א. א וידבר דוד ליהוה את דברי השירה הזאת {ס} ביום הציל יהוה אתו {ר} מכף כל איביו ומכף שאול {ס}
ב. ב ויאמר יהוה סלעי ומצדתי {ר} ומפלטי לי
ג. ג אלהי צורי אחסה בו {ס} מגני וקרן ישעי {ר} משגבי ומנוסי {ס} משעי מחמס תשעני {ר}
ד. ד מהלל אקרא יהוה {ס} ומאיבי אושע {ר}
ה. ה כי אפפני משברי מות {ס} נחלי בליעל יבעתני {ר}
ו. ו חבלי שאול סבני {ס} קדמני מקשי מות {ר}
ז. ז בצר לי אקרא יהוה ואל אלהי אקרא {ס} וישמע מהיכלו קולי ושועתי באזניו {ר}
ח. ח ותגעש (ויתגעש) ותרעש הארץ {ס} מוסדות השמים ירגזו ויתגעשו כי חרה לו {ר}
ט. ט עלה עשן באפו ואש מפיו תאכל {ס} גחלים בערו ממנו {ר}
י. י ויט שמים וירד {ס} וערפל תחת רגליו {ר}
יא. יא וירכב על כרוב ויעף {ס} וירא על כנפי רוח {ר}
יב. יב וישת חשך סביבתיו סכות {ס} חשרת מים עבי שחקים {ר}
יג. יג מנגה נגדו בערו גחלי אש {ס}
יד. יד ירעם מן שמים יהוה {ר} ועליון יתן קולו {ס}
טו. טו וישלח חצים ויפיצם ברק ויהמם (ויהם) {ר}
טז. טז ויראו אפקי ים יגלו מסדות תבל {ס} בגערת יהוה מנשמת רוח אפו {ר}
יז. יז ישלח ממרום יקחני {ס} ימשני ממים רבים {ר}
יח. יח יצילני מאיבי עז {ס} משנאי כי אמצו ממני {ר}
יט. יט יקדמני ביום אידי ויהי יהוה משען לי {ס}
כ. כ ויצא למרחב אתי {ר} יחלצני כי חפץ בי {ס}
כא. כא יגמלני יהוה כצדקתי {ר} כבר ידי ישיב לי {ס}
כב. כב כי שמרתי דרכי יהוה {ר} ולא רשעתי מאלהי {ס}
כג. כג כי כל משפטו לנגדי וחקתיו לא אסור ממנה {ר}
כד. כד ואהיה תמים לו {ס} ואשתמרה מעוני {ר}
כה. כה וישב יהוה לי כצדקתי {ס} כברי לנגד עיניו {ר}
כו. כו עם חסיד תתחסד {ס} עם גבור תמים תתמם {ר}
כז. כז עם נבר תתבר {ס} ועם עקש תתפל {ר}
כח. כח ואת עם עני תושיע {ס} ועיניך על רמים תשפיל {ר}
כט. כט כי אתה נירי יהוה {ס} ויהוה יגיה חשכי {ר}
ל. ל כי בכה ארוץ גדוד {ס} באלהי אדלג שור {ר}
לא. לא האל תמים דרכו אמרת יהוה צרופה-- {ס} מגן הוא לכל החסים בו {ר}
לב. לב כי מי אל מבלעדי יהוה {ס} ומי צור מבלעדי אלהינו {ר}
לג. לג האל מעוזי חיל {ס} ויתר תמים דרכו (דרכי) {ר}
לד. לד משוה רגליו (רגלי) כאילות {ס} ועל במתי יעמדני {ר}
לה. לה מלמד ידי למלחמה {ס} ונחת קשת נחושה זרעתי {ר}
לו. לו ותתן לי מגן ישעך וענתך תרבני {ס}
לז. לז תרחיב צעדי תחתני ולא מעדו קרסלי {ר}
לח. לח ארדפה איבי ואשמידם {ס} ולא אשוב עד כלותם {ר}
לט. לט ואכלם ואמחצם ולא יקומון {ס} ויפלו תחת רגלי {ר}
מ. מ ותזרני חיל למלחמה {ס} תכריע קמי תחתני {ר}
מא. מא ואיבי תתה לי ערף משנאי ואצמיתם {ס}
מב. מב ישעו ואין משיע אל יהוה ולא ענם {ר}
מג. מג ואשחקם כעפר ארץ {ס} כטיט חוצות אדקם ארקעם {ר}
מד. מד ותפלטני מריבי עמי תשמרני לראש גוים {ס} עם לא ידעתי יעבדני {ר}
מה. מה בני נכר יתכחשו לי לשמוע אזן ישמעו לי {ס}
מו. מו בני נכר יבלו ויחגרו ממסגרותם {ר}
מז. מז חי יהוה וברוך צורי {ס} וירם אלהי צור ישעי {ר}
מח. מח האל הנתן נקמת לי {ס} ומריד עמים תחתני {ר}
מט. מט ומוציאי מאיבי ומקמי תרוממני {ס} מאיש חמסים תצילני {ר}
נ. נ על כן אודך יהוה בגוים {ס} ולשמך אזמר {ר}
נא. נא מגדיל (מגדול) ישועות מלכו ועשה חסד למשיחו {ס} לדוד ולזרעו עד עולם {ר} {ש}