מרקוס, Chapter 1 א

א. ראשית בשורת ישוע המשיח בן האלהים:

ב. ככתוב בנביאים הנני שלח מלאכי לפניך ופנה דרכך לפניך:

ג. קול קורא במדבר פנו דרך יהוה ישרו מסלותיו:

ד. ויהי יוחנן טבל במדבר וקורא טבילת התשובה לסליחת החטאים:

ה. ותצא אליו כל ארץ יהודה ובני ירושלים ויטבלו כלם על ידו בנהר הירדן מתודים את חטאתם:

ו. ויוחנן לבוש שער גמלים ואזור עור במתניו ואכל חגבים ודבש היער:

ז. ויקרא לאמר בוא יבא אחרי החזק ממני אשר אינני כדי לכרע ולהתיר את שרוך נעליו:

ח. אנכי טבלתי אתכם במים והוא יטבל אתכם ברוח הקדש:

ט. ויהי בימים ההם ויבא ישוע מנצרת אשר בגליל ויטבל על ידי יוחנן בירדן:

י. ויהי אך עלה עלה מן המים וירא את השמים נבקעים והרוח כיונה ירדת עליו:

יא. ויהי קול מן השמים אתה בני ידידי אשר רצתה נפשי בו:

יב. ואחרי כן הוציאו הרוח המדברה:

יג. ויהי שם במדבר ארבעים יום והשטן נסהו ויהי עם החיות והמלאכים שרתוהו:

יד. ואחרי אשר הסגר יוחנן בא ישוע הגלילה ויקרא את בשורת מלכות האלהים לאמר:

טו. מלאה העת והגיעה מלכות האלהים שובו והאמינו בבשורה:

טז. ויהי בהתהלכו על יד ים הגליל וירא את שמעון ואת אנדרי אחי שמעון פרשים מצודה בים כי דיגים היו:

יז. ויאמר אליהם ישוע לכו אחרי ואשימכם לדיגי אנשים:

יח. ויעזבו מהר את מכמרתיהם וילכו אחריו:

יט. ויהי כעברו מעט משם וירא את יעקב בן זבדי ואת יוחנן אחיו וגם המה באניה מתקנים את המכמרות:

כ. ויקרא מהרה אליהם ויעזבו את זבדי אביהם באניה עם השכירים וילכו אחריו:

כא. ויבאו אל כפר נחום וימהר לבוא בשבת לבית הכנסת וילמד:

כב. וישתוממו על תורתו כי היה מלמדם כבעל גבורה ולא כספרים:

כג. ואיש היה בבית כנסתם אשר רוח טמאה בו ויצעק לאמר:

כד. אהה מה לנו ולך ישוע הנצרי באת להאבידנו ידעתי מי אתה קדוש האלהים:

כה. ויגער בו ישוע לאמר האלם וצא ממנו:

כו. ויסחבהו רוח הטמאה ויצעק בקול גדול ויצא ממנו:

כז. ויבהלו כלם וישאלו איש את רעהו לאמר מה זאת מה היא התורה החדשה אשר אף לרוחות הטמאה בגבורה הוא מצוה והנה שמעות לו:

כח. ויצא שמעו מהר בכל מקמות ארץ הגליל:

כט. ויהי אחרי צאתם מבית הכנסת ויבאו ביתה שמעון ואנדרי המה ויעקב ויוחנן עמם:

ל. וחמות שמעון שכבה אחוזת הקדחת וימהרו לדבר אליו עליה:

לא. ויגש ויאחז בידה ויקימה ותרף ממנה הקדחת פתאם ותשרת אותם:

לב. ויהי בערב כבוא השמש ויביאו אליו את כל החולים ואת אחוזי השדים:

לג. וכל העיר נאספו יחדו פתח הבית:

לד. וירפא רבים אשר היו חולים חליים שונים ויגרש שדים הרבה ולא נתן את השדים לדבר כי ידעהו:

לה. וישכם ממחרת בעוד לילה ויצא וילך אל מקום חרבה ויתפלל שם:

לו. וירדפו אחריו שמעון והאנשים אשר אתו:

לז. וימצאהו ויאמרו אליו הנה כלם מבקשים אותך:

לח. ויאמר אליהם נעברה מזה אל ערי הפרזות הקרבות ואקרא גם שם כי בעבור זאת יצאתי:

לט. ויהי קרא בבתי כנסיותיהם בכל הגליל ויגרש את השדים:

מ. ויבוא אליו איש מצרע ויתחנן אליו ויכרע על ברכיו ויאמר לו אם תרצה תוכל לטהרני:

מא. וירחם עליו וישלח את ידו ויגע בו ויאמר רצה אנכי טהר:

מב. עודנו מדבר והצרעת סרה ממנו ויטהר:

מג. ויגער בו וימהר להוציאו החוצה:

מד. ויאמר אליו ראה אל תספר דבר לאיש כי אם לך הראה אל הכהן והקרב על טהרתך את אשר צוה משה לעדות להם:

מה. אך הוא בצאתו החל לקרא הרבה ולהשמיע הדבר עד אשר לא יכל לבוא עוד אל עיר בגלוי כי אם היה ישב מחוץ לעיר במקמות חרבה ויבאו אליו מכל עבריו: