1. Cal'a'yo' cwii naya'ñeeⁿ na cateijndei'yo' nomnn'aaⁿya Febe. Jom mandi'ntjoom quii'ntaaⁿ tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ tsjoom Cencrea.
2. Cato'ñoom'yo' jom ñequio xuee' Nquii na cwiluiiñe na matsa̱'ntjom jaa cha'xjeⁿ na macaⁿna' na cal'aa jaa nn'aⁿ na cwilayu'ya n'o̱o̱ⁿya ñ'eⁿ Ty'o̱o̱ts'om. Ndo' catei'jndei'yo' jom ñequio meiⁿnquia nnom na macaⁿna'. Ee jom jndye nn'aⁿ jnda̱ ñeteijneiⁿ, ndo' mati ja.
3. Quia'yo' na xmaⁿñe Priscila ñ'eⁿ ti'Aquila. Joona cwila'jomndyena ts'iaaⁿ ‘naaⁿ' Cristo Jesús ñ'eⁿndyo̱.
4. Ee seiteincuu'ñena' cantyja na m'aⁿna, cwe' cha calui'n'maaⁿndyo̱ ja. Jo' chii cha'tso ntmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ na nchii judíos cwiñequia na quianl'uaa' Ty'o̱o̱ts'om cantyja ‘naaⁿna, ndo' mati ja.
5. Mati quia'yo' na xmaⁿndye tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ na cwitjomndye w'aana. Xmaⁿñe Epeneto, tsaⁿ na jeeⁿ jnda ntyjiiya. Jom ts'aⁿ najndyee na seiyu' ñ'eⁿ Cristo ndyuaa Acaya.
6. Candu'yo' xmaⁿñe María. Jom jeeⁿ jndye ts'iaaⁿ na s'aaⁿ quii'ntaaⁿ'yo'.
7. Candu'yo' na xmaⁿndye nn'aⁿ na ñecwii tsjaaⁿ ñ'eⁿndyo̱ juu Andrónico ñ'eⁿ Junias. Maljoyu ñet'o̱o̱ⁿya w'aancjo ñ'eⁿndyena. Jnda nquiu apóstoles joona. Joona tyuaa'ti jla'yu'na ñ'eⁿ Cristo, nchiiti ja.
8. Candu'yo' nnom ti'x'iaya Amplias xmaⁿñê. Ee na jnda ntyjeeⁿ Ta Jesús, mati na jeeⁿ wi' ts'o̱o̱ⁿya jom.
9. Ndo' xmaⁿñe Urbano. Jom matseijomñê ts'iaaⁿ ‘naaⁿ' Cristo ñ'eⁿndyo̱. Ndo' mati xmaⁿñe Estaquis, jom jeeⁿ wi' ts'o̱o̱ⁿya.
10. Candu'yo' na xmaⁿñe Apeles. Cantyja na mach'eeⁿ jnda̱ teitquioo' na matseiyu'ya ts'oom ñ'eⁿ Cristo. Ndo' mati xmaⁿndye nn'aaⁿ' Aristóbulo.
11. Xmaⁿñe Herodión tsaⁿ na mañe'cwii tsjaaⁿ jâ ñ'eⁿñe. Ndo' xmaⁿndye nn'aaⁿ' Narciso na m'aⁿna cantyja ‘naaⁿ' Jesucristo.
12. Xmaⁿñe nomnn'aaⁿya Trifena ñ'eⁿ Trifosa na cwil'ana ts'iaaⁿ ‘naaⁿ' Ta Jesucristo. Ndo' xmaⁿñe nomnn'aⁿya Pérsida, jom jeeⁿ jnda ntyjiiya. Jeeⁿ maqueⁿñê na mach'eeⁿ ts'iaaⁿ ‘naaⁿ' Ta Jesús.
13. Xmaⁿñe Rufo. Jom jeeⁿ t'maⁿ matseixmaaⁿ cantyja ‘naaⁿ' Ta Jesucristo. Ndo' mati xmaⁿñe tsoñeeⁿ. Juu jnda ntyjiiya cha'cwijom ntyjii na tsondyo̱ nnco̱.
14. Mati cal'a'yo' cwii naya'ñeeⁿ na candu'yo' na xmaⁿñe Asíncrito, Flegonte, Hermas, Patrobas, Hermes ñequio nn'aⁿ na cwila'yu' na m'aⁿ ñ'eⁿndyena.
15. Candu'yo' na xmaⁿñe Filólogo, Julia, Nereo, ñequio nomtyjeeⁿ, ñequio Olimpas, ñequio cha'tso nn'aⁿ na macwji' Ty'o̱o̱ts'om cwentaaⁿ'aⁿ na m'aⁿ ñ'eⁿndyena.
16. Quia'yo' na xmaⁿndyo' ntyjee'yo' ñequio na xcwee' n'om'yo' na cwitaⁿ'yo' luee'yo'. Ticwii tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ ñ'eⁿ Cristo ndyuaameiiⁿ cwila'cwanomna na xmaⁿndyo'.
17. ‘O nn'aⁿya na cwila'yu'yo', mats'aa ty'oo nda̱a̱'yo' na queⁿndyo' cwenta cantyja ‘naaⁿ joo nn'aⁿ na cwil'a na cwito̱ⁿ'ndye nn'aⁿ tmaaⁿ' ‘o, na cwil'ana na cwila'tjo̱o̱ndye nc'iaa'yo' jo nnom Ty'o̱o̱ts'om. Ee ñ'oom na cwit'mo̱o̱ⁿ naⁿ'ñeeⁿ tixcwe m'aⁿna' ñ'eⁿ ñ'oom na jnda̱ t'mo̱o̱ⁿyâ nda̱a̱'yo'. Catjei'ndyo' cantyja ‘naaⁿ naⁿ'ñeeⁿ,
18. ee ticala'xmaⁿna nn'aⁿ na cwindye'ntjom nnom nquii Ta Jesucristo. Naⁿ'ñeeⁿ ticatuee'ndyecjena cantyja ‘naaⁿ'aⁿ. Macanda̱ na cwijndoo'na ljo' na macaⁿna' nquieena. Cwila'neiⁿna ñ'oom ca'naaⁿ' na jeeⁿ neiⁿncoo' joona', sa̱a̱ joo ñ'oom'ñeeⁿ cwinquio'nn'aⁿna' joo nn'aⁿ na ticuee' na cwila'no̱ⁿ'.
19. Sa̱a̱ jnda̱ t'om ñ'oom cantyja ‘naⁿ'yo' na ‘o cwitue'ndyo'cje'yo' nnom ñ'oom na xcwe. Jo' na mañequiaana' na jeeⁿ neiⁿya. Ndo' l'ue ts'o̱o̱ⁿ na c'om'c'eendyo' na nl'a'yo' ljo' na majo'ndyo', nchii nl'a'yo'yo' yuu na tis'a.
20. Nquii Ty'o̱o̱ts'om na mañequiaaⁿ na meiⁿcwii ñomtiuu tic'o̱o̱ⁿya jo nnoom, mawaa xjeⁿ na nnts'aaⁿ na nntseicachquiaañena' Satanás nacjee' nc'ee'yo'. Juu naya na tseixmaⁿ Jesucristo, c'omna' ñ'eⁿndyo'.
21. Timoteo na ñ'eⁿ cwil'aayâ ts'iaaⁿ ‘naaⁿ' Ty'o̱o̱ts'om, matseicwanoom na xmaⁿndyo'. Mati Lucio, Jasón, ndo' Sosípater, nn'aⁿ na mañecwii tsjaaⁿ ja ñ'eⁿndye cwilacwanomna na xmaⁿndyo'.
22. Maja Tercio matseicwano̱ⁿ na xmaⁿndyo' ñequio xuee' Ta Jesús. Cartawaañe matseiljeiya na matseicwanom Pablo na m'aⁿ'yo'.
23. Matseicwanom Gayo na xmaⁿndyo'. Ja Pablo m'aaⁿya waⁿ'aⁿ na mateix'eeⁿ ja. Ndo' mañjaaⁿ cwitjomndye nn'aⁿ na cwila'yu'. Ndo' mati Erasto matseicwanoom na xmaⁿndyo'. Jom tsaⁿcoñom s'om tsjoomwaa. Mati juu nn'aⁿya Cuarto matseicwanoom na xmaⁿndyo'.
24. Ty'o̱o̱ts'om quiaaⁿ na c'oom naya na matseixmaⁿ Ta Jesucristo ñ'eⁿ cha'tsondyo' ‘o. Amén. Pablo malcwii'nnaaⁿ'aⁿ Ty'o̱o̱ts'om
25. Ndo' je', cwila't'maaⁿ'ndyo̱ Ty'o̱o̱ts'om. Jom waa najneiⁿ na nnts'aaⁿ na nnc'om'jnda̱'ti'yo' cantyja ‘naaⁿ' ñ'oom naya na mañequiaya na cwilui'n'maaⁿndye nn'aⁿ ndo' nc'e ñ'oom na ma'mo̱o̱ⁿya cantyja ‘naaⁿ' Jesucristo. Ndo' na luaa' waa, matseijomna' ñequio juu na cwe' wanty'iuu' tyom'aaⁿna' xjeⁿ cwitjo̱o̱cheⁿ na ncuaa tsjoomnancue.
26. Sa̱a̱ je' je' cwiwitquioo' xcweyana' nda̱a̱ nn'aⁿ ee ñ'oom' Ty'o̱o̱ts'om na teiljeii na tyola'neiⁿ profetas na tyondye'ntjom nnoom, cantyjati xjeⁿ na tyotsa̱'ntjom Nqueⁿ na ticantycwii na m'aaⁿ. Juu ñ'oom waanty'iuu'ñeeⁿ jnda̱ seicano̱o̱ⁿ cha nn'aⁿ meiⁿnquia ndyuaa nnda̱a̱ nla'yu'na ndo' nla'canda̱na jo nnoom.
27. Nnom nquii Ty'o̱o̱ts'om na ñecwiiñê, na tjacantyja na jndo̱' ts'oom, ñecwiitco caluiit'maⁿñê nc'e Jesucristo. Amén.