א. א ויהי דבר יהוה אלי לאמר
ב. ב בן אדם מה יהיה עץ הגפן מכל עץ--הזמורה אשר היה בעצי היער
ג. ג היקח ממנו עץ לעשות למלאכה אם יקחו ממנו יתד לתלות עליו כל כלי
ד. ד הנה לאש נתן לאכלה את שני קצותיו אכלה האש ותוכו נחר--היצלח למלאכה
ה. ה הנה בהיותו תמים לא יעשה למלאכה אף כי אש אכלתהו ויחר ונעשה עוד למלאכה {ס}
ו. ו לכן כה אמר אדני יהוה כאשר עץ הגפן בעץ היער אשר נתתיו לאש לאכלה--כן נתתי את ישבי ירושלם
ז. ז ונתתי את פני בהם--מהאש יצאו והאש תאכלם וידעתם כי אני יהוה בשומי את פני בהם
ח. ח ונתתי את הארץ שממה--יען מעלו מעל נאם אדני יהוה {פ}