תהילים, Chapter 22 כב

א. למנצח על אילת השחר מזמור לדוד אלי אלי למה עזבתני רחוק מישועתי דברי שאגתי:

ב. אלהי אקרא יומם ולא תענה ולילה ולא דומיה לי:

ג. ואתה קדוש יושב תהלות ישראל:

ד. בך בטחו אבתינו בטחו ותפלטמו:

ה. אליך זעקו ונמלטו בך בטחו ולא בושו:

ו. ואנכי תולעת ולא איש חרפת אדם ובזוי עם:

ז. כל ראי ילעגו לי יפטירו בשפה יניעו ראש:

ח. גל אל יהוה יפלטהו יצילהו כי חפץ בו:

ט. כי אתה גחי מבטן מבטיחי על שדי אמי:

י. עליך השלכתי מרחם מבטן אמי אלי אתה:

יא. אל תרחק ממני כי צרה קרובה כי אין עוזר:

יב. סבבוני פרים רבים אבירי בשן כתרוני:

יג. פצו עלי פיהם אריה טרף ושאג:

יד. כמים נשפכתי והתפרדו כל עצמותי היה לבי כדונג נמס בתוך מעי:

טו. יבש כחרש כחי ולשוני מדבק מלקוחי ולעפר מות תשפתני:

טז. כי סבבוני כלבים עדת מרעים הקיפוני כארי ידי ורגלי:

יז. אספר כל עצמותי המה יביטו יראו בי:

יח. יחלקו בגדי להם ועל לבושי יפילו גורל:

יט. ואתה יהוה אל תרחק אילותי לעזרתי חושה:

כ. הצילה מחרב נפשי מיד כלב יחידתי:

כא. הושיעני מפי אריה ומקרני רמים עניתני:

כב. אספרה שמך לאחי בתוך קהל אהללך:

כג. יראי יהוה הללוהו כל זרע יעקב כבדוהו וגורו ממנו כל זרע ישראל:

כד. כי לא בזה ולא שקץ ענות עני ולא הסתיר פניו ממנו ובשועו אליו שמע:

כה. מאתך תהלתי בקהל רב נדרי אשלם נגד יראיו:

כו. יאכלו ענוים וישבעו יהללו יהוה דרשיו יחי לבבכם לעד:

כז. יזכרו וישבו אל יהוה כל אפסי ארץ וישתחוו לפניך כל משפחות גוים:

כח. כי ליהוה המלוכה ומשל בגוים:

כט. אכלו וישתחוו כל דשני ארץ לפניו יכרעו כל יורדי עפר ונפשו לא חיה:

ל. זרע יעבדנו יספר לאדני לדור:

לא. יבאו ויגידו צדקתו לעם נולד כי עשה: