א. למנצח על־[כ= ידיתון] [ק= ידותון] לאסף מזמור׃
ב. קולי אל־אלהים ואצעקה קולי אל־אלהים והאזין אלי׃
ג. ביום צרתי אדני דרשתי ידי לילה נגרה ולא תפוג מאנה הנחם נפשי׃
ד. אזכרה אלהים ואהמיה אשיחה ותתעטף רוחי סלה׃
ה. אחזת שמרות עיני נפעמתי ולא אדבר׃
ו. חשבתי ימים מקדם שנות עולמים׃
ז. אזכרה נגינתי בלילה עם־לבבי אשיחה ויחפש רוחי׃
ח. הלעולמים יזנח אדני ולא־יסיף לרצות עוד׃
ט. האפס לנצח חסדו גמר אמר לדר ודר׃
י. השכח חנות אל אם־קפץ באף רחמיו סלה׃
יא. ואמר חלותי היא שנות ימין עליון׃
יב. [כ= אזכיר] [ק= אזכור] מעללי־יה כי־אזכרה מקדם פלאך׃
יג. והגיתי בכל־פעלך ובעלילותיך אשיחה׃
יד. אלהים בקדש דרךך מי־אל גדול כאלהים׃
טו. אתה האל עשה פלא הודעת בעמים עזך׃
טז. גאלת בזרוע עמך בני־יעקב ויוסף סלה׃
יז. ראוך מים אלהים ראוך מים יחילו אף ירגזו תהמות׃
יח. זרמו מים עבות קול נתנו שחקים אף־חצציך יתהלכו׃
יט. קול רעמכ* בגלגל האירו ברקים תבל רגזה ותרעש הארץ׃
כ. בים דרךך [כ= ושביליך] [ק= ושבילך] במים רבים ועקבותיך לא נדעו׃
כא. נחית כצאן עמך ביד־משה ואהרן׃