א. א נקטה נפשי בחיי אעזבה עלי שיחי אדברה במר נפשי
ב. ב אמר אל-אלוה אל-תרשיעני הודיעני על מה-תריבני
ג. ג הטוב לך כי תעשק--כי-תמאס יגיע כפיך ועל-עצת רשעים הופעת
ד. ד העיני בשר לך אם-כראות אנוש תראה
ה. ה הכימי אנוש ימיך אם-שנותיך כימי גבר
ו. ו כי-תבקש לעוני ולחטאתי תדרוש
ז. ז על-דעתך כי-לא ארשע ואין מידך מציל
ח. ח ידיך עצבוני ויעשוני יחד סביב ותבלעני
ט. ט זכר-נא כי-כחמר עשיתני ואל-עפר תשיבני
י. י הלא כחלב תתיכני וכגבנה תקפיאני
יא. יא עור ובשר תלבישני ובעצמות וגידים תשככני
יב. יב חיים וחסד עשית עמדי ופקדתך שמרה רוחי
יג. יג ואלה צפנת בלבבך ידעתי כי-זאת עמך
יד. יד אם-חטאתי ושמרתני ומעוני לא תנקני
טו. טו אם רשעתי אללי לי-- וצדקתי לא-אשא ראשי שבע קלון וראה עניי
טז. טז ויגאה כשחל תצודני ותשב תתפלא-בי
יז. יז תחדש עדיך נגדי ותרב כעשך עמדי חליפות וצבא עמי
יח. יח ולמה מרחם הצאתני אגוע ועין לא-תראני
יט. יט כאשר לא-הייתי אהיה מבטן לקבר אובל
כ. כ הלא-מעט ימי יחדל (וחדל) ישית (ושית) ממני ואבליגה מעט
כא. כא בטרם אלך ולא אשוב-- אל-ארץ חשך וצלמות
כב. כב ארץ עפתה כמו אפל--צלמות ולא סדרים ותפע כמו-אפל