1. Jnda̱ na tjacue ñe'quioom' juu xuee na cwita'jndyee nn'aⁿ judíos, tja María Magdalena ñequio Salomé ñequio María, tsondyee Jacobo, ty'ela'jndana ncheⁿ' cachi na nnc'oocaty'oomndyena sei'ts'o ‘naaⁿ' Jesús.
2. Ndo' cwitsjoomya xuee najndyee smanaⁿ manlui'nom ñe'quioom', ty'ena yuu waa tsei'tsuaa' Jesús.
3. Nato ñjomndyena tyoluecheⁿnquieena nda̱a̱ ntyjeena:—¿'Ñeeⁿ ya nnteijndeii jaa na nnquindyo̱ tsjo̱' ‘ndyoo tsei'tsuaa?
4. Sa̱a̱ quia na jnda̱ tquiena jo', jleinty'iaana, jliuna cwa jnda̱ teindyo̱ tsjo̱'. Ndo' juuna' jeeⁿ t'maⁿna'.
5. Ndo' jnda̱ na ty'equie'na quii' tsei'tsuaa'ñeeⁿ, nty'iaana cha'cwijom cwii tsaⁿs'andyua wacatyeeⁿ ntyjaya. Cweⁿ cwii liaatco, liaa canchii'. Jeeⁿ ndya' nioom tyuena.
6. Tso tsaⁿ'ñeeⁿ nda̱a̱na:—Tintyue'yo'. ‘O cwil'ue'yo' Jesús na jnaⁿ Nazaret, jom na ty'ioom nn'aⁿ ts'oom'naaⁿ. Jnda̱ tando'xcoom na tueeⁿ'eⁿ. Tac'oomñê ñjaaⁿ. Canty'ia'yo' yuu na tqueⁿna jom.
7. Je' catsa'yo' na m'aaⁿ Pedro ñequio nt'omcheⁿ nn'aⁿ na cwila'jomndye ñ'eⁿ Jesús. Calacandii'yo' joona na nncjaajñeeⁿ Galilea, jnda̱nquia nnc'oontyjo̱na. Jo' jo' nleicwindyena ñ'eⁿñê cha'xjeⁿ jnda̱ tsoom nda̱a̱'yo'.
8. Quia jo' jlui'na naquii' tsei'tsuaa. Jndeii ty'elcwee'na ndo' cwiteindyena, ndoo' nquiuna na tanchii joona. Ndo' cwe' na jeeⁿ tyuena, jo' na seitsaⁿ'na' joona, meiⁿ tîcaluena nnom meiⁿcwii ts'aⁿ chiuu tuii. Teitquioo'ñe Jesús nnom María Magdalena
9. Mañejuuti cwitsjoom xuee najndyee smanaⁿ quia na jnda̱ tando'xco Jesús, najndyee teitquioo'ñê nnom María Magdalena, tsaⁿ na tjeiiⁿ'eⁿ ntquiee' jndyetia naquii' ts'om.
10. Ndo' María'ñeeⁿ tjatseicañeeⁿ nquiee nn'aⁿ na tyocañ'eeⁿ ñ'eⁿ Jesús. Xjeⁿ'ñeeⁿ jeeⁿ xcwe na m'aⁿna na chjoo' n'omna ndo' cwityueena.
11. Sa̱a̱ quia jndyena na Jesús jnda̱ mawa'ndo'xcoom, ndo' juu yuscu'ñeeⁿ jnda̱ nty'iaa'nnom jom, maxjeⁿ tîcala'yu'na. Teitquioo'ñe Jesús nda̱a̱ we nn'aⁿ na cwila'jomndye ñ'eⁿñê
12. Jnda̱nquia teitquioo'ñe Jesús nda̱a̱ we nn'aⁿ na cwila'jomndye ñ'eⁿñê na cwi'oo nato jnda̱a̱, s'aana' na cwiicheⁿ ljo waaⁿ.
13. Ndo' ty'elcwee' naⁿ'ñeeⁿ Jerusalén, ty'ela'candiina nc'iaana. Sa̱a̱ meiiⁿ ñ'omndyuee joona, tjaa ‘ñeeⁿ seiyu'. Majñom Jesús nn'aⁿ na c'oonquiana ñ'oom'm
14. Jnda̱ jo' teitquioo'ñê nda̱a̱ canchoo'cwii nn'aⁿ na cwila'jomndye ñ'eⁿñê yocheⁿ na cwimeindyuaandyena nacañoom' meiⁿsa na cwicwa'na. Nc'e na tiñe'cala'yu'ya n'omna, jo' na seitiaaⁿ'aⁿ joona na quie' n'omna. Ee tîcala'yu'na na jnda̱ wando'xcoom meiiⁿ na jla'candii nn'aⁿ na jnda̱ nty'iaanda̱a̱ jom.
15. Xjeⁿ'ñeeⁿ tsoom nda̱a̱na:—Catsa'yo' cha'waa tsjoomnancue, nñe'quia'yo' ñ'oom naya nda̱a̱ cha'tso nn'aⁿ na macwji'ñ'maaⁿñe Ty'o̱o̱ts'om joona.
16. Juu ts'aⁿ na nntseiyu' ndo' nleits'oomñe, nlui'n'maaⁿñe. Sa̱a̱ juu ts'aⁿ na ticatseiyu', maxjeⁿ nnt'uiityeⁿna' juu cantyja jnaaⁿ'.
17. Ndo' nn'aⁿ na cwila'yu' jndye ts'iaaⁿ t'maⁿ nl'ana. Ñequio xueya nntjeii'na jndyetia naquii' n'om nn'aⁿ, ndo' nla'neiⁿna nt'omcheⁿ nnom ñ'oom na tjachuii'.
18. Xeⁿ nnt'uena canduu ñequio lueena oo xeⁿ nncwena nasei wjee, tjaa'naⁿ ljo' nntjoomna. Ndo' quia na nntioona lueena nacjoo nn'aⁿwii, nn'maaⁿ naⁿ'ñeeⁿ. Tjawa Jesús cañoom'luee
19. Quia na jnda̱ teinom na seineiⁿ Ta Jesús nda̱a̱ nn'aⁿ na cwila'jomndye ñ'eⁿñê, tjañ'oomna' jom cañoom'luee. Tjacjom ntyjaa' ts'o̱ Ty'o̱o̱ts'om ntyjaya yuu na matseit'maaⁿ'ñena' jom.
20. Quia jo' jnaⁿ naⁿ'ñeeⁿ ty'ena, tyoñe'quiana ñ'oom naya nda̱a̱ nn'aⁿ meiⁿyuucheⁿ na ty'ena. Ndo' manquiiti Ta Jesús tyoteijneiⁿ joona. Tquiaaⁿ na tyocanda̱a̱ tyol'ana ts'iaaⁿ t'maⁿ na tjei'yuu'ndyena' na mayuu' ñ'oom na tyoñe'quiana. Amén.