1. Cwii ndii' tyom'aaⁿ Jesús ‘ndyoo ndaaluee chjoo na jndyu Genesaret. Jeeⁿ tyonchjena' jom na jla'canto'ndye nn'aⁿ nacañom'm cha nnda̱a̱ nndyena ñ'oom' Ty'o̱o̱ts'om.
2. Nty'iaaⁿ'aⁿ we w'aandaa ‘ndyoo ndaaluee'ñeeⁿ. Sa̱a̱ nn'aⁿ na cwitjeii' calcaa jnda̱ jlui'na jo' jo'. Macwitmaaⁿna nlqui' ‘naaⁿna.
3. Quia jo' tjacuo̱o̱ⁿ ts'om cwii w'aandaa'ñeeⁿ. W'aandaa ‘naaⁿ' Simón jo'. Tcaaⁿ na cjaañ'oomti tsaⁿ'ñeeⁿ juuna' chjoowi' cha n'ndiina' tyuaatcwii. Ndo' tjacjom. Tquiaaⁿ ñ'oom nda̱a̱ nn'aⁿ xjeⁿ na wacatyeeⁿcheⁿ ts'om w'aandaa.
4. Quia na jnda̱ jnda̱ seineiiⁿ, tsoom nnom Simón:—Catsaañ'om'yo' w'aandaawaa, wjaawjaatya̱a̱ya yuu na njoomti. Ndo' catue'yo' nlqui' ‘naⁿ'yo' na nntjei'yo' calcaa.
5. T'o̱ Simón nnoom:—Ta, meiiⁿchaa' tsjom ñel'aayâ ts'iaaⁿ ndo' meiⁿcwii catscaa tîcatjeii'â. Sa̱a̱ cantyja ñ'oom ‘ndyo' ‘u nncju'nnda'a tsqui'.
6. Jnda̱ na l'ana na ljo', jeeⁿ jndye calcaa ty'oomna' ts'om tsqui' ‘naaⁿna hasta ñe'caty'ioo'na'.
7. Jo' chii s'o̱o̱ lueena nda̱a̱ nt'omcheⁿ nc'iaana na ñjomndye cwiicheⁿ w'aandaa na quiotei'jndeii naⁿ'ñeeⁿ joona. Tquio naⁿ'ñeeⁿ. Ndo' jla'catoo'na we w'aandaa ñ'eⁿ calcaa, hasta ncuencue na c'u'na' joona'.
8. Quia jnda̱ nty'iaa' Simón Pedro na luaa', tcoom'm xtyeeⁿ jo nnom Jesús. Tsoom:—Ta, ticaty'iomyana' na nñ'eⁿ' ñ'eⁿndyo̱, ee ja ts'aⁿjnaⁿ.
9. Ee jeeⁿ ndya' seicaty'uena' jom ñequio nt'omcheⁿ nc'iaaⁿ'aⁿ na ñ'eeⁿ ñ'eⁿñê cantyja ‘naaⁿ calcaa na tjeii'na.
10. Majo'ti tjom Jacobo ñequio Juan, ntseinda Zebedeo. Joona mañecwii t'maⁿ ts'iaaⁿ cwil'ana ñequio Simón. Quia jo' tso Jesús nnom Simón:—Tinty'ue', je' mamanaⁿtona' na nn'aⁿ nntseitjom' na nla'jomndyena ñ'eⁿndyo̱, tachii cwe' calcaa.
11. Jnda̱ na tquiena tyuaatcwii ñ'eⁿ l'aandaa, mana ‘ndyena ts'iaaⁿ ‘naaⁿna. Ty'elajomndyena ñ'eⁿ Jesús. Sein'maⁿ Jesús ts'aⁿ na chuu tycu lepra
12. Quia na tyom'aaⁿ Jesús cwii tsjoom, tyjee'cañoom cwii tsaⁿs'a na cha'waañe chuu tycu lepra. Quia na nty'iaaⁿ'aⁿ Jesús, tjacwanquioom nomtyuaa, s'aaⁿ ty'oo, tsoom:—Ta, ntyjii na ‘u nnda̱a̱ nntsein'maⁿ' ja, xeⁿ l'ue ts'om'.
13. Quia jo' Jesús seintyjo̱o̱ⁿ ts'o̱o̱ⁿ tyeⁿnquioom'm tsaⁿ'ñeeⁿ. Tsoom nnom:—Maxjeⁿ l'ue ts'o̱o̱ⁿ na can'maⁿ'.Ndo' mantyjacheⁿ n'maⁿ tsaⁿ'ñeeⁿ.
14. Jnda̱ chii tsoom nnom:—Tintseineiⁿ' nnom meiⁿcwii ts'aⁿ na luaa' tuii. Sa̱a̱ cja', catseica'mo̱ⁿndyu' nnom tyee ndo' quiaa' quioo' na nncue' cantyja na jnda̱ n'maⁿ' cha'xjeⁿ na sa̱'ntjom Moisés. Na nntsa' na luaa' nlui'yuu'na' nda̱a̱ nn'aⁿ na jnda̱ n'maⁿ'.
15. Sa̱a̱ tjanty'eeti ñ'oom cantyja ‘naaⁿ' Jesús. Ndo' jndyendye nn'aⁿ tyo'oontyjaa' na nndye ñ'oom na tyoñequiaaⁿ. Mati ñe'can'maaⁿna ntycu na wiina.
16. Sa̱a̱ jom teiño̱o̱ⁿ, tjaaⁿ jo yuu na ñenqueⁿ. Jo' jo' tyotseineiiⁿ nnom Ty'o̱o̱ts'om. Sein'maⁿ Jesús ts'aⁿ na ntjeiⁿ nc'ee
17. Cwii xuee'ñeeⁿ ma'mo̱ⁿ Jesús nda̱a̱ nn'aⁿ. Jo' jo' meindyuaandye nt'om nn'aⁿ fariseos ñequio nn'aⁿ na cwit'mo̱o̱ⁿ ljeii na tqueⁿ Moisés. Naⁿ'ñeeⁿ jnaⁿna cha'tso njoom nch'u ts'o̱ndaa Galilea ñequio Judea ndo' mati tsjoom Jerusalén. Ndo' juu najndeii na matseixmaⁿ Ty'o̱o̱ts'om m'aaⁿna' ñ'eⁿ Jesús na matsein'maaⁿ nn'aⁿwii.
18. Mañejuu xjeⁿ'ñeeⁿ tquie'cañom nt'om naⁿnom na chona tsuee na ndii' ts'aⁿ na jnda̱ teintjeiⁿ nc'ee na tei'caljoo tycutqueeⁿ. Tyol'uee'ndyena chiuu ya na nnc'ooñ'omna tsaⁿ'ñeeⁿ naquii' w'aa na nlqueⁿna jom jo nnom Jesús.
19. Sa̱a̱ tîcaliuna chiuu ya nl'ana ee na jeeⁿ jndye nn'aⁿ. Jo' chii ty'ewana nacjoo' w'aa, tjo̱o̱na nquioo, jla'c'o̱ⁿna jom na njoom tsuee. Tqueⁿna jom quii'ntaaⁿ nn'aⁿ jo nnom Jesús.
20. Quia na nty'iaa' Jesús na cwila'yu'ya n'om naⁿ'ñeeⁿ, tsoom:—'U re, matseit'maⁿ ts'o̱o̱ⁿya jnaⁿ' na matseixmaⁿ'.
21. Quia jo' nn'aⁿ na cwit'mo̱o̱ⁿ ljeii na tqueⁿ Moisés ñequio nn'aⁿ fariseos to̱'na na tiya nquiuna ñ'eⁿñê. Tyola'tiuuna naquii' n'omna: “¿'Ñeeⁿ cwiluiiñe tsaⁿm'aaⁿ' na ti'maaⁿ' ts'oom na matseineiⁿ ñ'oom na wjaana' nacjoo' Ty'o̱o̱ts'om?”
22. Sei'no̱ⁿ' Jesús ñ'omtiuu ‘naaⁿna. Tsoom nda̱a̱na:—¿Chiuu na ticuaaya nquiu'yo' ñ'eⁿndyo̱?
23. ¿Cwaaⁿ ñ'oom na tijndei'tina' na catsjo̱o̱ya? ¿Aa na nntsjo̱o̱: “Matseit'maⁿ ts'o̱o̱ⁿya cha'tso jnaⁿ'”, oo aa na nntsjo̱o̱: “Quicantyja', cja'ca'”?
24. Sa̱a̱ cha caliu'yo' na cwiluiindyo̱ tsaⁿ na jnaⁿ cañoom'luee ndo' na waa najndeii na matseixmaⁿya nnom tsjoomnancuewaa na catseit'maⁿ ts'o̱o̱ⁿya jnaaⁿ nn'aⁿ, quia jo' tsoom nnom ts'aⁿ na ntjeiⁿ nc'ee:—'U re, matsjo̱o̱ya njom', quicantyja', catseilcwiindyu' tsue' cja'to' wa'.
25. Mañoom' teicantyja tsaⁿ'ñeeⁿ na jndoo' cha'tso nn'aⁿ. Seilcwiiñê tsuee ‘naaⁿ'aⁿ na ñetuaaⁿ. Mana tjaaⁿ waⁿ'aⁿ. Jeeⁿ matseit'maaⁿ'ñê Ty'o̱o̱ts'om.
26. Ndo' tyueneiiⁿ cha'tsondye nn'aⁿ. Tyola't'maaⁿ'ndyena Ty'o̱o̱ts'om. Jluena ñequio na tyueneiiⁿna:—Xuee je' nty'iaa nda̱a̱ya cwii na jeeⁿ t'maⁿ, na meiⁿjom tiquinty'iaaya. Ma'maⁿ Jesús Leví
27. Jnda̱ tuii na luaa', jlui' Jesús jo' jo'. Ljeiiⁿ cwii tsaⁿco'ñom s'om na jndyu Leví. Wacatyeeⁿ tsaⁿ'ñeeⁿ w'aa yuu na cwi'oocatioom nn'aⁿ s'om ts'iaaⁿnda̱a̱na cwentaa' gobiernom. Quia jo' tsoom nnom tsaⁿ'ñeeⁿ:—Candyo'ntyjo̱' naxa̱ⁿ'a.
28. Mantyja teicantyja Leví, tjei'ñê cantyja ‘naaⁿ' ts'iaaⁿ'ñeeⁿ, chii tjatseijomñê ñ'eⁿ Jesús.
29. Ndo' seiñ'oom'ñê cwii nantquie t'maⁿ waⁿ'aⁿ cwentaa' Jesús. Seitjoom jndye nc'iaaⁿ'aⁿ na ñequio ñeto'ñoom s'om ts'iaaⁿnda̱a̱ nn'aⁿ cwentaa' gobiernom. Teindyuaandyena nacañoom' meiⁿsa ñ'eⁿñê ndo' ñ'eⁿ Jesús ñequio nt'omcheⁿ nn'aⁿ.
30. Ndo' nn'aⁿ fariseos ñequio nn'aⁿ na cwit'mo̱o̱ⁿ ljeii na tqueⁿ Moisés tyola'ncjoo'ndyena nacjoo nn'aⁿ na cwila'jomndye ñ'eⁿ Jesús. Jluena nda̱a̱ naⁿ'ñeeⁿ:—¿Chiuu na cwicwa'yo' ndo' cwiwe'yo' ñequio nn'aⁿ na cwito'ñoom s'om cwentaa' gobiernom, ndo' ñequio nn'aⁿ na cwila'tjo̱o̱ndyena nnom Ty'o̱o̱ts'om?
31. T'o̱ Jesús nda̱a̱na, tsoom:—Nn'aⁿ na tiwii titjo̱o̱ndyena ts'aⁿ na mach'ee nasei, sa̱a̱ nn'aⁿ na wii tjo̱o̱ndyena jom.
32. Ja nchii jndyo̱o̱ya na nncwaⁿya nn'aⁿ na cwila'jomndye cantyja na maty'iomyana'. Ja jndyo̱o̱ya na nncwaⁿya nn'aⁿjnaⁿ na calcwe' n'omna. Cantyja ‘naaⁿ' na nntseicwejndo'ñe ts'aⁿ
33. Quia jo' tyoluena nnom Jesús:—Nn'aⁿ na cwila'jomndye ñ'eⁿ Juan, jndye ndii' cwila'cwejndo'ndyena ndo' cwila'neiⁿna nnom Ty'o̱o̱ts'om. Ndo' majo'ti cwil'a nn'aⁿ tmaaⁿ' fariseos. Sa̱a̱ joo nn'aⁿ na cwila'jomndye ñ'eⁿndyu' cwicwa'na ndo' cwiwena. ¿Chiuu na luaa' cwil'ana?
34. T'o̱o̱ⁿ nda̱a̱na:—¿Aa ndya' nndu'yo' nda̱a̱ nn'aⁿ na tquiola'jomndyena na macoco ts'aⁿ na cala'cwejndo'ndyena yocheⁿ na ndicwaⁿ m'aaⁿ nquii tsaⁿs'a na macoco quii'ntaaⁿna?
35. Sa̱a̱ nncue'ntyjo̱ xuee na nncwji'na' jom quii'ntaaⁿna, ncuee'ñeeⁿ nla'cwejndo'ndyena.
36. Mati seineiiⁿ nda̱a̱na ñ'oom na wjaañoom' cantyja ‘naaⁿ' ñ'oom xco na ma'mo̱o̱ⁿ nda̱a̱na. Tsoom:—Tjaa'naⁿ ‘ñeeⁿ nntyjee cwii taⁿ' liaa', liaa xco na nntseiyo̱ liaa ntsaa ñ'eⁿ juuna'. Ee xeⁿ luaa' nnts'aa ts'aⁿ, nntsei'naaⁿ'aⁿ liaaⁿ'aⁿ liaa xco'ñeeⁿ ndo' nchii macanda̱ jo', mati tixocatseix'iaa'ñena' ñequio liaa ntsaa'ñeeⁿ.
37. Meiⁿ tjaa ‘ñeeⁿ juu nntiom winom xco n'om ntjaⁿ teindyo. Ee xeⁿ na ljo' nnts'aa ts'aⁿ, nnty'ioo'na' nl'a winom xco'ñeeⁿ, mana cwiwi'ndaa' winom ndo' mati ntjaⁿ'ñeeⁿ.
38. Jo' chii macaⁿna' na nnc'oocue winom xco n'om ntjaⁿ xco cha meiⁿ ntjaⁿ xco'ñeeⁿ ticwi'ndaa'na' ndo' meiⁿ winom.
39. Ee ts'aⁿ na ma'uu winom tquie, meiⁿchjoo tica'naⁿ ntyjii winomxco. Ee matsoom na joo winom tquie, jo' ca'naⁿti.