1. Mati tso Jesús nda̱a̱na:—Mayuu'cheⁿ nndye'yo' nntsjo̱o̱, m'aⁿ nn'aⁿ ñjaaⁿ na xocwjena hasta xeⁿ jnda̱ nty'iaanda̱a̱na na matsa̱'ntjom Ty'o̱o̱ts'om ñequio cha'tso najnda̱ na matseixmaaⁿ. Seichuii'na' Jesús
2. Jnda̱ na teinom yom xuee, tjañ'oom Jesús Pedro ñ'eⁿ Jacobo ñ'eⁿ Juan. Ty'ena cwii sjo̱ nandye yuu na ñenquieena. Ndo' jo' jo' seichuii'na' jom jo nda̱a̱na.
3. S'aana' na caxuee liaⁿ'aⁿ, canchii'tina' cha'na tsaaⁿ. Meiⁿ tjaa'naⁿ cwii ts'aⁿ na nnda̱a̱ mmaⁿ cwii liaa na nleicanchii'ti juuna' cha'na liaⁿ'aⁿ.
4. Ndo' xjeⁿ'ñeeⁿ teitquioo'ñe Elías ñ'eⁿ Moisés na cwila'neiⁿna ñ'eⁿ Jesús.
5. Quia jo' tso Pedro nnom Jesús:—Jeeⁿ ndya' ya na m'aaⁿya ñjaaⁿ. Cwa, nl'aayâ ndyee xquie' ncwaⁿ'. Cwii cwenta' nncu', cwii cwentaa' Moisés, ndo' cwii cwentaa' Elías.
6. Ñ'oommeiⁿ' tsoyom cwe' nc'e na seiñ'eeⁿ'ñ'eⁿna' jom ee na jeeⁿ ndya' cwicatyuena.
7. Quia jo' jndyocue cwii nchquiu na seincwaaⁿ'ñena' nacjoona. Ndo' teic'uaa na seineiⁿ Ty'o̱o̱ts'om naquii' nchquiu'ñeeⁿ, tsoom:—Luaañe Jndaaya na jeeⁿ candya' ts'o̱o̱ⁿya. Candye'yo' ñ'oom na matseineiiⁿ.
8. Mats'iaa jo' quia jleity'iomnda̱a̱na, jliuna cwa tac'oomñe Elías ñ'eⁿ Moisés ñ'eⁿndyena. Macanda̱ ñenquii Jesús cwim'aaⁿ.
9. Yocheⁿ na cwinquiocuena sjo̱'ñeeⁿ, sa̱'ntjom Jesús na meiⁿcwii ñ'oom ticaluena nda̱a̱ nn'aⁿ chiuu waa na nty'iaana na seichuii'na' jom. Ñequii'cheⁿ na nla'neiⁿna ñ'oomwaa' quia jnda̱ mawando'xcoom xeⁿ jnda̱ jla'cuee' nn'aⁿ jom.
10. Ndo' tyola'wena ñ'oom'ñeeⁿ ñequio na jeeⁿ xcwee' n'omna. Tyota'x'eendye cheⁿnquieena nda̱a̱na ljo' ñecatso ñ'oom na tsoom na quia nncwando'xcoom na nncueeⁿ'eⁿ.
11. Quia jo' jluena nnoom:—Nquiee nn'aⁿ na cwit'mo̱o̱ⁿ ljeii na tqueⁿ Moisés cwilue macaⁿna' na Elías nndyojñeeⁿ.—¿Chiuu na luaa' cwilue naⁿ'ñeeⁿ?
12. Ndo' t'o̱ Jesús nda̱a̱na tsoom:—Mayuu' na ncwjee'jndyee Elías na nntseijndaa'ñê cha'tso. Sa̱a̱ ja na cwiluiindyo̱ ts'aⁿ na jnaⁿ cañoom'luee, ¿chiuu waa na matso ljeii ‘naaⁿ' Ty'o̱o̱ts'om cantyja ‘naⁿya? Matsona' na jndye nawi' catjo̱ⁿ ndo' nnc'om nn'aⁿ na ticuee' n'omna ja.
13. Sa̱a̱ matsjo̱o̱ nda̱a̱'yo' na nquii na cwiluiiñe Elías, jnda̱ tyjeeⁿ'eⁿ, ndo' tyol'a nn'aⁿ cha'xjeⁿ na l'ue n'omna ñ'eⁿñê ee luaa' matso ljeii ‘naaⁿ' Ty'o̱o̱ts'om na tseixmaaⁿ na catjoom. Sein'maⁿ Jesús cwii tyochjoo
14. Jnda̱ na tquiennda'na yuu ljoo'ndye nt'omcheⁿ nc'iaana, quia jo' nty'iaana na jnda̱ tquie'cañom cwii tmaaⁿ' nn'aⁿ na jndyendye nacañoom naⁿ'ñeeⁿ. Ñ'eeⁿ nn'aⁿ na cwit'mo̱o̱ⁿ ljeii na tqueⁿ Moisés, na cwila'ñ'eeⁿ' ndyueena ñ'eⁿ naⁿ'ñeeⁿ.
15. Ndo' nn'aⁿ tmaaⁿ'ñeeⁿ quia na nty'iaana jom, t'omna na jeeⁿ tjawee' n'omna. Jla'tyuaa'na, ty'ecatjomndyena jom. Tquiana na xmaⁿñê.
16. Quia jo' tax'eeⁿ nda̱a̱na, tsoom:—¿Ljo' ñ'oom na jeeⁿ cwilañ'eeⁿ' ndyuee'yo'?
17. Cwii ts'aⁿ na m'aaⁿ naquii' tmaaⁿ' naⁿ'ñeeⁿ, t'o̱o̱ⁿ. Tsoom:—Maestro, jndyo̱ñ'o̱ⁿya ti'jndaaya ñjaaⁿ, ee maleiñ'oom jndyetia jom ndo' mach'ee na tileicatseineiiⁿ.
18. Ndo' meiⁿyuucheⁿ na m'aaⁿñê quia jnda̱ jnaⁿna' maxjeⁿ matseiquioo jndyetia jom nomtyuaa. Cwilui' chom' ‘ñom, mati manqueeⁿ ndei'n'oom, ndo' cwileiquiiñê. Ma'ndiina' jom na tajneiⁿ. Ndo' jnda̱ s'aa ty'oo nda̱a̱ nn'aⁿ na cwila'jomndye ñ'eⁿndyu' na catjeii'na jndyetia'ñeeⁿ, sa̱a̱ tîcanda̱a̱ l'ana.
19. Quia jo' tso Jesús:—'O nn'aⁿ na ticala'yu'ya' n'om'yo' ñ'eⁿ Ty'o̱o̱ts'om, ¿cwanti yo macaⁿna' na cwii nljoo'ndyo̱ ñ'eⁿndyo' na m'mo̱o̱ⁿtya̱ nda̱a̱'yo'? ¿Cwanti xuee cwii nnda̱a̱ nntseiquii ts'o̱o̱ⁿya ñ'eⁿndyo'? Quio'ñ'om'yo' tyochjoom'aaⁿ' ñjaaⁿñe.
20. Quia jo' tquioñ'omna tyochjoo na m'aaⁿ Jesús. Ndo' quia nty'iaa' jndyetia Jesús, s'aana' na tyocoñoomñena' tyochjoo'ñeeⁿ. Tiooñê nomtyuaa, tyotseicantyeeⁿñê ndo' tyocalui' chom' ‘ñom.
21. Ta'x'ee Jesús nnom tsotye tyochjoo, tsoom:—¿Cwanti xuee na luaa' matjoom?T'o̱ tsotyeeⁿ, tso:—Xjeⁿ na cachjooñêcheⁿ jnaⁿna'.
22. Ndo' teijndye ndii' matseiquioona' jom quii' chom ndo' quii' ndaa, cha cueeⁿ'eⁿ. Jo' chii c'oom' na wi' ts'om' ñ'eⁿndyô̱ xeⁿ waa na nnda̱a̱ nntsa', cateijndei' jâ.
23. Tso Jesús nnom:—Matsu' xeⁿ nnda̱a̱ nts'aa. Cha'tso nnda̱a̱ nluii quia na matseiyu' ts'aⁿ ñ'eⁿ Ty'o̱o̱ts'om.
24. Quia jo' jndeii seineiⁿ tsotye tyochjoo, tso:—Ja matseiyu'a. Cateijndei' ja na nntseiyu'yatya̱.
25. Quia na nty'iaa' Jesús na ntyjantyja jaawijndyendye nn'aⁿ nacañom'm, quia jo' seitiaaⁿ'aⁿ jndyetia'ñeeⁿ, tsoom:—'U jndyetia na mache' na cantaa nn'aⁿ ndo' na tileicala'neiⁿna, matsa̱'ntjo̱ⁿ na calui' ndo' tajom nncja'quie'nnda' naquii' ts'om tyochjoom'aaⁿ'.
26. Quia jo' jndeii seixuaa jndyetia. S'aaⁿ na jeeⁿ tyoco'ñoomñena' tyochjoo, mana jlueeⁿ'eⁿ. ‘Ndiina' juu cha'cwijom ts'oo. Jo' chii majndyeti nn'aⁿ jluena na jnda̱ tue' tyochjoo.
27. Sa̱a̱ Jesús t'ueeⁿ ts'o̱ tyochjoo'ñeeⁿ, seiweeⁿ juu. Mañoom' teintyjee'.
28. Jnda̱ jo' tjaquiee' Jesús quii' w'aa. Tju'na' na ñenqueⁿ ñ'eⁿ nn'aⁿ na cwila'jomndye ñ'eⁿñê. Ndo' ta'x'eena ñ'oom'ñeeⁿ ‘ñom, jluena:—¿Chiuu waayuu na jâ tîcanda̱a̱ nntjeii'â jndyetiam'aaⁿ'?
29. Quia jo' tsoom nda̱a̱na:—Cha'na jndyetiam'aⁿ', tjaa'naⁿ ‘neeⁿ nnda̱a̱ nncwji' joona xeⁿ nchii na nntseineiⁿ ts'aⁿ nnom Ty'o̱o̱ts'om ndo' na nntseicwejndo'ñe. Matseicandiinnda' Jesús na nncueeⁿ'eⁿ
30. Jnda̱ na jlui' Jesús jo' jo' ñ'eⁿ nn'aⁿ na cwila'jomndye ñ'eⁿñê, ty'ena, teinomna ts'o̱ndaa Galilea. Sa̱a̱ tical'ue ts'oom na nliu nn'aⁿ na jo' wjaⁿ.
31. Ee ma'mo̱o̱ⁿ chiuu waa na nntjoom na cwiluiiñê ts'aⁿ na jnaⁿ cañoom'luee na nñequiaa ts'aⁿ cwenta jom luee nn'aⁿ ndo' nla'cuee' jom sa̱a̱ xeⁿ jnda̱ ndyee xuee na tueeⁿ'eⁿ maxjeⁿ nncwando'xcoom.
32. Sa̱a̱ joona ticala'no̱ⁿ'na ñ'oom na tsoom ndo' nquiaana na nnta'x'eena nnoom ljo' ñe'ca'mo̱ⁿna'. ¿'Ñeeⁿ na t'maⁿti cwiluiiñe?
33. Tquiena Capernaum. Ndo' quia na jnda̱ mam'aⁿna quii' w'aa, quia jo' tax'eeⁿ nda̱a̱na, tsoom:—¿Cwaaⁿ ñ'oom ñejla'ncjoo'ndyo' nda̱a̱ ntyjee'yo' xjeⁿ na ñetquio̱o̱ya nato?
34. Sa̱a̱ joona yacheⁿ jla'cheⁿna, ee mayuu' xjeⁿ na ñeñjomndyena nato tyola'ncjoo'ndyena ‘ñeeⁿ cwii joona t'maⁿti cwiluiiñe.
35. Jnda̱ na tjacjoo Jesús, tqueeⁿ'ñê canchoo'wendye joona na c'oontyjaa'tina. Tsoom nda̱a̱na:—'Ñeeⁿ juu ts'aⁿ na maqueⁿ ts'om na nlco'nnomna' juu jo nda̱a̱'yo', tsaⁿ'ñeeⁿ matsona' na cju'ñecjeeⁿ ndo' candi'ntjoom nda̱a̱ cha'tso nc'iaaⁿ'aⁿ.
36. Quia jo' t'ueeⁿ cwii tyochjoo, tcoom'm juu xcwe quii'ntaaⁿna. Jnda̱ chii ty'oom juu ndo' tsoom nda̱a̱na:
37. —Meiⁿcwi'ñeeⁿcheⁿ ts'aⁿ na maco'ñom cwii yucachjoo ñequio xueya cha'na yucachjoom'aaⁿ, ja maco'ñom tsaⁿ'ñeeⁿ. Ndo' ts'aⁿ na maco'ñom ja, nchii macanda̱ ñennco̱ maco'ñom. Mati maco'ñom nqueⁿ na jñoom ja. Ts'aⁿ na m'aaⁿ cantyja ‘naaⁿ' Jesús
38. Tso Juan nnom Jesús:—Maestro, nty'iaayâ cwii ts'aⁿ na macwji' jndyetia naquii' n'om nn'aⁿ ñequio xue'. Juu tsaⁿ'ñeeⁿ tyootseijomñê ñ'eⁿndyo̱ jaa. Jo' chii jla'tsaaⁿ'ndyô̱ jom.
39. Sa̱a̱ tso Jesús nda̱a̱na:—Tala'tsaaⁿ'ndyo' jom ee meiⁿcwi'ñeeⁿcheⁿ ts'aⁿ na mach'ee ts'iaaⁿ t'maⁿ ñequio xueya, xocats'aana' na nda̱nquia nntso cwii ñ'oom wi' nacjoya.
40. Ee ts'aⁿ na tic'oom nacjoya, cwiluiiñe ts'aⁿ na m'aaⁿ cantyja ‘naⁿya.
41. Ndo' meiⁿcwi'ñeeⁿcheⁿ ts'aⁿ na nñequiaa meiⁿ ñechjoowi' ndaatioo na nncwe'yo' nc'e na cwilaxmaⁿ'yo' cantyja ‘naⁿ nnco̱ na cwiluiindyo̱ Cristo, mayuu'cheⁿ waa naya ‘naaⁿ' tsaⁿ'ñeeⁿ. Qua̱a̱ⁿya cwenta na tical'aya natia
42. 'Meiⁿcwi'ñeeⁿcheⁿ ts'aⁿ na nts'aa na catseitjo̱o̱ñe cwii ts'aⁿ na cachjoo matseiyu' ñ'eⁿndyo̱, juu tsaⁿ'ñeeⁿ yati xeⁿ cwityeⁿ cwii tsjo̱'suu xtyoom'm, ndo' catuee' nn'aⁿ jom ts'om ndaaluee.
43. Xeⁿ na wjaañ'oomna' ‘u na matsei'tjo̱o̱ndyu' nnom Ty'o̱o̱ts'om jnaaⁿ' cwii ts'o̱', catsa' xjeⁿ juuna' cha'cwijom na catyjee' juuna' cha tintsei'tjo̱o̱ndyu'ti'. Ee yati nntseixmaⁿ' na ticantycwii na nncwando' meiiⁿ cha'cwijom na ticanda̱a̱' we ts'o̱' nchiiti na canda̱a̱'ndyu' ndo' nncju'na' ‘u quii' b'io yuu na tijoom canduu' chom.
44. Yuu tijoom cwje canti meiⁿ na nnduu' chom.
45. Ndo' xeⁿ wjaañ'oomna' ‘u na matsei'tjo̱o̱ndyu' nnom Ty'o̱o̱ts'om jnaaⁿ' cwii x'e', catsa' xjeⁿ cha'cwijom na catyjee' juuna' cha tintsei'tjo̱o̱ndyu'ti'. Ee yati nntseixmaⁿ' na ticantycwii na nncwando' meiiⁿ cha'cwijom ticanda̱a̱' we nc'e' nchiiti na canda̱a̱'ndyu' ndo' nncju'na' ‘u quii' b'io yuu na tijoom canduu' chom.
46. Ndo' tijoom cwje canti meiⁿ na nnduu' chom.
47. Ndo' xeⁿ cwe' cantyja na manty'ia' wjaañ'oomna' ‘u na matsei'tjo̱o̱ndyu' nnom Ty'o̱o̱ts'om, catsa' xjeⁿ cha'cwijom na cwji' ts'omnjom' cha tintsei'tjo̱o̱ndyu'ti'. Ee yati na nncja'quie' cantyja na matsa̱'ntjom Ty'o̱o̱ts'om meiiⁿ cha'cwijom na nchjaⁿ' nchiiti na canda̱a̱' we n'omnjom' ndo' nncju'na' ‘u quii' b'io
48. yuu na tijoom cwje canti ndo' meiⁿ na nnduu' chom.
49. ' Ee ticwii cwii ts'aⁿ nleichjeⁿ'ñê ñequio chom. Cwila'chjeⁿ' nn'aⁿ seii quioo' na cwiñe'quiana na cwila't'maaⁿ'ndyena Ty'o̱o̱ts'om.
50. Jeeⁿ l'ue tsjaaⁿ' sa̱a̱ xeⁿ jnda̱ jlui' na chjeⁿ'na', tjaa yuu cwii nl'ue juuna'. Jo' chii ‘o c'om'yo' cha'na tsjaaⁿ' na xocalui' na chjeⁿ'na' quia jo' ñenquii'cheⁿ nleil'uendyo' quii'ntaaⁿ nc'ia'yo' ndo' tjoom' ñ'oom nnc'om'yo' ñ'eⁿndyena.