א. א כי יהיה ריב בין אנשים ונגשו אל המשפט ושפטום והצדיקו את הצדיק והרשיעו את הרשע
ב. ב והיה אם בן הכות הרשע--והפילו השפט והכהו לפניו כדי רשעתו במספר
ג. ג ארבעים יכנו לא יסיף פן יסיף להכתו על אלה מכה רבה ונקלה אחיך לעיניך
ד. ד לא תחסם שור בדישו {ס}
ה. ה כי ישבו אחים יחדו ומת אחד מהם ובן אין לו--לא תהיה אשת המת החוצה לאיש זר יבמה יבא עליה ולקחה לו לאשה ויבמה
ו. ו והיה הבכור אשר תלד--יקום על שם אחיו המת ולא ימחה שמו מישראל
ז. ז ואם לא יחפץ האיש לקחת את יבמתו ועלתה יבמתו השערה אל הזקנים ואמרה מאן יבמי להקים לאחיו שם בישראל--לא אבה יבמי
ח. ח וקראו לו זקני עירו ודברו אליו ועמד ואמר לא חפצתי לקחתה
ט. ט ונגשה יבמתו אליו לעיני הזקנים וחלצה נעלו מעל רגלו וירקה בפניו וענתה ואמרה ככה יעשה לאיש אשר לא יבנה את בית אחיו
י. י ונקרא שמו בישראל בית חלוץ הנעל {ס}
יא. יא כי ינצו אנשים יחדו איש ואחיו וקרבה אשת האחד להציל את אישה מיד מכהו ושלחה ידה והחזיקה במבשיו
יב. יב וקצתה את כפה לא תחוס עינך {ס}
יג. יג לא יהיה לך בכיסך אבן ואבן גדולה וקטנה
יד. יד לא יהיה לך בביתך איפה ואיפה גדולה וקטנה
טו. טו אבן שלמה וצדק יהיה לך איפה שלמה וצדק יהיה לך--למען יאריכו ימיך על האדמה אשר יהוה אלהיך נתן לך
טז. טז כי תועבת יהוה אלהיך כל עשה אלה כל עשה עול {פ}
יז. יז זכור את אשר עשה לך עמלק בדרך בצאתכם ממצרים
יח. יח אשר קרך בדרך ויזנב בך כל הנחשלים אחריך--ואתה עיף ויגע ולא ירא אלהים
יט. יט והיה בהניח יהוה אלהיך לך מכל איביך מסביב בארץ אשר יהוה אלהיך נתן לך נחלה לרשתה--תמחה את זכר עמלק מתחת השמים לא תשכח {פ}