א. למנצח מזמור לדוד חלצני יהוה מאדם רע מאיש חמסים תנצרני:
ב. אשר חשבו רעות בלב כל יום יגורו מלחמות:
ג. שננו לשונם כמו נחש חמת עכשוב תחת שפתימו סלה:
ד. שמרני יהוה מידי רשע מאיש חמסים תנצרני אשר חשבו לדחות פעמי:
ה. טמנו גאים פח לי וחבלים פרשו רשת ליד מעגל מקשים שתו לי סלה:
ו. אמרתי ליהוה אלי אתה האזינה יהוה קול תחנוני:
ז. יהוה אדני עז ישועתי סכתה לראשי ביום נשק:
ח. אל תתן יהוה מאויי רשע זממו אל תפק ירומו סלה:
ט. ראש מסבי עמל שפתימו יכסומו:
י. ימיטו עליהם גחלים באש יפלם במהמרות בל יקומו:
יא. איש לשון בל יכון בארץ איש חמס רע יצודנו למדחפת:
יב. ידעת כי יעשה יהוה דין עני משפט אבינים:
יג. אך צדיקים יודו לשמך ישבו ישרים את פניך: