1. Quia jo' tuo̱nnda' Jesús ts'om w'aandaa ñequio nn'aⁿ na cwila'jomndye ñ'eⁿñê. Tei'ty'ioo'na ndaaluee. Mana tquiena tsjoom yuu na mac'eⁿ Jesús.
2. Ndo' tquioñ'om nn'aⁿ cwii ts'aⁿwii' na m'aaⁿ, cwe' ñ'eⁿ tsuee. Tsaⁿ'ñeeⁿ tycutqueeⁿ tei'ljoo jom mana teintjeiⁿ nc'eeⁿ. Quia na nty'iaa' Jesús na t'maⁿ cwila'yu'ya n'om naⁿ'ñeeⁿ, tsoom nnom tsaⁿwii':—'U jndaaya, c'om' t'maaⁿ'ndyu' ts'om'. Ja jnda̱ seit'maⁿ ts'o̱o̱ⁿya ‘u cha'tso jnaⁿ' na waa.
3. Quia jo' cwanti nn'aⁿ na cwit'mo̱o̱ⁿ ljeii na tqueⁿ Moisés tyom'aaⁿ' n'omna, cwiluena: “Tsaⁿm'aaⁿ' ñ'oom ntjeiⁿ matseineiiⁿ ee mach'eeⁿ na ljo'yu cwiluiiñê ñ'eⁿ Ty'o̱o̱ts'om.”
4. Jesús maxjeⁿ mantyjeeⁿ na luaa' cwila'tiuuna. Jo' chii tsoom nda̱a̱na:—¿Chiuu na ticuaaya nquiu'yo' ñ'eⁿndyo̱?
5. ¿Cwaaⁿ ñ'oom cwila'tiuu'yo' na tijndei'tina' na nntsjo̱o̱ nnom tsaⁿm'aaⁿ, aa nchii cha'na jnda̱ tsjo̱o̱ nnoom na matseit'maⁿ ts'o̱o̱ⁿya jnaaⁿ'aⁿ na waa? Oo ¿aa nchii nquiu'yo' na jndei'tina' na nntsjo̱o̱ quicantyjaaⁿ, cjaacaⁿ?
6. Queⁿ'yo' cwenta, ja na cwiluiindyo̱ tsaⁿ na jnaⁿ cañoom'luee m'mo̱o̱ⁿya nda̱a̱'yo' na waa na jndo̱ na matseixmaⁿya tsjoomnancuewaañe na nntseit'maⁿ ts'o̱o̱ⁿya jnaaⁿ nn'aⁿ.Quia jo' tsoom nnom ts'aⁿ na ntjeiⁿ nc'ee:—'U re, quicantyja', catseilcwiindyu' tsuee ‘naⁿ'. Cja'to' wa'.
7. Ndo' teicantyjaaⁿ, mana tjaaⁿ waⁿ'aⁿ.
8. Ndo' tmaaⁿ' nn'aⁿ na nty'iaa na luaa', tyueneiiⁿna ndo' tyola't'maaⁿ'ndyena Ty'o̱o̱ts'om na tquiaaⁿ najneiⁿ nnom Jesús na nnteijndeiina' nn'aⁿ. Ma'maⁿ Jesús Mateo
9. Jlui' Jesús jo' jo', mana tjaaⁿ. Ndo' ljeiiⁿ ja na jndyuya Mateo. Wacatya̱ⁿ w'aa yuu cwitioom nn'aⁿ ts'iaaⁿnda̱a̱na cwentaa' gobiernom. Tsoom no̱o̱ⁿ:—Candyo'tseijomndyu' ñequio ts'iaaⁿ na mats'aa.Mañoom' teicantyjaya, tjo̱tseijomndyo̱ ñequioñê.
10. Luaa tuii, wacatyeeⁿ Jesús nacañoom' meiⁿsa w'aya. Ndo' naⁿcwito'ñoom ts'iaaⁿnda̱a̱ nn'aⁿ cwentaa' gobiernom ñ'eⁿ nn'aⁿ na cwila'tjo̱o̱ndye nnom Ty'o̱o̱ts'om cantyja na nquiu nn'aⁿ fariseos, ñe'naaⁿ' meindyuaandyena ñ'eⁿñê ñequio nn'aⁿ na cwila'jomndye ñ'eⁿñê.
11. Sa̱a̱ quia na nty'iaa nn'aⁿ fariseos na luaa' mach'eeⁿ, ta'x'eena nda̱a̱ nn'aⁿ na cwila'jomndye ñ'eⁿñê, jluena:—¿Chiuu na macwa' maestro ‘naⁿ'yo' ñequio naⁿcwito'ñoom ts'iaaⁿnda̱a̱ nn'aⁿ cwentaa' gobiernom ndo' ñequio nn'aⁿ na cwila'tjo̱o̱ndye nnom Ty'o̱o̱ts'om?
12. Quia na jndii Jesús na luaa' cwiluena, tsoom:—Nn'aⁿ na tiwii titjo̱o̱ndyena ts'aⁿ na mach'ee nasei. Sa̱a̱ nn'aⁿ na wii tjo̱o̱ndyena tsaⁿ'ñeeⁿ.
13. Waa ñ'oom' Ty'o̱o̱ts'om na luaa matsona': “Ja cajndati ntyjii na nnc'om'yo' na wi' n'om'yo' nc'iaa'yo' nchiiti na cwiñe'quia'yo' quioo' na cwila't'maaⁿ'ndyo' ja.”Tsoti Jesús:—Catsa'yo' ndo' cala'no̱ⁿ'yo' ljo' ñe'ca'mo̱ⁿ ñ'oomwaa'. Ee ja nchii na jndyo̱o̱ na nncwaⁿya nn'aⁿ na cwil'a na maty'iomyana', sa̱a̱ jndyo̱o̱ na nncwaⁿya nn'aⁿjnaⁿ na calcwe' n'omna. ¿Aa macaⁿna' na nla'cwejndo'ndye nn'aⁿ?
14. Quia jo' nn'aⁿ na cwila'jomndye ñ'oom na mañequiaa Juan, tyquie'cañomna Jesús. Tyola'ncjoo'ndyena, jluena:—¿Chiuu na jâ ñequio nn'aⁿ fariseos jndye ndii' cwila'cwejndo'ndyô̱, sa̱a̱ nn'aⁿ na cwila'jomndye ñ'eⁿndyu' tiquila'cwejndo'ndyena?
15. T'o̱ Jesús nda̱a̱ naⁿ'ñeeⁿ, seineiiⁿ ñ'oom tjañoom':—Joo nn'aⁿ na cwila'jomndye ñ'eⁿ nquii ts'aⁿ na macoco, ¿aa nnc'omna na chjoo' n'omna yocheⁿ na cwiwit'maaⁿ' na ndicwaⁿ m'aaⁿ tsaⁿ'ñeeⁿ quii'ntaaⁿna? Xocats'aana'. Sa̱a̱ nncue'ntyjo̱ xuee na nncwji'na' juu ts'aⁿ na macoco quii'ntaaⁿna. Quia ljo'cheⁿ nnc'omna na chjoo' n'omna ndo' nla'cwejndo'ndyena.
16. Quia jo' seineiⁿti Jesús ñ'oom tjañoom' cantyja ‘naaⁿ' ñ'oom xco na jndyoñ'oom. Tsoom:—Ticaty'iomyana' na nntseiyo̱ ts'aⁿ liaa ntsaa ñ'eⁿ cwii taⁿ' liaa xco na tyootmaⁿ. Ee xeⁿ na ljo' nnts'aa, nncjaateii liaa xco, nnc'ioo'ñena' liaa ntsaa ndo' liaa ntsaa cwajndiiti njndii'ñena'.
17. Meiⁿ xocatiom ts'aⁿ winom xco ts'om tjaⁿ na jnda̱ teil'ue, ee xeⁿ na luaa' nts'aa ts'aⁿ, nty'ioo' tjaⁿ, mana cwiwindaa'ñ'eⁿ juuna' ndo' mati nlcwe' winom. Maxjeⁿ nntiom ts'aⁿ winom ts'om tjaⁿ xco ndo' laa'ti' meiⁿ tjaⁿ xocwi'ndaa' meiⁿ winom. Yuscuchjoo jnda Jairo
18. Yocheⁿ na matseineiⁿ Jesús ñ'oommeiⁿ', tyje'cañoom cwii ts'aⁿ na cwiluiitquieñe wats'om ‘naaⁿ nn'aⁿ judíos. Tco' xtye jo nnoom, tso:—Je'ndyo tue' nomjndaaya. Sa̱a̱ xeⁿ wja' na nntio' ts'o̱' nacjoom'm, nncwando'nnaaⁿ'aⁿ. Cwa cja', catio'ya' ts'o̱' nacjoom'm, quia jo' nncwando'xcoom.
19. Ndo' teicantyja Jesús, tjantyjo̱o̱ⁿ naxeⁿ' tsaⁿ'ñeeⁿ ñequio jâ nn'aⁿ na cwilajomndyô̱ ñ'eⁿñê.
20. Luaa tuii, jndyontyjo̱ cwii yuscu naxeⁿ' Jesús na nioom wii'. Yuscu'ñeeⁿ jnda̱ canchoo'we chu na tyoocameintyjee' na cwicaa nioom'm. Jndyotseicandyoo'ñê, t'ueeⁿ ‘ndyoo liaa' Jesús.
21. Ee seitioom naquii' ts'oom: “Xeⁿ cwe' na nnda̱a̱ nñequiuu'a liaⁿ'aⁿ, quia jo' nn'maⁿya.”
22. Taqueⁿ Jesús nty'iaaⁿ'aⁿ yuscu'ñeeⁿ. Tsoom nnom:—'U jndaaya, c'om' t'maaⁿ'ndyu' ts'om'. Nc'e na matseiyu'ya ts'om' ñ'eⁿndyo̱, jnda̱ n'maⁿ'.Ndo' mañejuu xjeⁿ'ñeeⁿ n'maⁿ.
23. Jnda̱ tuee' Jesús waa' Jairo'ñeeⁿ, tjaqueⁿ'eⁿ naquii' w'aa. Nty'iaaⁿ'aⁿ nn'aⁿ na cwitjo̱o̱' nmaaⁿ, ñequio jndye nt'omcheⁿ nn'aⁿ na tacwaxua ndyuee.
24. Tsoom nda̱a̱ naⁿ'ñeeⁿ:—Calui'yo', ee nchii na jnda̱ tue' yuscuchjoom'aaⁿ'. Cwe' watsoo.Sa̱a̱ cwe' teincona jom.
25. Jnda̱ na tjeiiⁿ'eⁿ naⁿ'ñeeⁿ ch'eⁿ, tjaqueⁿ'eⁿ yuu ndii' ts'oochjoo, t'ueeⁿ ts'o̱. Teintyja yu'ñeeⁿ.
26. Cha'waa ts'o̱ndaa'ñeeⁿ t'om ñ'oom na tuii na luaa'. Sein'maⁿ Jesús we naⁿnchjaaⁿ
27. Na mawjaati Jesús ty'entyjo̱ we naⁿnchjaaⁿ naxeeⁿ'eⁿ. Jndeii tyola'xuaana, tyoluena:—Ta, ‘u na cwiluiindyu' tsjaaⁿ ‘naaⁿ' David na jndyowicantyjoo', c'oom' na wi' ts'om' jâ.
28. Quia na tjaqueⁿ'eⁿ quii' w'aa, ty'entyjo̱ naⁿnchjaaⁿ'ñeeⁿ naxeeⁿ'eⁿ. Tsoom nda̱a̱na:—¿Aa cwilayu'yo' na nnda̱a̱ nnts'aaya na nnty'ia'yo'?T'o̱o̱na nnoom jluena:—Ta, cwilayuu'â na nnda̱a̱ nntsa'.
29. Quia jo' tyenquioom'm lua'nda̱a̱na, tsoom:—Cats'aana' cha'xjeⁿ na cwilayu'ya n'om'yo'.
30. Mana tco'yana' n'omnda̱a̱ naⁿ'ñeeⁿ. Ndo' tqueⁿtyeⁿ Jesús ñ'oom nda̱a̱na, tsoom:—Cal'a'yo' cwenta na meiⁿcwii ts'aⁿ ticalaneiⁿ'yo' nnom ‘ñeeⁿ sein'maⁿ ‘o.
31. Sa̱a̱ yuu waa, jlui' naⁿ'ñeeⁿ jo' jo', to̱'na, tyot'oomna ñ'oom ya cantyja ‘naaⁿ'aⁿ cha'waa ts'o̱ndaa'ñeeⁿ. Sein'maⁿ Jesús ts'aⁿ na tileicatseineiⁿ
32. Xjeⁿ na cwi'oo naⁿ'ñeeⁿ, luaa tuii, tquioñ'om nn'aⁿ cwii ts'aⁿ na m'aaⁿ Jesús. Tileicatseineiⁿ na maleiñ'oom jndyetia juu.
33. Quia na jnda̱ tjeiiⁿ'eⁿ jndyetia naquii' ts'om tsaⁿ'ñeeⁿ, jnaaⁿ na matseineiⁿ. Tyueneiiⁿ nn'aⁿ, jluena:—Meiⁿ cha'waa ndyuaaya ndyuaa Israel, tijoom ñenty'iaaya cwii nnom cha'na luaa'.
34. Sa̱a̱ nn'aⁿ fariseos tuee'na ñ'oom nacjoo' Jesús, jluena:—Cantyja najndeii nquii na cwiluiitquieñe nda̱a̱ naⁿjndii, jo' na macwjeeⁿ'eⁿ naⁿjndii naquii' n'om nn'aⁿ. Wi' ts'om Jesús nn'aⁿ
35. Tyomanom Jesús cha'tso njoom t'maⁿ ñequio njoom nch'u ts'o̱ndaa Galilea. Tyo'mo̱o̱ⁿ nda̱a̱ nn'aⁿ naquii' lan'om. Tyoñequiaaⁿ ñ'oom naya cantyja na matsa̱'ntjom Ty'o̱o̱ts'om. Tyotsein'maaⁿ nn'aⁿ ticwii cwii nnom tycu na wiina, ñ'eⁿ ticwii cwii nnom na tajndeii' n'omna na maquiina'.
36. Quia na nty'iaaⁿ'aⁿ nn'aⁿ na jndyendye, t'oom na wi' ts'oom naⁿ'ñeeⁿ ee cwe' m'aⁿntjeiⁿtona ndo' tjaa ‘ñeeⁿ na nnteijndeii joona. Laxmaⁿna cha'cwijom cwii tmaaⁿ' canmaⁿ na tjaa ‘ñeeⁿ juu na ya nnteix'ee.
37. Quia jo' to̱o̱ⁿ'o̱ⁿ na ma'mo̱o̱ⁿ na jndye nn'aⁿ mam'aⁿ na nndye ñ'oom' Ty'o̱o̱ts'om sa̱a̱ tijndye nn'aⁿ na nntjei'yuu'ndye nda̱a̱na. Tsoom ñ'oom tjañoom' nda̱a̱ nn'aⁿ na cwila'jomndye ñ'eⁿñê:—Jeeⁿ ya jnda̱ tue' ntjom, sa̱a̱ naⁿntjom tijndyendyena.
38. Jo' chii cala'ty'oondyo' nnom Ty'o̱o̱ts'om na jom cwentaaⁿ'aⁿ ntjom'ñeeⁿ, na cajñoom nn'aⁿ na c'oocatyjeendye ntjoom'm.