1. Jnda̱ chii nty'iaya cwii ángel na jnaⁿ cañoom'luee, jndyocueeⁿ. Ñ'oom ts'o̱w'aa na nnaaⁿ yuu na ticantycwii na njoom ndo' ñ'oom ts'uaaxjo ta.
2. T'ueeⁿ catsoomjndii, juu catsuu tquiee na maxjeⁿ teiyo m'aaⁿ, juu na cwiluiiñe tsaⁿjndii ndo' Satanás. Seityeeⁿ juu na cwiljoo'ñetyeⁿ cwii meiⁿ ndyu.
3. Ndo' tjoom'm tsaⁿ'ñeeⁿ naquii' yuu na ticantycwii na njoom. Jnda̱ jo' seicoom'm ndo' tuaa teincuu' na nnaaⁿ jo' jo', cha tacalui' tsaⁿ'ñeeⁿ na nñequiu'nn'aⁿtyeeⁿ nn'aⁿ njoomnancue. Quia jnda̱ jnda̱a̱' cwii meiⁿ ndyu'ñeeⁿ maxjeⁿ matsona' na nnaⁿ'ñeyaaⁿ cwe' tiyo.
4. Jnda̱ chii nty'iaya jndye ndio na meindyuaandye nn'aⁿ na jnda̱ to'ñoom ts'iaaⁿ na nntu'xeⁿna nn'aⁿ. Ndo' mati nty'iaya añmaaⁿ nn'aⁿ na jnda̱ jno̱ⁿ cantyo' cwe' nc'e na tjei'yuu'ndyena cantyja ‘naaⁿ' Jesús, ndo' na tyoñe'quiana ñ'oom' Ty'o̱o̱ts'om. Naⁿ'ñeeⁿ tîcala't'maaⁿ'ndyena quioo'jndii, meiⁿ juu na jlui'tsjaaⁿ'ñeyo'. Tînquiandyena na nluii ljeii ‘naaⁿ'yo' cantaana meiⁿ lueena. Naⁿ'ñeeⁿ nty'iaya na tando'nnda'na na jnda̱ tja̱na ndo' sa̱'ntjomna ñequio Cristo cwii meiⁿ ndyu.
5. Jo' luaa' najndyee na cwitando'xco nn'aⁿ. Sa̱a̱ nt'omcheⁿ nn'aⁿ na jnda̱ tja̱, ticatando'nnda'na hasta quia jnda̱ jnda̱a̱' cwii meiⁿ ndyu'ñeeⁿ.
6. Matio'naaⁿñe Ty'o̱o̱ts'om joo nn'aⁿ na cwila'jomndye na cwitando'nnda' najndyee, ee cwiluiindyena na lju' n'omna. Juu na nncwje nn'aⁿ na jnda̱ we, xocat'uiina' joona ee tjaa najndeii na matseixmaⁿna' ñ'eⁿndyena. Nla'xmaⁿna ntyee cwentaa' Ty'o̱o̱ts'om ndo' Cristo. Ndo' nntsa̱'ntjomna ñ'eⁿñê cwii meiⁿ ndyu.
7. Quia na jnda̱ jnda̱a̱' cwii meiⁿ ndyu'ñeeⁿ, nndyaañe Satanás yuu na chu'tyeⁿñê
8. cha nlueeⁿ'eⁿ na nncjaanquiu'nn'aaⁿ Gog ñ'eⁿ Magog, jo' jo' nn'aⁿ na m'aⁿ cha'waa tsjoomnancue. Ndo' nntseitjoom sondaro ‘naaⁿ naⁿ'ñeeⁿ na nl'ana tia'. Jndyendyena hasta matseijomna' cha'na jndye tei' ‘ndyoo ndaaluee.
9. Ndo' nty'iaya na jnaⁿna cha'waa tsjoomnancue. Ty'etcuundyena cha'waa ndyuaa ndo' tjaa'ndyena tsei juu tsjoom na jeeⁿ candya' ts'om Ty'o̱o̱ts'om, yuu na cwic'eeⁿ nn'aⁿ na maqueeⁿ na lju' n'om. Sa̱a̱ seiquioom chom nacjoo sondaro'ñeeⁿ, seicoñ'eⁿna' joona.
10. Ndo' juu tsaⁿjndii na tquiu'nn'aⁿ joona, tju'na' jom naquii' ndaalueechom yuu na cwico ljo̱' sufra̱. Jo' jo' m'aaⁿ quioo'jndii tquiee ñequio ts'aⁿ na tyoñequiaa ñ'oom cantu. Naxuee natsjom ticantycwii na maco'wi'na' joona jo' jo'. Cwitu'xeⁿndye nn'aⁿ mach'ee Ty'o̱o̱ts'om
11. Jnda̱ jo' nty'iaya cwii tio canchii' na jeeⁿ t'maⁿna' ndo' nty'iaya nquii Ty'o̱o̱ts'om na wacatyeeⁿ nacjoo' juuna'. Tsjoomnancue ñ'eⁿ tsjo̱'luee jnda̱ tsuuñ'eⁿna' jo nnoom.
12. Mati tco'na' no̱o̱ⁿ na nty'iaya l'oo, joo nn'aⁿ na tyoluiit'maⁿndye ñequio nn'aⁿ na tjaa ljo' tyola'xmaⁿ. Meintyjee' naⁿ'ñeeⁿ jo nnom tio canchii'ñeeⁿ. Jnda̱ chii sein'meiiⁿ' Ty'o̱o̱ts'om cha'tso libro na chona' ljeii na matseicano̱o̱ⁿna' cantyjati na ñel'a l'oo'ñeeⁿ. Cantyja ‘naaⁿ joo ñ'oom'ñeeⁿ tu'xeⁿndyena. Ndo' mati waa cwiicheⁿ libro na chuuna' ncuee nn'aⁿ na la'xmaⁿ na cwita'ndo', jnda̱ sein'meiiⁿ'eⁿ.
13. Ndo' sei'ts'o ‘naaⁿ nn'aⁿ na tja̱ naquii' ndaaluee, jndyaandyena jo' jo'. Ndo' añmaaⁿ nn'aⁿ na jnda̱ tja̱ na m'aⁿ yuu na meindoo' l'oo, jndyaandyena jo' jo'. Quia jo' cha'tsondye naⁿ'ñeeⁿ tu'xeeⁿ joona cantyjati na jnda̱ ñel'ana.
14. Xjeⁿ'ñeeⁿ juu na mach'ee na cwiwje nn'aⁿ ndo' ñequio tsjoom l'oo, tjoom'm joona' ndaaluee chom. Juu ndaaluee chom tseixmaⁿna' na jnda̱ we na cwiwje nn'aⁿ.
15. Ndo' ‘ñeeⁿ juu na tîcwiljeii xuee' nacjoo' libro na chuuna' ncuee nn'aⁿ na la'xmaⁿ na cwita'ndo', tsaⁿ'ñeeⁿ tjoom'm juu naquii' ndaaluee chom. Luaa' waa na tco'na' no̱o̱ⁿya.