12. ‘Ñeeⁿ juu na cwinaⁿñe ñequio natia, ja nnts'aa na nljoo'ñetyeⁿ nacañoom' Ty'o̱o̱ts'om. Nntseijomna' tsaⁿ'ñeeⁿ cha'cwijom cwii ta ts'oomx'ee wats'om cañoom'luee. Ndo' tijoom cwinncwji'na' juu jo' ee nquii Ty'o̱o̱ts'om cwentaya cwiluiiñê wats'om'ñeeⁿ. Ndo' nntseiljeiya xueⁿ'eⁿ nacjoo' tsaⁿ'ñeeⁿ ñequio xuee' tsjoom ‘naaⁿ'aⁿ, majuu tsjoom Jerusalén xco. Tsjoom'ñeeⁿ nndyocuena' na nnaⁿna' cañoom'luee yuu na m'aaⁿ nqueⁿ na cwiluiiñê cwentaya. Ndo' mati nntseiljeiya cwiicheⁿ xueya na xcona' nacjoo' tsaⁿ'ñeeⁿ.