א. א כקדח אש המסים מים תבעה אש להודיע שמך לצריך מפניך גוים ירגזו
ב. ב בעשותך נוראות לא נקוה ירדת מפניך הרים נזלו {ס}
ג. ג ומעולם לא שמעו לא האזינו עין לא ראתה אלהים זולתך--יעשה למחכה לו
ד. ד פגעת את שש ועשה צדק בדרכיך יזכרוך הן אתה קצפת ונחטא בהם עולם ונושע
ה. ה ונהי כטמא כלנו וכבגד עדים כל צדקתינו ונבל כעלה כלנו ועוננו כרוח ישאנו
ו. ו ואין קורא בשמך מתעורר להחזיק בך כי הסתרת פניך ממנו ותמוגנו ביד עוננו
ז. ז ועתה יהוה אבינו אתה אנחנו החמר ואתה יצרנו ומעשה ידך כלנו
ח. ח אל תקצף יהוה עד מאד ואל לעד תזכר עון הן הבט נא עמך כלנו
ט. ט ערי קדשך היו מדבר ציון מדבר היתה ירושלם שממה
י. י בית קדשנו ותפארתנו אשר הללוך אבתינו--היה לשרפת אש וכל מחמדינו היה לחרבה
יא. יא העל אלה תתאפק יהוה תחשה ותעננו עד מאד {פ}