שמואל ב, Chapter 23 כג

א. ואלה דברי דוד האחרנים נאם דוד בן ישי ונאם הגבר הקם על משיח אלהי יעקב ונעים זמרות ישראל:

ב. רוח יהוה דבר בי ומלתו על לשוני:

ג. אמר אלהי ישראל לי דבר צור ישראל מושל באדם צדיק מושל יראת אלהים:

ד. וכאור בקר יזרח שמש בקר לא עבות מנגה ממטר דשא מארץ:

ה. כי לא כן ביתי עם אל כי ברית עולם שם לי ערוכה בכל ושמרה כי כל ישעי וכל חפץ כי לא יצמיח:

ו. ובליעל כקוץ מנד כלהם כי לא ביד יקחו:

ז. ואיש יגע בהם ימלא ברזל ועץ חנית ובאש שרוף ישרפו בשבת:

ח. אלה שמות הגברים אשר לדוד ישב בשבת תחכמני ראש השלשי הוא עדינו העצנו על שמנה מאות חלל בפעם אחד:

ט. ואחרו אלעזר בן דדי בן אחחי בשלשה גברים עם דוד בחרפם בפלשתים נאספו שם למלחמה ויעלו איש ישראל:

י. הוא קם ויך בפלשתים עד כי יגעה ידו ותדבק ידו אל החרב ויעש יהוה תשועה גדולה ביום ההוא והעם ישבו אחריו אך לפשט:

יא. ואחריו שמא בן אגא הררי ויאספו פלשתים לחיה ותהי שם חלקת השדה מלאה עדשים והעם נס מפני פלשתים:

יב. ויתיצב בתוך החלקה ויצילה ויך את פלשתים ויעש יהוה תשועה גדולה:

יג. וירדו שלשים מהשלשים ראש ויבאו אל קציר אל דוד אל מערת עדלם וחית פלשתים חנה בעמק רפאים:

יד. ודוד אז במצודה ומצב פלשתים אז בית לחם:

טו. ויתאוה דוד ויאמר מי ישקני מים מבאר בית לחם אשר בשער:

טז. ויבקעו שלשת הגברים במחנה פלשתים וישאבו מים מבאר בית לחם אשר בשער וישאו ויבאו אל דוד ולא אבה לשתותם ויסך אתם ליהוה:

יז. ויאמר חלילה לי יהוה מעשתי זאת הדם האנשים ההלכים בנפשותם ולא אבה לשתותם אלה עשו שלשת הגברים:

יח. ואבישי אחי יואב בן צרויה הוא ראש השלשי והוא עורר את חניתו על שלש מאות חלל ולו שם בשלשה:

יט. מן השלשה הכי נכבד ויהי להם לשר ועד השלשה לא בא:

כ. ובניהו בן יהוידע בן איש חי רב פעלים מקבצאל הוא הכה את שני אראל מואב והוא ירד והכה את האריה בתוך הבאר ביום השלג:

כא. והוא הכה את איש מצרי אשר מראה וביד המצרי חנית וירד אליו בשבט ויגזל את החנית מיד המצרי ויהרגהו בחניתו:

כב. אלה עשה בניהו בן יהוידע ולו שם בשלשה הגברים:

כג. מן השלשים נכבד ואל השלשה לא בא וישמהו דוד אל משמעתו:

כד. עשה אל אחי יואב בשלשים אלחנן בן דדו בית לחם:

כה. שמה החרדי אליקא החרדי:

כו. חלץ הפלטי עירא בן עקש התקועי:

כז. אביעזר הענתתי מבני החשתי:

כח. צלמון האחחי מהרי הנטפתי:

כט. חלב בן בענה הנטפתי אתי בן ריבי מגבעת בני בנימן:

ל. בניהו פרעתני הדי מנחלי געש:

לא. אבי עלבון הערבתי עזמות הברחמי:

לב. אליחבא השעלבני בני ישן יהונתן:

לג. שמה ההררי אחיאם בן שרר האררי:

לד. אליפלט בן אחסבי בן המעכתי אליעם בן אחיתפל הגלני:

לה. חצרו הכרמלי פערי הארבי:

לו. יגאל בן נתן מצבה בני הגדי:

לז. צלק העמני נחרי הבארתי נשאי כלי יואב בן צריה:

לח. עירא היתרי גרב היתרי:

לט. אוריה החתי כל שלשים ושבעה: