א. למנצח על הגתית לאסף הרנינו לאלהים עוזנו הריעו לאלהי יעקב:
ב. שאו זמרה ותנו תף כנור נעים עם נבל:
ג. תקעו בחדש שופר בכסה ליום חגנו:
ד. כי חק לישראל הוא משפט לאלהי יעקב:
ה. עדות ביהוסף שמו בצאתו על ארץ מצרים שפת לא ידעתי אשמע:
ו. הסירותי מסבל שכמו כפיו מדוד תעברנה:
ז. בצרה קראת ואחלצך אענך בסתר רעם אבחנך על מי מריבה סלה:
ח. שמע עמי ואעידה בך ישראל אם תשמע לי:
ט. לא יהיה בך אל זר ולא תשתחוה לאל נכר:
י. אנכי יהוה אלהיך המעלך מארץ מצרים הרחב פיך ואמלאהו:
יא. ולא שמע עמי לקולי וישראל לא אבה לי:
יב. ואשלחהו בשרירות לבם ילכו במועצותיהם:
יג. לו עמי שמע לי ישראל בדרכי יהלכו:
יד. כמעט אויביהם אכניע ועל צריהם אשיב ידי:
טו. משנאי יהוה יכחשו לו ויהי עתם לעולם:
טז. ויאכילהו מחלב חטה ומצור דבש אשביעך: