מתי, Chapter 8 ח

א. וירד מן ההר וילך אחריו המון עם רב:

ב. והנה איש מצרע בא וישתחו לו ויאמר אדני אם תרצה תוכל לטהרני:

ג. וישלח ישוע את ידו ויגע בו ויאמר חפץ אנכי טהר ומיד נרפאה צרעתו:

ד. ויאמר אליו ישוע ראה פן תספר לאיש כי אם לך לך והראה אל הכהן והקרב את הקרבן אשר צוה משה לעדות להם:

ה. ויהי כבאו אל כפר נחום ויגש אליו שר מאה אחד ויתחנן לו לאמר:

ו. אדני הנה נערי נפל למשכב בביתי והוא נכה אברים ומענה עד מאד:

ז. ויאמר ישוע אליו אבא וארפאהו:

ח. ויען שר המאה ויאמר אדני נקלתי מבאך בצל קורתי אך דבר נא רק דבר ונרפא נערי:

ט. כי אנכי איש נתון תחת השלטון וגם יש תחת ידי אנשי צבא ואמרתי לזה לך והלך ולזה בוא ובא ולעבדי עשה זאת ועשה:

י. וישמע ישוע ויתמה ויאמר אל ההלכים אחריו אמן אמר אני לכם גם בישראל לא מצאתי אמונה גדולה כזאת:

יא. ואני אמר לכם רבים יבאו ממזרח וממערב ויסבו עם אברהם ויצחק ויעקב במלכות השמים:

יב. אבל בני המלכות המה יגרשו אל החשך החיצון שם תהיה היללה וחרוק השנים:

יג. ויאמר ישוע אל שר המאה לך וכאמונתך כן יהיה לך וירפא נערו בשעה ההיא:

יד. ויבא ישוע ביתה פטרוס וירא את חמותו נפלת למשכב כי אחזתה הקדחת:

טו. ויגע בידה ותרף ממנה הקדחת ותקם ותשרתם:

טז. ויהי לעת ערב ויביאו אליו רבים אחוזי שדים ויגרש את הרוחות בדבר וירפא את כל החולים:

יז. למלאת את אשר דבר ישעיהו הנביא לאמר חלינו הוא נשא ומכאבינו סבלם:

יח. ויהי כראות ישוע המון עם רב סביבתיו ויצו לעבר משם אל עבר הים:

יט. ויגש אליו אחד הסופרים ויאמר אליו רבי אלכה אחריך אל כל אשר תלך:

כ. ויאמר אליו ישוע לשועלים יש חורי עפר ולעוף השמים קנים ובן האדם אין לו מקום להניח שם את ראשו:

כא. ואחר מן התלמידים אמר אליו אדני הניחה לי בראשונה ללכת ולקבר את אבי:

כב. ויאמר אליו ישוע לך אחרי והנח למתים לקבר את מתיהם:

כג. וירד אל האניה וירדו אתו תלמידיו:

כד. והנה סער גדול היה בים ותכסה האניה בגלים והוא ישן:

כה. ויגשו אליו תלמידיו ויעירו אותו לאמר הושיענו אדנינו אבדנו:

כו. ויאמר אליהם קטני האמונה למה זה יראתם ויקם ויגער ברוחות ובים ותהי דממה גדולה:

כז. ויתמהו האנשים ויאמרו מי אפוא הוא אמר גם הרוחות והים לו ישמעון:

כח. ויהי כבאו אל עבר הים אל ארץ הגרגשים ויפגשוהו שני אנשים אחוזי שדים יצאים מבתי הקברות והמה רגונים מאד עד אשר לא יכל איש לעבר בדרך ההוא:

כט. והנה הם צעקים לאמר מה לנו ולך ישוע בן האלהים הבאת הלם לענותנו בלא עתנו:

ל. ועדר חזירים רבים היה שם במרעה הרחק מהם:

לא. ויתחננו אליו השדים לאמר אם תגרשנו שלחנו בעדר החזירים:

לב. ויאמר אליהם לכו לכם ויצאו ויבאו בעדר החזירים והנה השתער כל עדר החזירים מן המורד על הים וימותו במים:

לג. וינוסו הרעים ויבאו העירה ויגידו את הכל ואת אשר נעשה לאחוזי השדים:

לד. והנה כל העיר יצאה לקראת ישוע וכראותם אתו ויבקשו ממנו לעבר מגבולם: