דברי הימים א, Chapter 6 ו

א. בני לוי גרשון קהת ומררי:

ב. ובני קהת עמרם יצהר וחברון ועזיאל:

ג. ובני עמרם אהרן ומשה ומרים ובני אהרן נדב ואביהוא אלעזר ואיתמר:

ד. אלעזר הוליד את פינחס פינחס הליד את אבישוע:

ה. ואבישוע הוליד את בקי ובקי הוליד את עזי:

ו. ועזי הוליד את זרחיה וזרחיה הוליד את מריות:

ז. מריות הוליד את אמריה ואמריה הוליד את אחיטוב:

ח. ואחיטוב הוליד את צדוק וצדוק הוליד את אחימעץ:

ט. ואחימעץ הוליד את עזריה ועזריה הוליד את יוחנן:

י. ויוחנן הוליד את עזריה הוא אשר כהן בבית אשר בנה שלמה בירושלם:

יא. ויולד עזריה את אמריה ואמריה הוליד את אחיטוב:

יב. ואחיטוב הוליד את צדוק וצדוק הוליד את שלום:

יג. ושלום הוליד את חלקיה וחלקיה הוליד את עזריה:

יד. ועזריה הוליד את שריה ושריה הוליד את יהוצדק:

טו. ויהוצדק הלך בהגלות יהוה את יהודה וירושלם ביד נבכדנאצר:

טז. בני לוי גרשם קהת ומררי:

יז. ואלה שמות בני גרשום לבני ושמעי:

יח. ובני קהת עמרם ויצהר וחברון ועזיאל:

יט. בני מררי מחלי ומשי ואלה משפחות הלוי לאבותיהם:

כ. לגרשום לבני בנו יחת בנו זמה בנו:

כא. יואח בנו עדו בנו זרח בנו יאתרי בנו:

כב. בני קהת עמינדב בנו קרח בנו אסיר בנו:

כג. אלקנה בנו ואביסף בנו ואסיר בנו:

כד. תחת בנו אוריאל בנו עזיה בנו ושאול בנו:

כה. ובני אלקנה עמשי ואחימות:

כו. אלקנה בנו אלקנה צופי בנו ונחת בנו:

כז. אליאב בנו ירחם בנו אלקנה בנו:

כח. ובני שמואל הבכר ושני ואביה:

כט. בני מררי מחלי לבני בנו שמעי בנו עזה בנו:

ל. שמעא בנו חגיה בנו עשיה בנו:

לא. ואלה אשר העמיד דויד על ידי שיר בית יהוה ממנוח הארון:

לב. ויהיו משרתים לפני משכן אהל מועד בשיר עד בנות שלמה את בית יהוה בירושלם ויעמדו כמשפטם על עבודתם:

לג. ואלה העמדים ובניהם מבני הקהתי הימן המשורר בן יואל בן שמואל:

לד. בן אלקנה בן ירחם בן אליאל בן תוח:

לה. בן ציף בן אלקנה בן מחת בן עמשי:

לו. בן אלקנה בן יואל בן עזריה בן צפניה:

לז. בן תחת בן אסיר בן אביסף בן קרח:

לח. בן יצהר בן קהת בן לוי בן ישראל:

לט. ואחיו אסף העמד על ימינו אסף בן ברכיהו בן שמעא:

מ. בן מיכאל בן בעשיה בן מלכיה:

מא. בן אתני בן זרח בן עדיה:

מב. בן איתן בן זמה בן שמעי:

מג. בן יחת בן גרשם בן לוי:

מד. ובני מררי אחיהם על השמאול איתן בן קישי בן עבדי בן מלוך:

מה. בן חשביה בן אמציה בן חלקיה:

מו. בן אמצי בן בני בן שמר:

מז. בן מחלי בן מושי בן מררי בן לוי:

מח. ואחיהם הלוים נתונים לכל עבודת משכן בית האלהים:

מט. ואהרן ובניו מקטירים על מזבח העולה ועל מזבח הקטרת לכל מלאכת קדש הקדשים ולכפר על ישראל ככל אשר צוה משה עבד האלהים:

נ. ואלה בני אהרן אלעזר בנו פינחס בנו אבישוע בנו:

נא. בקי בנו עזי בנו זרחיה בנו:

נב. מריות בנו אמריה בנו אחיטוב בנו:

נג. צדוק בנו אחימעץ בנו:

נד. ואלה מושבותם לטירותם בגבולם לבני אהרן למשפחת הקהתי כי להם היה הגורל:

נה. ויתנו להם את חברון בארץ יהודה ואת מגרשיה סביבתיה:

נו. ואת שדה העיר ואת חצריה נתנו לכלב בן יפנה:

נז. ולבני אהרן נתנו את ערי המקלט את חברון ואת לבנה ואת מגרשיה ואת יתר ואת אשתמע ואת מגרשיה:

נח. ואת חילז ואת מגרשיה את דביר ואת מגרשיה:

נט. ואת עשן ואת מגרשיה ואת בית שמש ואת מגרשיה:

ס. וממטה בנימן את גבע ואת מגרשיה ואת עלמת ואת מגרשיה ואת ענתות ואת מגרשיה כל עריהם שלש עשרה עיר במשפחותיהם:

סא. ולבני קהת הנותרים ממשפחת המטה ממחצית מטה חצי מנשה בגורל ערים עשר:

סב. ולבני גרשום למשפחותם ממטה יששכר וממטה אשר וממטה נפתלי וממטה מנשה בבשן ערים שלש עשרה:

סג. לבני מררי למשפחותם ממטה ראובן וממטה גד וממטה זבולן בגורל ערים שתים עשרה:

סד. ויתנו בני ישראל ללוים את הערים ואת מגרשיהם:

סה. ויתנו בגורל ממטה בני יהודה וממטה בני שמעון וממטה בני בנימן את הערים האלה אשר יקראו אתהם בשמות:

סו. וממשפחות בני קהת ויהי ערי גבולם ממטה אפרים:

סז. ויתנו להם את ערי המקלט את שכם ואת מגרשיה בהר אפרים ואת גזר ואת מגרשיה:

סח. ואת יקמעם ואת מגרשיה ואת בית חורון ואת מגרשיה:

סט. ואת אילון ואת מגרשיה ואת גת רמון ואת מגרשיה:

ע. וממחצית מטה מנשה את ענר ואת מגרשיה ואת בלעם ואת מגרשיה למשפחת לבני קהת הנותרים:

עא. לבני גרשום ממשפחת חצי מטה מנשה את גולן בבשן ואת מגרשיה ואת עשתרות ואת מגרשיה:

עב. וממטה יששכר את קדש ואת מגרשיה את דברת ואת מגרשיה:

עג. ואת ראמות ואת מגרשיה ואת ענם ואת מגרשיה:

עד. וממטה אשר את משל ואת מגרשיה ואת עבדון ואת מגרשיה:

עה. ואת חוקק ואת מגרשיה ואת רחב ואת מגרשיה:

עו. וממטה נפתלי את קדש בגליל ואת מגרשיה ואת חמון ואת מגרשיה ואת קריתים ואת מגרשיה:

עז. לבני מררי הנותרים ממטה זבולן את רמונו ואת מגרשיה את תבור ואת מגרשיה:

עח. ומעבר לירדן ירחו למזרח הירדן ממטה ראובן את בצר במדבר ואת מגרשיה ואת יהצה ואת מגרשיה:

עט. ואת קדמות ואת מגרשיה ואת מיפעת ואת מגרשיה:

פ. וממטה גד את ראמות בגלעד ואת מגרשיה ואת מחנים ואת מגרשיה:

פא. ואת חשבון ואת מגרשיה ואת יעזיר ואת מגרשיה: