1. Joo ncuee'ñeeⁿ tqueⁿ Augusto César ñ'oom na nleiljeii ncuee cha'tso nn'aⁿ na cha'tso ndyuaa na matsa̱'ntjoom.
2. Luaa' najndyee na teiljeii ncuee nn'aⁿ. Maquialjo' tyom'aaⁿ Cirenio gobiernom ndyuaa Siria.
3. Jo' chii cha'tsondye nn'aⁿ tyo'oona tsjoomna na nleiljeii ncueena.
4. Jo' jnaⁿ José tsjoom Nazaret, ts'o̱ndaa Galilea. Tjawaaⁿ ts'o̱ndaa Judea, tsjoom' David na jndyu Belén. Ee juu José cwiluiiñê tsjaaⁿ David.
5. Tjaaⁿ ñequio María, tsaⁿ na waa ñomca ñ'eⁿñê na nleiljeii ncueena. Ndo' juu majndeiiñe, jnda̱ teinndyoo' na nntseincuii.
6. Ndo' yocheⁿ na m'aⁿna Belén, tue'ntyjo̱ xuee na nntseincuii María.
7. Seincueⁿ jnaaⁿ na cwe' jndyee. Tyochjoo juu. Seityjooñê liaa juu, chii tqueeⁿ juu ts'om ‘naⁿ na quicanjom na cwicwa' quioo'. Ee ticwanaaⁿ l'aa yuu na cwe' cwiquieya nn'aⁿ. Teitquioo'ndye ángeles nda̱a̱ nn'aⁿ
8. Ndyoo' tsjoom Belén jo ndo' jnda̱a̱, tyom'aⁿ nn'aⁿ na cwil'a cwenta quioo' njmeiⁿ' natsjom.
9. Ñejomto teitquioo'ñe cwii ángel cwentaa' Ta Ty'o̱o̱ts'om jo nda̱a̱na, ndo' juu nacaxuee na matseixmaaⁿ seixueeñena' nacañoomna. Ndo' t'maⁿ waa na jla'catyuendyena.
10. Ndo' tso ángel nda̱a̱na:—Tila'catyuendyo', mañequiaya ñ'oom na jeeⁿ ya nda̱a̱'yo'. Juuna' nnts'aana' na jeeⁿ neiiⁿ cha'tsondye nn'aⁿ tsjoomnancue.
11. Ee tsjom je' naquii' tsjoom' David tuiiñe cwii ts'aⁿ na nncwji'n'maaⁿñe ‘o. Majuu Cristo na cwiluiiñê na matsa̱'ntjoom.
12. Luaa waa na nnda̱a̱ nnta'jnaⁿ'yo' jom. Nliu'yo' yu'ndaa'ñeeⁿ na chu'tyjooñê liaa ndo' njoom yuu cwicwa' quioo'.
13. Ndo' mats'ia jo' teitquioo' cwii tmaaⁿ' ángeles ñequio ángel'ñeeⁿ. Cwilcwii'na Ty'o̱o̱ts'om. Cwiluena:
14. Catseit'maaⁿ'ñena' nquii Ta Ty'o̱o̱ts'om na m'aaⁿ nandyeticheⁿ. Cats'aana' na tjaa ñomtiuu c'om nn'aⁿ tsjoomnancue jo nnoom, ee jeeⁿ cjaawee' ts'oom joona.
15. Jnda̱ jo' ty'elcwee' ángeles'ñeeⁿ cañoom'luee. Quia jo' nn'aⁿ na cwil'a cwenta quioo' njmeiⁿ' jluena nda̱a̱ nc'iaana:—Cjaaya Belén. Tsaacanty'iaaya chiuu waa na jnda̱ tuii na luaa' ma'mo̱ⁿ Ta Ty'o̱o̱ts'om nda̱a̱ya.
16. Ndo' jla'tyuaa'na, ty'ena. Quia na tquiena, jliuna María ñequio José ñ'eⁿ yu'ndaa na njoom yuu cwicwa' quioo'.
17. Jnda̱ na nty'iaana na luaa', jla'cano̱o̱ⁿna chiuu waa na jnda̱ jndyena cantyja ‘naaⁿ' yu'ndaa'ñeeⁿ.
18. Cha'tso nn'aⁿ na jndye ñ'oom na jluena, s'aana' na jeeⁿ tjawee' n'om.
19. Ndo' María jeeⁿ tyoqueeⁿ cwenta cha'tso na tuii. Wjaawa, wjaacue na tyotseitioom.
20. Quia na ty'elcwee' nn'aⁿ na cwil'a cwenta quioo' njmeiⁿ', tyola't'maaⁿ'ndyena Ty'o̱o̱ts'om. Tyolcwii'na jom cantyja cha'tso na jnda̱ jndyena ndo' na jnda̱ nty'iaana cha'xjeⁿ na tso ángel nda̱a̱na. Ty'equeⁿna yu'ndaa Jesús l'o̱ Ty'o̱o̱ts'om
21. Jnda̱ jnda̱a̱' ñeeⁿ xuee na tuiiñe yu'ndaa, quia jo' chii jla'canda̱a̱'ndyena costumbre na waa jo nda̱a̱na na cwil'a nn'aⁿ judíos ñ'eⁿ yo'ndaa na naⁿnom. Ndo' jla'cajndyuna jom Jesús. Ee luaa' jnda̱ tqueⁿ ángel xueⁿ'eⁿ cwii tjo̱o̱cheⁿ na nndeiiñe María jom.
22. Jnda̱ teinom wen'aaⁿ xuee na seincuii María, tue'ntyjo̱ xjeⁿ na nntjei'ljuu'ndyena cha'xjeⁿ na matsa̱'ntjom ljeii na tqueⁿ Moisés. Quia jo' ty'ena Jerusalén, ty'eñ'omna Jesús na nlqueⁿna juu l'o̱ Ta Ty'o̱o̱ts'om.
23. Ee luaa tso ljeii ‘naaⁿ'aⁿ: “Ticwii cwii tyochjoo na nluiiñejndyee, queⁿ tsotyeeⁿ, tsoñeeⁿ jom cwentaa' Ta Ty'o̱o̱ts'om.”
24. Jo' chii ty'ena na nñe'quiana quioo' cwentaa' Ty'o̱o̱ts'om. Quioo'ñeeⁿ nla'cwjee ntyee cha'xjeⁿ na t'maⁿ ljeii ‘naaⁿ'aⁿ. Tsona': nñequiana cwii ljo xencoo oo we cantu' ndyua.
25. Tyom'aaⁿ cwii tsaⁿs'a na jndyu Simeón tsjoom Jerusalén. Tsaⁿ'ñeeⁿ tyom'aaⁿ cantyja na maty'iomyana' ndo' jeeⁿ xcwee' ts'oom ñ'eⁿ Ty'o̱o̱ts'om. Ñequio na ntyjaa' ts'oom tyomeinom'm na nnty'iaaⁿ'aⁿ nquii na nntseinjoom' n'om nn'aⁿ Israel. Ndo' tyom'aaⁿ Espíritu Santo ñ'eⁿñê.
26. Jnda̱ t'mo̱ⁿ Espíritu Santo nnoom na xocueeⁿ'eⁿ cwitjo̱o̱cheⁿ na nnty'iaaⁿ'aⁿ nquii Cristo na tqueⁿ Ta Ty'o̱o̱ts'om na nndYo.
27. S'aa Espíritu Santo naquii' ts'oom na nncjaⁿ wats'om t'maⁿ. Ndo' maxjeⁿ'ñeeⁿ nn'aⁿ na nda yu'ndaa Jesús ty'eñ'omna juu jo' jo' na nluii ñ'eⁿñê cha'xjeⁿ waa costumbre na matsa̱'ntjom ljeii na tqueⁿ Moisés.
28. Quia jo' to'ñom Simeón yu'ndaa, tei'caljoom juu l'o̱o̱ⁿ. Tyolcweeⁿ'eⁿ Ty'o̱o̱ts'om. Tsoom:
29. Ta, juu ñ'oom na jnda̱ tsu' no̱o̱ⁿ, jnda̱ seicanda̱a̱'ñena'. Je' ja na cwiluiindyo̱ moso ‘naⁿ', quiaa' na nnc'io̱to̱ na meiⁿcwii ñomtiuu tic'o̱o̱ⁿya.
30. Ee na jnda̱ mamanty'iano̱o̱ⁿ nquii na nncwji'n'maaⁿñe nn'aⁿ.
31. Majuu na jnda̱ tqueⁿ' jo nda̱a̱ cha'tsondye nn'aⁿ.
32. Juu cwiluiiñe naxuee na m'mo̱ⁿ ñ'oom na mayuu' nda̱a̱ nn'aⁿ na nchii judíos. Ndo' cha'tsondye nn'aⁿ ‘naⁿ', nn'aⁿ Israel, nnts'aaⁿ na nluiit'maⁿndyena cantyja ‘naaⁿ'aⁿ.
33. José ñequio tsondyee Jesús jeeⁿ tjawee' n'omna cha'tso ñ'oom na seineiⁿ Simeón cantyja ‘naaⁿ' Jesús.
34. Ndo' Simeón seit'maaⁿ'ñê joona, tsoom nnom María, tsondyee Jesús:—Queⁿ' cwenta, yu'ndaam'aaⁿ, maqueⁿ Ty'o̱o̱ts'om jom na nt'om nn'aⁿ Israel nntsuundyena nc'e na ticala'yu'na ñ'eⁿñê. Ndo' nt'om nn'aⁿ Israel nlui'n'maaⁿndyena nc'e na nla'yu'na ñ'eⁿñê. M'mo̱o̱ⁿ chiuu waa na maty'iomyana' na cal'a nn'aⁿ. Sa̱a̱ ñ'eeⁿ' nn'aⁿ nntio'ñ'oomna jom.
35. Ndo' na luaa' nl'ana, nntseicano̱o̱ⁿna' ñ'omtiuu ‘naaⁿna. Ndo' ‘u je', quia na nnty'ia' na ljo', nntsei'ndaa'na' ntyji' cha'cwijom na nncwicandi' espada ‘u.
36. Ndo' jo' jo' tyom'aaⁿ cwii yuscu na jndyu Ana, jom cwiluiiñê ts'aⁿ na tyoñequiaa ñ'oom' Ty'o̱o̱ts'om. Tsaⁿ'ñeeⁿ jnda Fanuel, tsaⁿ na cwiluiiñe tsjaaⁿ na jndyowicantyjoo' Aser. Xjeⁿ na scundyua jom tocoom, t'oom ñequio saaⁿ'aⁿ ntquiee' chu,
37. jnda̱ chii ljoñê na tue' saaⁿ'aⁿ. Ndo' jnda̱ tquieñê, jnda̱ ñequieen'aaⁿ nchoo' ñequiee choom'm. Ndo' tîcalueeⁿ'eⁿ naquii' wats'om t'maⁿ. Tyondi'ntjoom nnom Ty'o̱o̱ts'om naxuee ndo' natsjom. Tyotseicwejndo'ñê ndo' tyotseineiiⁿ nnom Ty'o̱o̱ts'om.
38. Majuu xjeⁿ'ñeeⁿ na matseineiⁿ Simeón, seicandyoo'ñe Ana nacañoomna. Tquiaaⁿ na quianl'uaa' Ty'o̱o̱ts'om cantyja ‘naaⁿ' yu'ndaa Jesús. Jnda̱ chii tyotseineiiⁿ cantyja ‘naaⁿ' juu nda̱a̱ cha'tsondye nn'aⁿ Jerusalén ñequio nn'aⁿ nt'omcheⁿ njoom na cwimeindoo' na nndyaandye na cwilaxmaⁿ jnaⁿ. Ty'elcwee'na tsjoom Nazaret
39. José ñ'eⁿ María quia na jnda̱ jla'canda̱a̱'ndyena cha'tsoti na matso ljeii na tqueⁿ Ty'o̱o̱ts'om, ty'elcwee'na tsjoomna Nazaret, ts'o̱ndaa Galilea.
40. Tjawijndeii tyochjoo'ñeeⁿ, tjawitquioo' na wando' ts'oom ndo' canda̱a̱'ya tjawijndo̱' ts'oom. Ndo' t'maⁿ waa na matseixmaaⁿ naya ‘naaⁿ' Ty'o̱o̱ts'om. Ljoo'ñe tyochjoo Jesús wats'om t'maⁿ
41. Ticwii chu tyocaa José ñ'eⁿ María Jerusalén quia cwiwee' xuee pascua.
42. Ndo' quia na jnda̱a̱' canchoo'we chuu' Jesús, ty'ewana ñ'eⁿñê Jerusalén cha'xjeⁿ waa costumbre na qui'oona xuee pascua'ñeeⁿ.
43. Jnda̱ teinom xuee, José ñequio tsondyee Jesús macwi'oolcwee'na. Sa̱a̱ tiqueⁿna cwenta na ljoo'ñe tyochjoo Jesús Jerusalén.
44. Jla'tiuuna na ñ'eeⁿ quii'ntaaⁿ nn'aⁿ na macwi'oolcwee' na ty'e xuee. Meiiⁿchaa' xuee tyocañjomndyena nato. Jnda̱ chii to̱'na, tyol'ueena jom quii'ntaaⁿ nn'aaⁿna ñequio nn'aⁿ na ta'jnaaⁿ'na.
45. Sa̱a̱ na tîcaliuna jom, jo' chii ty'elcwee'nnda'na Jerusalén, na cwil'ueena jom.
46. Xuee na jnda̱ ndyee, ndo' jliuna jom naquii' wats'om t'maⁿ. Wacatyeeⁿ quii'ntaaⁿ nn'aⁿ na jndo̱' n'om na cwit'mo̱o̱ⁿ ñ'oom na tqueⁿ Moisés. Maqueeⁿ cwenta ñ'oom na cwila'neiⁿ naⁿ'ñeeⁿ ndo' mawax'eeⁿ nda̱a̱na.
47. Cha'tsondyena na tyondyena ñ'oom na tyotseineiiⁿ, jeeⁿ tyojaawee' n'omna na cjee matsei'no̱o̱ⁿ'o̱ⁿ ndo' majo'ndyo ñ'oom matseilcweeⁿ'eⁿ nda̱a̱na.
48. Ndo' nn'aⁿ na nda jom quia na nty'iaana, jeeⁿ seiñ'eeⁿ'na' joona. Tso tsoñeeⁿ nnoom:—'U jndaaya, ¿chiuu na luaa' sa'? Ja ñ'eⁿ tsotye' ñequio na chjoo' n'o̱o̱ⁿyâ cwil'ua̱a̱yâ ‘u.
49. Quia jo' tsoom nda̱a̱na:—¿Chiuu waa na cwil'ue'yo' ja? ¿Aa ticaliu'yo' na tseixmaⁿya na c'o̱o̱ⁿya naquii' waa' Tsotya̱?
50. Sa̱a̱ tîcala'no̱ⁿ'na ñ'oom na seilcweeⁿ'eⁿ nda̱a̱na.
51. Quia jo' tjalcweeⁿ'eⁿ ñ'eⁿndyena tsjoom Nazaret. Ndo' tyom'aaⁿñê na ndyaañê nda̱a̱na. Jeeⁿ tyocañjom ts'om tsoñeeⁿ cha'tso na tuii.
52. Jesús tjawijndo̱'ti ts'oom ndo' tjawijndeiityeeⁿ. Tjawee' ts'om Ty'o̱o̱ts'om ñ'eⁿñê ndo' mati nn'aⁿ.