א. א ויען צפר הנעמתי ויאמר
ב. ב הרב דברים לא יענה ואם-איש שפתים יצדק
ג. ג בדיך מתים יחרישו ותלעג ואין מכלם
ד. ד ותאמר זך לקחי ובר הייתי בעיניך
ה. ה ואולם--מי יתן אלוה דבר ויפתח שפתיו עמך
ו. ו ויגד-לך תעלמות חכמה-- כי-כפלים לתושיה ודע-- כי-ישה לך אלוה מעונך
ז. ז החקר אלוה תמצא אם עד-תכלית שדי תמצא
ח. ח גבהי שמים מה-תפעל עמקה משאול מה-תדע
ט. ט ארכה מארץ מדה ורחבה מני-ים
י. י אם-יחלף ויסגיר ויקהיל ומי ישיבנו
יא. יא כי-הוא ידע מתי-שוא וירא-און ולא יתבונן
יב. יב ואיש נבוב ילבב ועיר פרא אדם יולד
יג. יג אם-אתה הכינות לבך ופרשת אליו כפיך
יד. יד אם-און בידך הרחיקהו ואל-תשכן באהליך עולה
טו. טו כי-אז תשא פניך ממום והיית מצק ולא תירא
טז. טז כי-אתה עמל תשכח כמים עברו תזכר
יז. יז ומצהרים יקום חלד תעפה כבקר תהיה
יח. יח ובטחת כי-יש תקוה וחפרת לבטח תשכב
יט. יט ורבצת ואין מחריד וחלו פניך רבים
כ. כ ועיני רשעים תכלינה ומנוס אבד מנהם ותקותם מפח-נפש