1. Xjeⁿ na jaacalui' Jesús na waa wats'om t'maⁿ seineiⁿ cwii ts'aⁿ na matseijomñe ñ'eⁿñê, tso nnoom:—Maestro, canty'ia', jeeⁿ tjacanjoom' ts'iaaⁿ na tuii ñ'eⁿ ljo̱'meiⁿ' ndo' jeeⁿ neiⁿncoo' l'aameiⁿ'.
2. Tsoom nnom tsaⁿ'ñeeⁿ:—Mayuu' na jeeⁿ neiⁿncoo' l'aa na manty'ia'. Sa̱a̱ queⁿ' cwenta, ljo̱'meiⁿ' xocaljoo'tyeⁿna' nacjoo nc'iaana'. Maxjeⁿ nntyuii'ñ'eⁿna'. ‘Naaⁿ na cwit'mo̱o̱ⁿna' na manndyoo' na nntycwii
3. Ty'ena ta na jndyu Olivos ndyeyu yuu na meintyjee' wats'om t'maⁿ. Jo' jo' tjacjoo Jesús. Ndo' Pedro ñ'eⁿ Jacobo, ñ'eⁿ Juan ñ'eⁿ Andrés ty'entyjaa'na jom cha nnda̱a̱ nla'neiⁿna ñ'eⁿñê na ñenquieena. Ta'x'eena nnoom, jluena:
4. —Catsu' nda̱a̱yâ, ¿cwaaⁿ nncue'ntyjo̱ na nluii nmeiⁿ'? Ndo' ¿cwaaⁿ ‘naaⁿ m'mo̱ⁿna' na manndyoo' nluii nmeiⁿ'?
5. Quia jo' to̱' Jesús tyotseineiiⁿ nda̱a̱na:—Cal'a'yo' cwenta na meiⁿcwii ts'aⁿ tinquiu'nn'aⁿ ‘o cantyja ‘naaⁿ' ñ'oommeiⁿ'.
6. Ee nleitquioo'ndye nn'aⁿ cwii cwii ntyja na nla'cajndyundyena xueya ee nluena na joona cwiluiindyena Cristo. Ndo' jndye nn'aⁿ nñe'quio'nn'aⁿna na ljo' nl'ana.
7. 'Nnty'ia'yo' na nndyocwje'cañoom ntia' ndo' nleic'uaa ñ'oom na cwiluii ntia' cwiicheⁿ ntyja, sa̱a̱ tiñe'quiandyo' na nlacatyuendyo', ee maxjeⁿ jndei'na' na nmeiⁿ' nncwinomjndyee. Sa̱a̱ tyoowe'ntyjo̱ xjeⁿ na nntycwiiñ'eⁿ.
8. Nla'wendye nn'aⁿ cwii ndyuaa nacjoo nn'aⁿ cwiicheⁿ ndyuaa. Ndo' cwii tsaⁿmaⁿts'iaaⁿ t'maⁿ nntseiweñe nacjoo' cwiicheⁿ tsaⁿmaⁿts'iaaⁿ. Jndye joo nnts'eii ndo' nnc'oom jndo' t'maⁿ ndo' t'maⁿ nntseiñ'eeⁿ'na' nn'aⁿ. Sa̱a̱ cha'tso nawi'meiⁿ' cwe' we'yandyo la'xmaⁿna'. Quia nnquioo nt'omcheⁿ nawi' na jaa'ti.
9. 'Sa̱a̱ ‘o c'om'c'eendyo', ee m'aⁿ nn'aⁿ na nñe'quia cwenta ‘o luee nn'aⁿ na cwiluiitquiendye naquii' lan'om ndo' joona nntsa̱'ntjomna na catjaa' nn'aⁿ ‘o naquii' lan'om. Mati nl'a nn'aⁿ na jndei'na' nncwintyje'jnaⁿ'yo' jo nda̱a̱ gobiernom ñequio jo nda̱a̱ nt'omcheⁿ nn'aⁿ na cwitsa̱'ntjom nc'e na laxmaⁿ'yo' cantyja ‘naⁿya. Ndo' na luaa' nntjom'yo', nñequiaana' na ‘o nntjei'yuu'ndyo' ñ'oom naya ‘naⁿya nda̱a̱ naⁿ'ñeeⁿ.
10. Ee cwii tjo̱o̱cheⁿ na nntsuu tsjoomnancue nñe'quia nn'aⁿ ñ'oom cantyja na macwji'n'maaⁿñe Ty'o̱o̱ts'om nn'aⁿ na cha'waa tsjoomnancue.
11. Ndo' quia na nnt'uena ‘o na nñe'quiana cwenta ‘o, tinc'om'yo' ñomtiuu cwaaⁿ ñ'oom na nndu'yo' nda̱a̱ naⁿman'iaaⁿ. Ee xjeⁿ'ñeeⁿ m'mo̱ⁿ Ty'o̱o̱ts'om cwaaⁿ ñ'oom na nnt'o̱'yo'. Ee nchii nlaneiⁿ'yo' ñ'oom na nquiu' ncjo'yo' sa̱a̱ nquii Espíritu Santo nnts'aaⁿ naquii' n'om'yo' ljo' ñ'oom na nndu'yo'.
12. Maxio ts'aⁿ nñequiaa cwenta jom na cueeⁿ'eⁿ. Ndo' majo'ti nnts'aa ts'aⁿ ñ'eⁿ ntseinaaⁿ. Ndo' nda nn'aⁿ nla'wendyena nacjoo lotyena, londyeena, nl'ueendyena chiuu nncwje naⁿ'ñeeⁿ.
13. Ndo' cha'tsondye nn'aⁿ nla'jndoona ‘o nc'e na m'aⁿ'yo' cantyja ‘naⁿya. Sa̱a̱ juu ts'aⁿ na tyeⁿ cwiljoo'ñe ñ'eⁿndyo̱ hasta na macanda̱, tsaⁿ'ñeeⁿ nlui'n'maaⁿñê.
14. ''Ñeeⁿ juu ts'aⁿ na matsei'naaⁿ' ñ'oommeiiⁿ, catsei'no̱ⁿ' ljo' ñecatsona'. Juu profeta Daniel, seiljeiⁿ ñ'oom cantyja ‘naaⁿ' tsaⁿ na jeeⁿcheⁿ ndya' tiaa' na nntseityuii' cha'tso. Quia na nnty'ia'yo' na jnda̱ mameintyjeeⁿ'eⁿ naquii' wats'om t'maⁿ yuu na meiⁿchjoo ticatsa̱'ntjomna' na nnc'oom, quia jo' ‘o na m'aⁿ'yo' ts'o̱ndaa Judea catsaalei'nom'yo' quii' ntsjo̱.
15. Ndo' majuu xjeⁿ'ñeeⁿ, ts'aⁿ na ljo nacjoo' waa' yuu na su, ticandyocueeⁿ na nncjaaqueⁿ'eⁿ na nncwjeeⁿ'eⁿ ‘naaⁿ'aⁿ. Catseityuaaⁿ'aⁿ, calei'noom.
16. Ndo' ts'aⁿ na m'aaⁿ jo jnda̱a̱ na mach'ee ts'iaaⁿ tyuaa', ticjaalcweeⁿ'eⁿ na nncjaacachoom liaⁿ'aⁿ.
17. Juu xjeⁿ'ñeeⁿ jeeⁿ wi' nntjoom yolcu na ndeiindye ñequio joo yolcu na ‘ndaandye nda.
18. Cataⁿ'yo' nnom Ty'o̱o̱ts'om na nchii xcwe ncuee na teiⁿ na nlcaⁿna' na calei'nom'yo' nawi'ñeeⁿ.
19. Ee quia ljo'cheⁿ nnquioo cwii nawi' na t'maⁿticheⁿ na meiⁿjom ndii' tyootjoom nn'aⁿ cantyjati na tqueⁿ Ty'o̱o̱ts'om tsjoomnancue hasta je'. Ndo' xuee na cwiwjaatina' meiⁿ tajom cwinluiinnda' cwiicheⁿ nawi' cha'na juuna'.
20. Xeⁿ nchii nquii Ta Ty'o̱o̱ts'om tqueeⁿ na tijndyeti xuee nnc'oom nawi'ñeeⁿ, meiⁿcwii ts'aⁿ xocalui'n'maaⁿñe cantyja ‘naaⁿ'na'. Sa̱a̱ nc'e na wi' ts'oom joo nn'aⁿ na jnda̱ tjeii'ñê cwentaaⁿ'aⁿ, jo' chii nnts'aaⁿ na tijndyeti xuee nnc'oom nawi'ñeeⁿ.
21. 'Ndo' xeⁿ quia ljo' nntso cwii ts'aⁿ nda̱a̱'yo': “Canty'ia'yo', ljoo m'aaⁿ Cristo”, oo nntso: “Canty'ia'yo', laa'ñeⁿ m'aaⁿ”, ticalayu'yo'.
22. Ee maxjeⁿ nlquie'cañom profetas na tiyuu' ñ'oom cwiñequia ñequio nn'aⁿ na nlue na joona cwiluiindyena Cristo. Nl'ana jndye nnom ‘naaⁿ t'maⁿ ñequio ts'iaaⁿ t'maⁿ na nncjaawee' n'om nn'aⁿ hasta nquiee nn'aⁿ na macwji' Ty'o̱o̱ts'om cwentaaⁿ'aⁿ nñequio'nn'aⁿ ts'iaaⁿ'ñeeⁿ joona xeⁿ na nnda̱a̱ nl'ana. Sa̱a̱ Ty'o̱o̱ts'om tixonquiaaⁿ na nnda̱a̱ nl'ana.
23. Cha'tso nmeiⁿ' jnda̱ tsjo̱o̱ nda̱a̱'yo' cwii tjo̱o̱cheⁿ na nluii cha cal'a'yo' cwenta. Luaa nncuaa quia na nndyonnda' Jesús
24. 'Ncuee quia na jnda̱ teinom nawi' t'maⁿ'ñeeⁿ, quia jo' nleijaaⁿñe ñe'quioom', ndo' taxocwixueeñe chi'.
25. Nntquiaandye cancjuu. Ndo' cha'tso najnda̱ na matseixmaⁿ tsjo̱'luee nntyuii'.
26. Quia ljo'cheⁿ nnty'iaa nn'aⁿ ja na cwiluiindyo̱ tsaⁿ na jnaⁿ cañoom'luee na macwja̱caño̱o̱ⁿnnda'a tsjoomnancue. Nndyo̱o̱ naquii' nchquiu ñequio najndeii na matseixmaⁿya ndo' ñequio na neiⁿncoo' nacaxuee na matseit'maaⁿ'ñena' ja.
27. Njño̱o̱ⁿya ángeles ‘naⁿya na c'oona cwii cwii ntyjaa' tsjoomnancue ndo' mati ndiocheⁿ cañoom'luee na nla'tjomna nn'aⁿ na jnda̱ tjeii'ndyo̱ cwentaya.
28. 'Cala'no̱ⁿ'yo' ‘naaⁿ na ma'mo̱ⁿna' nda̱a̱'yo' cantyja ‘naaⁿ' ts'oom higuera. Quia na cwinty'ia'yo' na cwintei' l'o̱na' ndo' cwicandei' tsco'ndaa juuna', quia jo' cwila'no̱ⁿ'yo' na jaawindyoo' ncueesua'.
29. Majo'ti quia na cwinty'ia'yo' na cwiluii cha'tso nmeiⁿ' na jnda̱ tsjo̱o̱ nda̱a̱'yo', quia jo' cala'no̱ⁿ'yo' na jnda̱ teitsio̱o̱' m'aaⁿna'. Mawaa mawaa xjeⁿ nncwja̱caño̱o̱ⁿnnda'a.
30. Candye'yo' nntsjo̱o̱, mayuu'cheⁿ na xocwjeñ'eⁿ nn'aⁿ na m'aⁿ je' hasta xjeⁿ na jnda̱ seicanda̱a̱'ñena' cha'tso ñ'oommeiⁿ'.
31. Tsjo̱'luee ñ'eⁿ tsjoomnancue nntycwiiñ'eⁿna' sa̱a̱ ñ'oom ‘naⁿya maxjeⁿ nntseicanda̱a̱'ñena'.
32. 'Sa̱a̱ meiⁿcwii ts'aⁿ ticaljeii cwaaⁿ xuee ndo' ‘ñeeⁿ xjeⁿ na nluii cha'tso nmeiⁿ'. Meiⁿ ángeles na m'aⁿ cañoom'luee ticaliuna, meiⁿ ja na cwiluiindyo̱ Jnda Ty'o̱o̱ts'om ticaljeiiya cwaaⁿ. Macanda̱ ñenquiicheⁿ Tsotya̱ya ntyjeeⁿ.
33. 'Jo' chii c'om'c'eendyo' ndo' queⁿ'yo' cwenta. Ndo' calaneiⁿ'yo' nnom Ty'o̱o̱ts'om, ee ticaliu'yo' cwaaⁿ nncue'ntyjo̱ tiempo'ñeeⁿ.
34. Nmeiⁿ' matseijomna' cha'na mach'ee cwii ts'aⁿ na wjaa cwii ndyuaa na tquia. Cwii tjo̱o̱cheⁿ na nnaaⁿ waⁿ'aⁿ, nnty'ioom ts'iaaⁿ mosoom'm, cwii cwii nnom ts'iaaⁿ na cwii cwiindyena. Ndo' nntsa̱'ntjoom ts'aⁿ na mach'ee cwenta ‘ndyoots'a na ñe'quii'cheⁿ cats'aa cwenta.
35. Malaa'ti' matseijomna' ‘o ee na ticaliu'yo' ‘ñeeⁿ xjeⁿ na nncwjee' nquii na matsa̱'ntjom ‘o. ¿Aa nncwjeeⁿ'eⁿ natmaaⁿ, oo aa nateijaaⁿ? ¿Aa nncwjeeⁿ'eⁿ xcwe tsjom, oo aa na jaancoo? Jo' chii c'om'c'eendyo'.
36. Ee ticatsona' na mats'ia jo' nncwjeeⁿ'eⁿ ndo' nljeiiⁿ ‘o cha'cwijom na cwinda'yo'.
37. Ñ'oom na jnda̱ tsjo̱o̱ luaa' nda̱a̱'yo', juuna' matsjo̱o̱ nda̱a̱'yo' na cha'tsondyo', ñe'quii'cheⁿ c'om'c'eendyo'.