משלי, Chapter 23 כג

א. כי תשב ללחום את מושל בין תבין את אשר לפניך:

ב. ושמת שכין בלעך אם בעל נפש אתה:

ג. אל תתאו למטעמותיו והוא לחם כזבים:

ד. אל תיגע להעשיר מבינתך חדל:

ה. התעוף עיניך בו ואיננו כי עשה יעשה לו כנפים כנשר ועיף השמים:

ו. אל תלחם את לחם רע עין ואל תתאו למטעמתיו:

ז. כי כמו שער בנפשו כן הוא אכל ושתה יאמר לך ולבו בל עמך:

ח. פתך אכלת תקיאנה ושחת דבריך הנעימים:

ט. באזני כסיל אל תדבר כי יבוז לשכל מליך:

י. אל תסג גבול עולם ובשדי יתומים אל תבא:

יא. כי גאלם חזק הוא יריב את ריבם אתך:

יב. הביאה למוסר לבך ואזנך לאמרי דעת:

יג. אל תמנע מנער מוסר כי תכנו בשבט לא ימות:

יד. אתה בשבט תכנו ונפשו משאול תציל:

טו. בני אם חכם לבך ישמח לבי גם אני:

טז. ותעלזנה כליותי בדבר שפתיך מישרים:

יז. אל יקנא לבך בחטאים כי אם ביראת יהוה כל היום:

יח. כי אם יש אחרית ותקותך לא תכרת:

יט. שמע אתה בני וחכם ואשר בדרך לבך:

כ. אל תהי בסבאי יין בזללי בשר למו:

כא. כי סבא וזולל יורש וקרעים תלביש נומה:

כב. שמע לאביך זה ילדך ואל תבוז כי זקנה אמך:

כג. אמת קנה ואל תמכר חכמה ומוסר ובינה:

כד. גול יגול אבי צדיק יולד חכם וישמח בו:

כה. ישמח אביך ואמך ותגל יולדתך:

כו. תנה בני לבך לי ועיניך דרכי תרצנה:

כז. כי שוחה עמקה זונה ובאר צרה נכריה:

כח. אף היא כחתף תארב ובוגדים באדם תוסף:

כט. למי אוי למי אבוי למי מדונים למי שיח למי פצעים חנם למי חכללות עינים:

ל. למאחרים על היין לבאים לחקר ממסך:

לא. אל תרא יין כי יתאדם כי יתן בכיס עינו יתהלך במישרים:

לב. אחריתו כנחש ישך וכצפעני יפרש:

לג. עיניך יראו זרות ולבך ידבר תהפכות:

לד. והיית כשכב בלב ים וכשכב בראש חבל:

לה. הכוני בל חליתי הלמוני בל ידעתי מתי אקיץ אוסיף אבקשנו עוד: