א. א לכו ונשובה אל יהוה כי הוא טרף וירפאנו יך ויחבשנו
ב. ב יחינו מימים ביום השלישי יקמנו ונחיה לפניו
ג. ג ונדעה נרדפה לדעת את יהוה כשחר נכון מצאו ויבוא כגשם לנו כמלקוש יורה ארץ
ד. ד מה אעשה לך אפרים מה אעשה לך יהודה וחסדכם כענן בקר וכטל משכים הלך
ה. ה על כן חצבתי בנביאים--הרגתים באמרי פי ומשפטיך אור יצא
ו. ו כי חסד חפצתי ולא זבח ודעת אלהים מעלות
ז. ז והמה כאדם עברו ברית שם בגדו בי
ח. ח גלעד קרית פעלי און--עקבה מדם
ט. ט וכחכי איש גדודים חבר כהנים דרך ירצחו שכמה כי זמה עשו
י. י בבית ישראל ראיתי שעריריה (שערוריה) שם זנות לאפרים נטמא ישראל
יא. יא גם יהודה שת קציר לך בשובי שבות עמי {פ}