א. א אדם ילוד אשה-- קצר ימים ושבע-רגז
ב. ב כציץ יצא וימל ויברח כצל ולא יעמוד
ג. ג אף-על-זה פקחת עינך ואתי תביא במשפט עמך
ד. ד מי-יתן טהור מטמא-- לא אחד
ה. ה אם חרוצים ימיו--מספר-חדשיו אתך חקו עשית ולא יעבר
ו. ו שעה מעליו ויחדל-- עד-ירצה כשכיר יומו
ז. ז כי יש לעץ תקוה אם-יכרת ועוד יחליף וינקתו לא תחדל
ח. ח אם-יזקין בארץ שרשו ובעפר ימות גזעו
ט. ט מריח מים יפרח ועשה קציר כמו-נטע
י. י וגבר ימות ויחלש ויגוע אדם ואיו
יא. יא אזלו-מים מני-ים ונהר יחרב ויבש
יב. יב ואיש שכב ולא-יקום עד-בלתי שמים לא יקיצו ולא-יערו משנתם
יג. יג מי יתן בשאול תצפנני-- תסתירני עד-שוב אפך תשית לי חק ותזכרני
יד. יד אם-ימות גבר היחיה כל-ימי צבאי איחל-- עד-בוא חליפתי
טו. טו תקרא ואנכי אענך למעשה ידיך תכסף
טז. טז כי-עתה צעדי תספור לא-תשמר על-חטאתי
יז. יז חתם בצרור פשעי ותטפל על-עוני
יח. יח ואולם הר-נופל יבול וצור יעתק ממקמו
יט. יט אבנים שחקו מים-- תשטף-ספיחיה עפר-ארץ ותקות אנוש האבדת
כ. כ תתקפהו לנצח ויהלך משנה פניו ותשלחהו
כא. כא יכבדו בניו ולא ידע ויצערו ולא-יבין למו
כב. כב אך-בשרו עליו יכאב ונפשו עליו תאבל