מרקוס, Chapter 3 ג

א. וישב ויבאו אל בית הכנסת ושם איש אשר ידו יבשה:

ב. ויתבוננו בו אם ירפאהו בשבת למען ימצאו עליו שטנה:

ג. ויאמר אל האיש אשר יבשה ידו קום עמד בתוך:

ד. ויאמר אליהם הנכון בשבת להיטיב או להרע להציל נפש או לאבדה ויחרישו:

ה. ויבט אליהם סביב בחמה ויתעצב על טמטום לבבם ויאמר אל האיש פשט את ידך ויפשט ידו ותרפא ותשב כאחרת:

ו. והפרושים יצאו מהרה ויתיעצו עליו עם ההורדוסיים לאבדו:

ז. וישוע סר משם עם תלמידיו אל יד הים וילכו אחריו המון עם רב מן הגליל ומיהודה:

ח. ומירושלים ומאדום ומעבר הירדן ומסביבות צור וצידון המון רב אשר שמעו את כל אשר עשה ויבאו אליו:

ט. ויאמר אל תלמידיו כי יכינו לו אניה קטנה מפני העם למען לא ילחצוהו:

י. כי רפא לרבים עד כי התנפלו עליו כל המנגעים לנגע בו:

יא. והרוחות הטמאות כראותן אתו נפלו לפניו ותצעקנה לאמר אתה הוא בן אלהים:

יב. ויגער בהן מאד אשר לא תגלינה אותו:

יג. ויעל אל ההר ויקרא אל אשר הוא חפץ בם ויבאו אליו:

יד. וישם שנים עשר איש למען יהיו אתו ולמען ישלחם לקרא:

טו. והיה להם השלטן לרפא את התחלאים ולגרש את השדים:

טז. ויכנה את שמעון בשם פטרוס:

יז. ואת יעקב בן זבדי ואת יוחנן אחי יעקב ויכנה אתם בשם בני רגוש הוא בני רעם:

יח. ואת אנדרי ואת פילפוס ואת בר תלמי ואת מתי ואת תומא ואת יעקב בן חלפי ואת תדי ואת שמעון הקני:

יט. ואת יהודה איש קריות אשר גם מסרו:

כ. ויבאו הביתה וישב המון העם להתאסף עד כי לא יכלו אף לאכל לחם:

כא. וישמעו קרוביו ויצאו להחזיק בו כי אמרו יצא מדעתו:

כב. והסופרים אשר ירדו מירושלים אמרו כי בעל זבוב נכנס בו ועל ידי שר השדים הוא מגרש את השדים:

כג. ויקרא אותם אליו וידבר להם במשלים לאמר איך יוכל השטן לגרש השטן:

כד. ואם נחלקה ממלכה על עצמה לא תוכל לעמד הממלכה ההיא:

כה. ובית אם נחלק על עצמו לא יוכל לעמד הבית ההוא:

כו. ואם השטן יתקומם אל עצמו ונחלק לא יוכל לעמד כי בא קצו:

כז. אין איש אשר יכל לבוא לבית הגבור ולגזל את כליו אם לא יאסר בראשונה את הגבור ואחר ישסה את ביתו:

כח. אמן אמר אני לכם כי כל החטאים יסלחו לבני אדם וכל הגדופים אשר יגדפו:

כט. אך המגדף את רוח הקדש אין לו סליחה לעולם כי יאשם בעונו לנצח:

ל. כי המה אמרו רוח טמאה בו:

לא. ויבאו אמו ואחיו ויעמדו מחוץ לבית וישלחו אליו לקרא לו:

לב. והמון העם ישבו סביביו ויאמרו אליו הנה אמך ואחיך בחוץ מבקשים אותך:

לג. ויען ויאמר אליהם מי הם אמי ואחי:

לד. ויבט סביב אל הישבים סביביו ויאמר הנה אמי ואחי:

לה. כי כל אשר יעשה רצון האלהים הוא אחי ואחותי ואמי: