א. א ביום ההוא יפקד יהוה בחרבו הקשה והגדולה והחזקה על לויתן נחש ברח ועל לויתן נחש עקלתון והרג את התנין אשר בים {ס}
ב. ב ביום ההוא כרם חמר ענו לה
ג. ג אני יהוה נצרה לרגעים אשקנה פן יפקד עליה לילה ויום אצרנה
ד. ד חמה אין לי מי יתנני שמיר שית במלחמה--אפשעה בה אציתנה יחד
ה. ה או יחזק במעוזי יעשה שלום לי שלום יעשה לי
ו. ו הבאים ישרש יעקב יציץ ופרח ישראל ומלאו פני תבל תנובה {פ}
ז. ז הכמכת מכהו הכהו אם כהרג הרגיו הרג
ח. ח בסאסאה בשלחה תריבנה הגה ברוחו הקשה ביום קדים
ט. ט לכן בזאת יכפר עון יעקב וזה כל פרי הסר חטאתו בשומו כל אבני מזבח כאבני גר מנפצות לא יקמו אשרים וחמנים
י. י כי עיר בצורה בדד נוה משלח ונעזב כמדבר שם ירעה עגל ושם ירבץ וכלה סעפיה
יא. יא ביבש קצירה תשברנה נשים באות מאירות אותה כי לא עם בינות הוא--על כן לא ירחמנו עשהו ויצרו לא יחננו {פ}
יב. יב והיה ביום ההוא יחבט יהוה משבלת הנהר עד נחל מצרים ואתם תלקטו לאחד אחד בני ישראל {פ}
יג. יג והיה ביום ההוא יתקע בשופר גדול ובאו האבדים בארץ אשור והנדחים בארץ מצרים והשתחוו ליהוה בהר הקדש בירושלם {פ}