דברים, Chapter 23 כג

א. לא יבא פצוע דכא וכרות שפכה בקהל יהוה:

ב. לא יבא ממזר בקהל יהוה גם דור עשירי לא יבא לו בקהל יהוה:

ג. לא יבא עמוני ומואבי בקהל יהוה גם דור עשירי לא יבא להם בקהל יהוה עד עולם:

ד. על דבר אשר לא קדמו אתכם בלחם ובמים בדרך בצאתכם ממצרים ואשר שכר עליך את בלעם בן בעור מפתור ארם נהרים לקללך:

ה. ולא אבה יהוה אלהיך לשמע אל בלעם ויהפך יהוה אלהיך לך את הקללה לברכה כי אהבך יהוה אלהיך:

ו. לא תדרש שלמם וטבתם כל ימיך לעולם:

ז. לא תתעב אדמי כי אחיך הוא לא תתעב מצרי כי גר היית בארצו:

ח. בנים אשר יולדו להם דור שלישי יבא להם בקהל יהוה:

ט. כי תצא מחנה על איביך ונשמרת מכל דבר רע:

י. כי יהיה בך איש אשר לא יהיה טהור מקרה לילה ויצא אל מחוץ למחנה לא יבא אל תוך המחנה:

יא. והיה לפנות ערב ירחץ במים וכבא השמש יבא אל תוך המחנה:

יב. ויד תהיה לך מחוץ למחנה ויצאת שמה חוץ:

יג. ויתד תהיה לך על אזנך והיה בשבתך חוץ וחפרתה בה ושבת וכסית את צאתך:

יד. כי יהוה אלהיך מתהלך בקרב מחנך להצילך ולתת איביך לפניך והיה מחניך קדוש ולא יראה בך ערות דבר ושב מאחריך:

טו. לא תסגיר עבד אל אדניו אשר ינצל אליך מעם אדניו:

טז. עמך ישב בקרבך במקום אשר יבחר באחד שעריך בטוב לו לא תוננו:

יז. לא תהיה קדשה מבנות ישראל ולא יהיה קדש מבני ישראל:

יח. לא תביא אתנן זונה ומחיר כלב בית יהוה אלהיך לכל נדר כי תועבת יהוה אלהיך גם שניהם:

יט. לא תשיך לאחיך נשך כסף נשך אכל נשך כל דבר אשר ישך:

כ. לנכרי תשיך ולאחיך לא תשיך למען יברכך יהוה אלהיך בכל משלח ידך על הארץ אשר אתה בא שמה לרשתה:

כא. כי תדר נדר ליהוה אלהיך לא תאחר לשלמו כי דרש ידרשנו יהוה אלהיך מעמך והיה בך חטא:

כב. וכי תחדל לנדר לא יהיה בך חטא:

כג. מוצא שפתיך תשמר ועשית כאשר נדרת ליהוה אלהיך נדבה אשר דברת בפיך:

כד. כי תבא בכרם רעך ואכלת ענבים כנפשך שבעך ואל כליך לא תתן:

כה. כי תבא בקמת רעך וקטפת מלילת בידך וחרמש לא תניף על קמת רעך: