מתי, Chapter 14 יד

א. בעת ההיא שמע הורדוס שר רבע המדינה את שמע ישוע:

ב. ויאמר אל נעריו זה הוא יוחנן המטביל והוא קם מן המתים על כן הגבורות פעלות בו:

ג. כי הורדוס תפש את יוחנן ויאסרהו וישימהו בבית הסהר בגלל הורודיה אשת פילפוס אחיו:

ד. כי יוחנן אמר אליו לא נכון היתה לך לאשה:

ה. ויבקש המיתו אך ירא את ההמון כי לנביא חשבו אתו:

ו. ויהי ביום הלדת הורדוס ותרקד בת הורודיה בתוכם ותיטב בעיני הורדוס:

ז. וישבע לה ויאמר מה תשאל נפשך ואתן לך:

ח. ואמה שמה את הדברים בפיה ותשאל לאמר תנה לי פה בקערה את ראש יוחנן המטביל:

ט. ויעצב המלך אך בעבור השבועה והמסבים עמו צוה לתת לה:

י. וישלח וישא את ראש יוחנן מעליו בבית הסהר:

יא. ויביאו את ראשו בקערה ויתנו לנערה ותביאהו אל אמה:

יב. ויגשו תלמידיו וישאו את גויתו ויקברוה וילכו ויגידו לישוע:

יג. ויהי כשמעו את זאת ויסר משם באניה אל מקום חרבה לבדד וישמעו המון העם וילכו אחריו ברגליהם מן הערים:

יד. ויצא ישוע וירא המון עם רב ויהמו מעיו עליהם וירפא את החלשים אשר בהם:

טו. ויהי לפנות ערב ויגשו אליו תלמידיו ויאמרו המקום חרב וגם נטה היום שלחה את המון העם וילכו אל הכפרים לקנות להם אכל:

טז. ויאמר אליהם אינם צריכים ללכת תנו אתם להם לאכל:

יז. ויאמרו אליו אין לנו פה כי אם חמשת ככרות לחם ושני דגים:

יח. ויאמר הביאום אלי הלם:

יט. ויצו את העם לשבת על הדשא ויקח את חמשת ככרות הלחם ואת שני הדגים וישא עיניו השמימה ויברך ויפרס ויתן את הלחם לתלמידים והתלמידים נתנו לעם:

כ. ויאכלו כלם וישבעו וישאו מן הפתותים הנותרים שנים עשר סלים מלאים:

כא. והאכלים היו כחמשת אלפי איש מלבד הנשים והטף:

כב. ויאץ ישוע בתלמידיו לרדת באניה לעבר לפניה אל עבר הים עד אשר ישלח את העם:

כג. ואחרי שלחו את העם עלה ההרה בדד להתפלל ויהי ערב והוא לבדו שמה:

כד. והאניה הלכה בתוך הים ותטרף מן הגלים כי הרוח לנגדה:

כה. ויהי באשמרת הרביעית ויבא אליהם ישוע מתהלך על פני הים:

כו. והתלמידים בראתם אותו מתהלך על פני הים נבהלו לאמר מראה רוח הוא ויצעקו מפחד:

כז. וידבר ישוע פתאם אליהם חזקו כי אני הוא אל תיראו:

כח. ויען פטרוס ויאמר אליו אם אתה הוא אדני צוה נא כי אבא אליך על המים:

כט. ויאמר בוא וירד פטרוס מן האניה ויתהלך על המים לבוא אל ישוע:

ל. ויהי כראתו את הרוח כי חזקה היא ויירא ויחל לטבע ויצעק לאמר אדני הושיעני:

לא. וימהר ישוע לשלח את ידו ויחזק בו ויאמר אליו קטן האמונה למה לחק לבך:

לב. הם עלו אל האניה והרוח שככה:

לג. ואנשי האניה נגשו וישתחוו לו לאמר באמת בן אלהים אתה:

לד. ויעברו את הים ויבאו ארצה גניסר:

לה. ויכירו אתו אנשי המקום ההוא וישלחו אל כל סביבותיהם ויביאו אליו את כל החולים:

לו. ויבקשו ממנו כי יגעו רק בציצת בגדו וכל הנגעים נושעו: