1. Cwiicheⁿ cwii ndii' seineiⁿnnda' Jesús nda̱a̱ ntyee na cwiluiitquiendye ñequio nda̱a̱ nn'aⁿ fariseos. Tsoom nda̱a̱na:
2. —Juu na matsa̱'ntjom Ty'o̱o̱ts'om nandye cañoom'luee, matseijomna' juuna' cha'na cwii rey na t'maⁿ xuee s'aa na ncoco ti'jnda.
3. Jñoom mosoom'm na ‘ooca'maⁿna cha'tso nn'aⁿ na jnda̱ jndye na nnquiola'jomndye. Sa̱a̱ naⁿ'ñeeⁿ tiñe'quiontyjaa'na.
4. Jñomnnaaⁿ'aⁿ nt'omcheⁿ mosoom'm, tsoom nda̱a̱na: “Candu'yo' nda̱a̱ nn'aⁿ na jnda̱ t'maaⁿyâ na nla'jomndyena na jnda̱ maya waa. Jnda̱ seicwja̱ quioo'ndyo ñequio nt'om quioo' na jnda̱ seica'ma̱ⁿ. Cha'tso jnda̱ teiñ'oom', jo' chii quiona na nla'jomndyena na macoco ti'jndaaya.”
5. Sa̱a̱ naⁿ'ñeeⁿ na ty'ecwaⁿ mosoom'm tîcalan'oom'ndyena jom. Ty'ena ts'iaaⁿ ‘naaⁿna. Cwii tsaⁿ'ñeeⁿ tjaaⁿ ranchoom'm. Cwiicheⁿ tsaⁿ'ñeeⁿ tjaaⁿ, tjacajna̱a̱ⁿ ‘naⁿ.
6. Ndo' nt'om naⁿ'ñeeⁿ t'uena mosoom'm, cwajndii tjaa'na joo hasta jla'cwjeena moso'ñeeⁿ.
7. Jnda̱ na jndii rey'ñeeⁿ chiuu tjoom mosoom'm jeeⁿcheⁿ ndyaa' seilioo'ñê. Jñoom sondaro ‘naaⁿ'aⁿ na c'oola'cwjee nn'aⁿ na l'a nata̱' mosoom'm. Ndo' nla'cona tsjoom naⁿ'ñeeⁿ.
8. Ndo' tsoom nda̱a̱ nt'om mosoom'm: “Jnda̱ teijndaa'ya cha'tso cantyja na nleit'maaⁿ' na nncoco ti'jndaaya sa̱a̱ nn'aⁿ na jnda̱ tqua̱a̱ⁿ'a na nla'jomndye ñ'eⁿndyo̱, tacatsona' na cwii nntseit'maaⁿ'ndyo̱ joona.
9. Je' catsa'yo' nqui nantaa nt'maⁿ, jo' jo' ca'maⁿ'yo' ticwii cwii ts'aⁿ na nliu'yo', candu'yo' nda̱a̱na na quiontyjaa'na ja na macoco ti'jndaaya.”
10. Quia jo' jlui' moso'ñeeⁿ tyo'oona nqui nantaa. Jla'tjomna cha'tso nn'aⁿ na jliuna. Ñ'eeⁿ nn'aⁿ na tia nn'aⁿndye ndo' ñ'eeⁿ nn'aⁿ na ya nn'aⁿndye. Ndo' laa'ti' seicatoo'na' w'aa ñequio nn'aⁿ na jla'jomndye na toco jnda rey'ñeeⁿ.
11. 'Jnda̱ chii tjaquiee' rey quii'ntaaⁿ nn'aⁿ na nncwaaⁿ joona. Ljeiiⁿ ñ'eⁿ cwii ts'aⁿ na ticwee liaa cha'xjeⁿ liaa cwicwee' nn'aⁿ na cwila'jomndye quia na macoco ts'aⁿ.
12. Tsoom nnom tsaⁿ'ñeeⁿ: “‘U re, ¿chiuu tuiiyuu na jndyo'tsei'jomndyu' ndo' ticwe' liaa cha'xjeⁿ na cwicwee' nn'aⁿ quia na macoco ts'aⁿ?” Sa̱a̱ tîcanda̱a̱ nnc'o̱ tsaⁿ'ñeeⁿ.
13. Quia jo' nquii rey tsoom nda̱a̱ mosoom'm: “Calatyeⁿ'yo' nc'eeⁿ ñequio l'o̱o̱ⁿ. Catjei'yo' jom ch'eⁿ yuu na jaaⁿñe. Jo' jo' nnty'ioom ndo' nneiⁿnqueeⁿ ndei'n'oom.”
14. Seintycwii Jesús ñ'oom, luaa tsoom:—Majndyendye nn'aⁿ m'aⁿ na macwaⁿ Ty'o̱o̱ts'om, sa̱a̱ tijndye nn'aⁿ na macwjii'ñê cwentaaⁿ'aⁿ. Cwita'x'eena ‘ñeeⁿ nnom nñe'quiana ts'iaaⁿnda̱a̱na
15. Quia jo' ty'e nn'aⁿ fariseos, tyo'maⁿ cheⁿnquieena chiuu ya nl'ana na nnc'omna jom ñequio ñ'oom na matseineiiⁿ.
16. Jo' chii jñoomna nn'aⁿ ‘naaⁿna ñequio nt'om nn'aⁿ ‘naaⁿ' Herodes na c'oota'jndoondyena Jesús. Ty'e naⁿ'ñeeⁿ, jluena:—'U Maestro, manquiuuyâ na ‘u ts'aⁿ na xcwee' ts'om', ndo' tiquiquiu'nn'aⁿ' ñ'oom na ma'mo̱o̱ⁿ' cantyja ‘naaⁿ' natoo' Ty'o̱o̱ts'om. Ndo' mati meiⁿ tjaa na coch'eena' ‘u ljo' cwila'tiuu nn'aⁿ oo meiⁿljo'cheⁿ na cwiluiindyena.
17. Catsu' nndya̱a̱yâ. Chiuu matsei'tiuu': ¿Aa maty'iomna' na catio̱o̱ⁿya ts'iaaⁿnda̱a̱ya nnom tsaⁿmats'iaaⁿ t'maⁿ tsjoom Roma, oo aa ticaty'iomna'?
18. Sa̱a̱ Jesús sei'no̱o̱ⁿ'o̱ⁿ natia na cwila'tiuuna. Tsoom nda̱a̱na:—¿Chiuu na ñe'cal'a'yo' xjeⁿ ja, ‘o nn'aⁿ na tixcwe cwitsam'aⁿ'yo'?
19. Cat'mo̱ⁿ'yo' no̱o̱ⁿ tsjo̱'ñjeeⁿ na cwitiom'yo' ts'iaaⁿnda̱a̱'yo'.Quia jo' tjeii'na cwii denario, t'mo̱o̱ⁿna juuna' nnoom.
20. Jnda̱ na nty'iaaⁿ'aⁿ, tsoom nda̱a̱na:—¿'Ñeeⁿ ‘ndyoonnom ñoom nacjoo' tsjo̱'ñjeeⁿwaa ndo' ‘ñeeⁿ xuee' ljeiimeiiⁿ?
21. T'o̱o̱na nnoom, jluena:—'Ndyoonnom tsaⁿmats'iaaⁿ luaa' ndo' xueⁿ'eⁿ ñoom.Quia jo' tso Jesús nda̱a̱na:—Catiom'yo' ts'iaaⁿnda̱a̱'yo' nnom tsaⁿmats'iaaⁿ yuu na tseixmaⁿna' na nnco'ñoom. Ndo' quia'yo' cwentaa' Ty'o̱o̱ts'om yuu na tseixmaⁿna' cwentaa' nqueⁿ.
22. Jnda̱ na jndyena na luaa', jeeⁿcheⁿ ndyaa' tjawee' n'omna. Mana ‘ndyena jom, ty'ena. Cwita'x'eena cantyja na nntando'nnda' nn'aⁿ
23. Mañejuu xuee'ñeeⁿ tquie'cañom nn'aⁿ saduceos na m'aaⁿ Jesús. Nn'aⁿ saduceos cwila'yu'tyeⁿna na xocatando'nnda' nn'aⁿ na jnda̱ tja̱. Jo' chii jluena cwii ñ'oom nnoom:
24. —'U Maestro, waa ñ'oom na ‘ndii Moisés lua̱a̱ya na matsona' xeⁿ tue' cwii tsaⁿs'a ndo' tjaa'naⁿ ntseinaaⁿ, quia jo' tyjee ts'oo'ñeeⁿ cocoom ñ'eⁿ scuu' xioom. Nnc'om ntseinaaⁿ ñ'eⁿ yuscu'ñeeⁿ cha nntseinoomñê na tjaa ntseinda xioom t'om.
25. Ndo' quii'ntaaⁿ jâ tyom'aⁿ ntquiee' naⁿnom na ñenquii ts'aⁿ ntseinda. Juu tsaⁿtquiee tocoom, ndo' tyuaa' tueeⁿ'eⁿ. Tjaa'naⁿ ntseinaaⁿ ñ'eⁿ scoom'm. Quia jo' ljoñe scoom'm l'o̱ ti'tyjeeⁿ.
26. Sa̱a̱ majo'ti tjom ts'aⁿ na jnda̱ we, tjaa'naⁿ ndana ñ'eⁿ yuscu'ñeeⁿ ndo' tueeⁿ'eⁿ. Mati tjom ts'aⁿ na jnda̱ ndyee ndo' malaa'ti' hasta ts'aⁿ na jnda̱ ntquiee'.
27. Ndo' jnda̱ tja̱ cha'tsondye naⁿ'ñeeⁿ mati tue' yuscu.
28. Jo' na ñe'cata'x'a̱a̱yâ njom', Ta, quia na nntando'xco nn'aⁿ na jnda̱ tja̱, ¿cwaaⁿ cwii na ntquiee'ndye joona scuu' jom? Ee jom ñet'oom scuu cha'tsondye naⁿ'ñeeⁿ.
29. Tso Jesús nda̱a̱na:—'O tixcwe cwitjei'yo' cwenta, ee meiiⁿ na cwila'naⁿ'yo' ljeii ‘naaⁿ' Ty'o̱o̱ts'om na waa sa̱a̱ ticala'no̱ⁿ'yo' ljo' ma'mo̱ⁿna' meiⁿ cantyja ‘naaⁿ' najndeii na matseixmaaⁿ.
30. Ee quia na nntando'xco nn'aⁿ na jnda̱ tja̱, taxocunconnda'na, meiⁿ naⁿnom, meiⁿ naⁿlcu. Ee quia jo' nla'xmaⁿna cha'na ángeles na m'aⁿ cañoom'luee.
31. Ndo' cantyja ‘naaⁿ' na nntando'xco nn'aⁿ na jnda̱ tja̱, ¿aa tijoom ñejla'naⁿ'yo' ljeii ‘naaⁿ' Ty'o̱o̱ts'om? Luaa matsoom:
32. “Ja cwiluiindyo̱ Ty'o̱o̱ts'om cwentaa' Abraham, ndo' Isaac, ndo' Jacob.” Jo' chii caliu'yo' na cwita'ndo' naⁿ'ñeeⁿ ee jom cwiluiiñê Ty'o̱o̱ts'om cwentaa nn'aⁿ na cwita'ndo', nchii cwentaa l'oo.
33. Ndo' nn'aⁿ na jndyendye, quia na jndyena ñ'oommeiⁿ' na t'mo̱o̱ⁿ, jeeⁿ tjawee' n'omna. Ñ'oom na t'maⁿti na matsa̱'ntjom Ty'o̱o̱ts'om
34. Jnda̱ na jndye nn'aⁿ fariseos na jnda̱ seicheⁿ Jesús nn'aⁿ saduceos, quia jo' jla'tjomndyena.
35. Ndo' cwiindye joona, ts'aⁿ na ma'mo̱ⁿ ljeii na tqueⁿ Moisés ta'x'eeⁿ cwii ñ'oom nnom Jesús cha cat'uiina' juu. Tsoom:
36. —'U Maestro, naquii' ljeii ‘naaⁿ' Ty'o̱o̱ts'om na tqueⁿ Moisés, ¿cwaaⁿ ñ'oom na t'mati cwiluiiñena'?
37. T'o̱ Jesús nnom tsaⁿ'ñeeⁿ, tsoom:—“C'oom' na candya' ts'om' Ta Ty'o̱o̱ts'om cwenta', ñequio na xcwee'ya ts'om', ñequio cha'waa na jnda ntyji', ndo' ñequio cha'waa na jndo̱'ya ts'om'.”
38. Ñ'oomwaa' jndati tseixmaⁿna' ndo' t'maⁿti matsa̱'ntjomna'.
39. Ndo' ñ'oom na jnda̱ we matseijomna' ñ'oom'ñeeⁿ, luaa matsona': “C'oom' na wi' ts'om' x'ia' cha'xjeⁿ na jnda ntyji' ñequio nncu'.”
40. We ñ'oommeiⁿ' laxmaⁿna' x'ee cha'tso ñ'oom' Ty'o̱o̱ts'om na tqueⁿ Moisés ñequio ñ'oom na tyoñe'quia profetas. Cristo cwiluiiñê Jnda Ty'o̱o̱ts'om
41. Yocheⁿ na tyoot'oom'ndye nn'aⁿ fariseos, tax'ee Jesús cwii ñ'oom nda̱a̱na.
42. Tsoom:—¿Chiuu cwila'no̱ⁿ'yo' cantyja ‘naaⁿ' nquii na cwiluiiñe Cristo? ¿'Ñeeⁿ jnda jom?T'o̱o̱na nnoom, jluena:—Nluiiñê tsjaaⁿ David na jndyowicantyjoo'.
43. Tsoom nda̱a̱na:—Mayuu'. Ndo' nquii David, nc'e na t'mo̱ⁿ Espíritu Santo naquii' ts'oom seiljeiⁿ cwii ñ'oom cantyja ‘naaⁿ' Cristo. Tsoom na juu cwiluiiñe na matsa̱'ntjom jom. ¿Ljo' ma'mo̱ⁿna' na luaa' tsoom? ee seiljeiⁿ:
44. Nquii Ta Ty'o̱o̱ts'om tsoom nnom juu Ta na matsa̱'ntjom ja: “Cajmaⁿ' ntyjaa'a ntyjaya yuu na matseit'maaⁿ'ñena' ‘u hasta xjeⁿ na jnda̱ tsa̱'a nn'aⁿ na jndoo ‘u na c'omna nacje ‘naⁿ'.”
45. Nc'e na luaa' matso ljeii'ñeeⁿ, jo' mawax'a̱ya nda̱a̱'yo': “¿Chiuu waayuu na cwiluiiñe Cristo tsjaaⁿ David na jndyowicantyjoo' ee manquiiti David tsoom na juu cwiluiiñe Ta na matsa̱'ntjom jom?”
46. Sa̱a̱ meiⁿcwiindye joona tîcanda̱a̱ nnc'o̱ ‘ñom meiⁿ ñe'cwii ‘ndyoo ñ'oom. Ndo' xuee na tja tjatina' meiⁿcwii ts'aⁿ tîcanda̱a̱' ts'om na nncwax'eeti ñ'oom ‘ñom.