1. Ndo' nty'iaya cwii tsom na chu'lcwiina' na maleiñ'oom nqueⁿ na wacatyeeⁿ nacjoo' tio. Ndii'na' ts'o̱o̱ⁿ ntyjaya ndo' we ntyja teiljeiina'. Ndo' ntquiee' joo na tjata̱'tyeⁿna'.
2. Ndo' nty'iaya cwii ángel na jeeⁿ jndeii ndo' jeeⁿ c'uaa ‘ndyoo na matseineiⁿ. Mawax'ee:—¿'Ñeeⁿ juu tseixmaⁿ na nntseicanaaⁿñe yuu na ta̱'tyeⁿ tsomwaa ndo' na nntseicano̱ⁿ' juuna'?
3. Sa̱a̱ meiⁿcwii tjaa ‘ñeeⁿ c'oom na matseixmaⁿ na nntseicanaaⁿñe tsom'ñeeⁿ, meiⁿ ángeles cañoom'luee, meiⁿ nn'aⁿ tsjoomnancue, meiⁿ añmaaⁿ nn'aⁿ na jnda̱ tja̱ na m'aⁿ tsjoom l'oo. Meiⁿ cwii na ndyee ndii'ndye joona tîcanda̱a̱ nty'iaa' naquii' tsom'ñeeⁿ.
4. Jo' chii jeeⁿ tyot'io̱o̱ cwe' nc'e na meiⁿcwii tjaa ‘ñeeⁿ tseixmaⁿ na nntseicanaaⁿñe tsom'ñeeⁿ, meiⁿ na nnty'iaa' naquii'na'.
5. Ndo' cwii nquiee naⁿ'ñeeⁿ na cwiluiitquiendye tso no̱o̱ⁿ:—Tant'ioo' ee m'aaⁿ nqueⁿ na jnda̱ seityueeⁿ'eⁿ juu natia. Jom tseixmaaⁿ na nntseicanaaⁿñê cwii ndo' cwii ntquiee' joo na tjata̱'tyeⁿ tsom'ñeeⁿ ndo' nntseicano̱o̱ⁿ'o̱ⁿ juuna'. Jom matseicajndyuna' Liom cwentaa' tmaaⁿ' nn'aⁿ Judá na cwiluiiñê tsjaaⁿ David na jndyowicantyjoo'.
6. Quia jo' nty'iaya cwii ts'aⁿ cha'cwijom catsmaⁿ na jnda̱ jla'cuee' nn'aⁿ. Meintyjeeⁿ'eⁿ nacañoom' tio quii'ntaaⁿ ñequiee naⁿta'ndo' ñequio nn'aⁿ na cwiluiitquiendye. Jom niom ntquiee' ndei'jñeeⁿ'eⁿ ndo' niom ntquiee' n'omnnoom. Joo n'omnnoom cwiluiindyena' ntquiee' Espíritu na cwiluiiñe Ty'o̱o̱ts'om na jñoom cha'waa tsjoomnancue.
7. Ndo' tjantyjaaⁿ'aⁿ nquii na wacatyeeⁿ tio. To'ñoom tsom na ndii' ts'o̱ ntyjaya.
8. Ndo' jom na matseicajndyuna' Catsmaⁿ quia jnda̱ to'ñoom tsom'ñeeⁿ, quia jo' ñequiee naⁿ na ta'ndo' ta'na cantyena jo nnoom ndo' majo'ti l'a ntquiuu nchoo' ñequiee nn'aⁿ na cwiluiitquiendye. Ticwiindye naⁿtquie'ñeeⁿ maleiñ'oom arpa ñequio waso s'om cajaⁿ na too'cheⁿna' ñjom suu. Suu'ñeeⁿ tseixmaⁿna' ñ'oom ndyuee nn'aⁿ na cwiluiindye cwentaa' Ty'o̱o̱ts'om quia na cwila'neiⁿna nnoom.
9. Ndo' cwitana cwii luantsa xco. Cwiluena: ‘U tseixmaⁿ' na nnco'ñom' tsomwaa' ndo' nntseicanaaⁿndyu' yuu na tjata̱'tyeⁿ juuna'. Ee jla'cuee' nn'aⁿ ‘u ndo' ñequio niom' tioml'ua' jnaaⁿ nn'aⁿ cha nla'xmaⁿna cwentaa' Ty'o̱o̱ts'om. Joona cwiluiindyena nn'aⁿ na ticwii cwii ntmaaⁿ', ñequio nn'aⁿ na ticwii cwii nnom ñ'oom na cwila'neiⁿ, ñequio nn'aⁿ na ticwii cwii nnom na tjachuii'ndye, ñequio nn'aⁿ cwii cwii ndyuaa.
10. Jnda̱ tqueⁿ' na cwiluiindyena tmaaⁿ' nn'aⁿ na matsa̱'ntjom Ty'o̱o̱ts'oomya. Ndo' jnda̱ tqueⁿ' joona na cwiluiindyena ntyee na cwindye'ntjomna nnoom. Ndo' nntsa̱'ntjomna nn'aⁿ tsjoomnancue.
11. Quia jo' cwiicheⁿ cwii ndii' nty'iaya ndo' jndiiya na c'uaa ndyuee jndye ángeles na m'aⁿ ndiocheⁿ yuu na wacatyeeⁿ tio ñequio ñequiee naⁿ na ta'ndo', ñequio nn'aⁿ na cwiluiitquiendye. Ndo' tue'ntyjo̱ na jndyendye ángeles'ñeeⁿ cha'na nqui meiⁿ ndii' na nqui nqui meiⁿ.
12. C'uaa cwiluena: Juu Catsmaⁿ na jla'cuee' nn'aⁿ, t'maⁿ cwiluiiñê cantyja najneiⁿ, ndo' tseixmaaⁿ na tyañê. Macanda̱ jom cwiluiiñê na jndo̱' ts'oom ndo' cha'tso nnda̱a̱ nnts'aaⁿ. Jeeⁿ maty'iomna' na cal'uuya ñ'oom ya cantyja ‘naaⁿ'aⁿ, ndo' calawa̱a̱ndya̱a̱ya jom ndo' cala't'maaⁿ'ndyo̱ jom.
13. Ndo' mati jndiiya na teic'uaa ndyuee ticwii cwii nnom na s'aa Ty'o̱o̱ts'om jo cañoom'luee, ñequio nnom tsjoomnancue, ñequio tsjoom l'oo, ñequio naquii' ndaaluee. Cha'tso na m'aⁿ jo' jo' luaa tyolue: Cantyjati na tjaa yuu cwintycwii xuee, cala't'maaⁿ'ndyo̱ nqueⁿ na wacatyeeⁿ tio ñequio juu Catsmaⁿ. Maty'iomyana' na cal'uuya ñ'oom ya cantyja ‘naaⁿna, ndo' calawa̱a̱ndya̱a̱ya joona, ee t'maⁿ waa najndeii na la'xmaⁿna.
14. Ndo' ñequieendye naⁿ na ta'ndo', tyolue:—Amén.Ndo' joo ntquiuu nchoo' ñequiee nn'aⁿ na cwiluiitquiendye ta'na cantyena, tyola't'maaⁿ'ndyena nqueⁿ na tjaa yuu nntycwii na wanoom'm.