לוקס, Chapter 19 יט

א. ויבוא ויעבר ביריחו:

ב. והנה איש ושמו זכי מראשי המוכסים והוא עשיר:

ג. ויבקש לראות את ישוע מי הוא ולא יכל מפני העם כי שפל קומה היה:

ד. ויקדם וירץ ויעל על שקמה לראותו כי שם הדרך אשר יעבר בה:

ה. ויהי בבאו אל המקום ההוא ויבט ישוע ויראהו ויאמר אליו זכי רד מהר כי צריך אני לשבת היום בביתך:

ו. וימהר וירד ויאספהו בשמחה:

ז. וילונו כל הראים לאמר בא ללון בבית איש חוטא:

ח. ויעמד זכי ויאמר אל האדון הנה אדני את מחצית נכסי אני נתן לעניים ואם עשקתי איש אשיב לו ארבעתים:

ט. ויאמר אליו ישוע היום היתה תשועה לבית הזה באשר בן אברהם גם הוא:

י. כי בא בן האדם לבקש ולהושיע את האבד:

יא. ויהי הם שמעים את זאת ויסף שאת משל על אשר קרב לירושלים והמה חשבים כי מהרה תגלה מלכות האלהים:

יב. על כן אמר איש אחד מן האדירים הלך אל ארץ רחוקה לקחת לו ממלכה ולשוב:

יג. ויקרא אל עשרה מעבדיו ויתן להם עשרה מנים ויאמר להם סחרו בהם עד באי:

יד. ובני עירו שנאים אותו וישלחו מלאכים אחריו לאמר לא נחפץ בזה כי ימלך עלינו:

טו. ויהי אחרי קחתו את הממלכה וישב ויאמר לקרא את העבדים ההם אשר נתן להם את הכסף למען ידע מה הרויח כל אחד במסחרו:

טז. ויבא הראשון ויאמר אדני מנה שלך הביא עשרת מנים:

יז. ויאמר אליו כן העבד הטוב תחת אשר היית נאמן במעט מזער היה שליט על עשר ערים:

יח. ויבא השני ויאמר אדני מנה שלך עשה חמשת מנים:

יט. ויאמר גם לזה אף אתה היה על חמש ערים:

כ. ויבא האחר ויאמר הא לך מנה שלך אשר היה אצלי צרור בסודר:

כא. מפני יראתי אתך כי אתה איש קשה לקח את אשר לא הנחת וקצר את אשר לא זרעת:

כב. ויאמר אליו מפיך אשפטך העבד הרע אתה ידעת כי אני איש קשה לקח את אשר לא הנחתי וקוצר את אשר לא זרעתי:

כג. ולמה לא נתת את כספי לשלחני ואני בבואי הייתי תובע אותו במרבית:

כד. ויאמר אל העמדים שם שאו ממנו את המנה ותנוהו אל אשר לו עשרת המנים:

כה. ויאמרו אליו אדנינו יש לו עשרת מנים:

כו. הן אני אמר לכם כי כל איש שיש לו ינתן לו ואשר אין לו יקח ממנו גם את אשר לו:

כז. אבל את איבי ההם אשר לא חפצו מלכי עליהם הביאו אתם הנה והרגו אתם לפני:

כח. ויכל לדבר הדברים האלה ויעבר לפניהם ויעל ירושלים:

כט. ויהי בקרבו אל בית פגי ובית היני בהר הנקרא הר הזיתים וישלח שנים מתלמידיו לאמר:

ל. לכו אל הכפר אשר ממולנו והיה בבואכם שמה תמצאו עיר אסור אשר לא ישב עליו אדם עד עתה התירו אתו והביאו:

לא. וכי ישאל אתכם איש למה תתירהו כה תאמרו אליו יען כי האדון צריך לו:

לב. וילכו השלוחים וימצאו כאשר דבר אליהם:

לג. ויתירו את העיר ויאמר אליהם בעליו למה זה אתם מתירים את העיר:

לד. ויאמרו האדון צריך לו:

לה. ויביאהו אל ישוע וישליכו את בגדיהם על העיר וירכיבו עליו את ישוע:

לו. ובנסעו הציעו את בגדיהם על הדרך:

לז. ויקרב אל מורד הר הזיתים ויחלו כל המון התלמידים לשבח את האלהים בשמחה ובקול גדול על כל הגבורות אשר ראו לאמר:

לח. ברוך המלך הבא בשם יהוה שלום בשמים וכבוד במרומים:

לט. ומקצת פרושים אשר בתוך העם אמרו אליו רבי גער בתלמידיך:

מ. ויען ויאמר אני אמר לכם כי אם יחשו אלה תזעקנה האבנים:

מא. ויהי כאשר קרב וירא את העיר ויבך עליה לאמר:

מב. לו ידעת אף את בעוד יומך הזה את דבר שלומך ועתה נעלם מעיניך:

מג. כי ימים באים עליך ושפכו איביך סוללה סביביך והקיפוך וצרו עליך מכל עבריך:

מד. וסחבו אותך ואת בניך בקרבך ולא ישאירו בך אבן על אבן עקב כי לא ידעת את עת פקדתך:

מה. ויבא אל המקדש ויחל לגרש משם את המכרים ואת הקונים בו:

מו. ויאמר אליהם הן כתוב ביתי בית תפלה הוא ואתם עשתים אותו למערת פריצים:

מז. ויהי מלמד יום יום במקדש והכהנים הגדולים והסופרים וגם ראשי העם מבקשים לאבדו:

מח. ולא מצאו מה לעשות כי כל העם דבקו אחריו לשמע אתו: