א. למנצח מזמור לדוד בך יהוה חסיתי אל אבושה לעולם בצדקתך פלטני:
ב. הטה אלי אזנך מהרה הצילני היה לי לצור מעוז לבית מצודות להושיעני:
ג. כי סלעי ומצודתי אתה ולמען שמך תנחני ותנהלני:
ד. תוציאני מרשת זו טמנו לי כי אתה מעוזי:
ה. בידך אפקיד רוחי פדיתה אותי יהוה אל אמת:
ו. שנאתי השמרים הבלי שוא ואני אל יהוה בטחתי:
ז. אגילה ואשמחה בחסדך אשר ראית את עניי ידעת בצרות נפשי:
ח. ולא הסגרתני ביד אויב העמדת במרחב רגלי:
ט. חנני יהוה כי צר לי עששה בכעס עיני נפשי ובטני:
י. כי כלו ביגון חיי ושנותי באנחה כשל בעוני כחי ועצמי עששו:
יא. מכל צררי הייתי חרפה ולשכני מאד ופחד למידעי ראי בחוץ נדדו ממני:
יב. נשכחתי כמת מלב הייתי ככלי אבד:
יג. כי שמעתי דבת רבים מגור מסביב בהוסדם יחד עלי לקחת נפשי זממו:
יד. ואני עליך בטחתי יהוה אמרתי אלהי אתה:
טו. בידך עתתי הצילני מיד אויבי ומרדפי:
טז. האירה פניך על עבדך הושיעני בחסדך:
יז. יהוה אל אבושה כי קראתיך יבשו רשעים ידמו לשאול:
יח. תאלמנה שפתי שקר הדברות על צדיק עתק בגאוה ובוז:
יט. מה רב טובך אשר צפנת ליראיך פעלת לחסים בך נגד בני אדם:
כ. תסתירם בסתר פניך מרכסי איש תצפנם בסכה מריב לשנות:
כא. ברוך יהוה כי הפליא חסדו לי בעיר מצור:
כב. ואני אמרתי בחפזי נגרזתי מנגד עיניך אכן שמעת קול תחנוני בשועי אליך:
כג. אהבו את יהוה כל חסידיו אמונים נצר יהוה ומשלם על יתר עשה גאוה:
כד. חזקו ויאמץ לבבכם כל המיחלים ליהוה: