo' jâ jnda̱ macwila'yuu'â ndo' jnda̱ macwila'no̱o̱ⁿ'â na ‘u cwiluiindyu' Cristo, Jnda Ty'o̱o̱ts'om na wando'.
70. T'o̱ Jesús, matsoom nda̱a̱yâ:—Ja tjeii'a ‘o na canchoo'wendyo'. Ndo' cwii ‘o m'aaⁿñe cantyja ‘naaⁿ' tsaⁿjndii.
71. Luaa' matsoom na ma'mo̱o̱ⁿ Judas Iscariote, jnda Simón. Ee tsaⁿ'ñeeⁿ nñequiaa cwenta jom. Mati juu cwii jâ na canchoo'wendyô̱.