יוחנן, Chapter 16 טז

א. את אלה דברתי אליכם למען לא תכשלו:

ב. הנה ינדו אתכם ואף באה השעה אשר כל הרג אתכם ידמה להקריב עבודה לאלהים:

ג. וכזאת יעשו לכם יען גם את אבי וגם אתי לא ידעו:

ד. אבל הגדתי לכם את אלה למען אשר בבא השעה תזכרום כי אנכי אמרתי אליכם וכאלה לא אמרתי אליכם מראש כי הייתי עמכם:

ה. ועתה הלך אנכי אל שלחי ולא ישאלני איש מכם אנה תלך:

ו. אך על דברי את אלה אליכם מלא לבבכם עצבת:

ז. אולם האמת אגיד לכם כי לכתי אך טוב לכם כי אם לא אלך לא יבא אליכם הפרקליט ואם אלך אשלחהו אליכם:

ח. והיה בבאו יוכיח את העולם על דבר החטא והצדק והמשפט:

ט. על החטא כי לא האמינו בי:

י. ועל הצדק כי אלך אל אבי ולא תוסיפו לראות אתי:

יא. ועל המשפט כי נדון שר העולם הזה:

יב. עוד רבות לי להגיד לכם אך לא תוכלון שאת עתה:

יג. ורוח האמת בבאו הוא ידריך אתכם אל כל האמת כי לא ידבר מעצמו כי אם אשר ישמע ידבר והאתיות יגיד לכם:

יד. הוא יפארני כי משלי יקח ויגיד לכם:

טו. כל אשר לאבי לי הוא על כן אמרתי כי משלי יקח ויגיד לכם:

טז. הן מעט ולא תראוני ועוד מעט ותחזוני כי אני הלך אל אבי:

יז. ומקצת תלמידיו נדברו איש אל אחיו לאמר מה זה אמר אלינו הן מעט ולא תראוני ועוד מעט ותחזוני ואמרו אני הלך אל אבי:

יח. ויאמרו מה זה אשר אמר מעט לא ידענו מה דבר:

יט. וידע ישוע כי עם לבבם לשאל אתו ויאמר אליהם העל זאת אתם דרשים ביניכם כי אמרתי הן מעט ולא תראוני ועוד מעט ותחזוני:

כ. אמן אמן אני אמר לכם כי אתם תבכו ותילילו והעולם ישמח הן אתם תעצבו אכן עצבכם יהפך לששון:

כא. האשה בלדתה עצב לה כי באה עתה ואחרי ילדה את הילד לא תזכר עוד את עצבונה משמחתה כי אדם נולד לעולם:

כב. וגם אתם כעת תתעצבו אך אשוב אראה אתכם ושש לבכם ואין לקח שמחתכם מכם:

כג. וביום ההוא לא תשאלוני דבר אמן אמן אני אמר לכם כי כל אשר תשאלו מאת אבי בשמי יתננו לכם:

כד. עד עתה לא שאלתם דבר בשמי שאלו ותקחו למען תמלא שמחתכם:

כה. את אלה דברתי אליכם במשלים אכן שעה באה ולא אדבר עוד אליכם במשלים כי אם ברור אמלל לכם על אבי:

כו. ביום ההוא תשאלו בשמי ואינני אמר לכם כי אני אעתיר לאבי בעדכם:

כז. כי אבי גם הוא אהב אתכם עקב אשר אהבתוני והאמנתם כי מאת אלהים יצאתי:

כח. מאת האב יצאתי ואבא לעולם אשובה אעזב את העולם ואלך אל אבי:

כט. ויאמרו אליו תלמידיו הנה כעת ברור תמלל ולא תמשל משל:

ל. עתה ידענו כי כל ידעת ולא תצטרך כי ישאלך איש בזאת נאמין כי מאת אלהים יצאת:

לא. ויען אתם ישוע עתה תאמינו:

לב. הנה שעה באה ועתה זה הגיעה ונפצותם איש איש לביתו ואתי תעזבו לבדי ואינני לבדי כי אבי עמדי:

לג. את אלה דברתי אליכם למען בי יהיה לכם שלום בעולם יהיה לכם עני אך יאמץ לבבכם אני נצחתי את העולם: