א. שגיון לדוד אשר שר ליהוה על דברי כוש בן ימיני יהוה אלהי בך חסיתי הושיעני מכל רדפי והצילני:
ב. פן יטרף כאריה נפשי פרק ואין מציל:
ג. יהוה אלהי אם עשיתי זאת אם יש עול בכפי:
ד. אם גמלתי שולמי רע ואחלצה צוררי ריקם:
ה. ירדף אויב נפשי וישג וירמס לארץ חיי וכבודי לעפר ישכן סלה:
ו. קומה יהוה באפך הנשא בעברות צוררי ועורה אלי משפט צוית:
ז. ועדת לאמים תסובבך ועליה למרום שובה:
ח. יהוה ידין עמים שפטני יהוה כצדקי וכתמי עלי:
ט. יגמר נא רע רשעים ותכונן צדיק ובחן לבות וכליות אלהים צדיק:
י. מגני על אלהים מושיע ישרי לב:
יא. אלהים שופט צדיק ואל זעם בכל יום:
יב. אם לא ישוב חרבו ילטוש קשתו דרך ויכוננה:
יג. ולו הכין כלי מות חציו לדלקים יפעל:
יד. הנה יחבל און והרה עמל וילד שקר:
טו. בור כרה ויחפרהו ויפל בשחת יפעל:
טז. ישוב עמלו בראשו ועל קדקדו חמסו ירד:
יז. אודה יהוה כצדקו ואזמרה שם יהוה עליון: