ב. ב שמעתי כאלה רבות מנחמי עמל כלכם
ג. ג הקץ לדברי-רוח או מה-ימריצך כי תענה
ד. ד גם אנכי-- ככם אדברה לו יש נפשכם תחת נפשי-- אחבירה עליכם במלים ואניעה עליכם במו ראשי
ה. ה אאמצכם במו-פי וניד שפתי יחשך
ו. ו אם-אדברה לא-יחשך כאבי ואחדלה מה-מני יהלך
ז. ז אך-עתה הלאני השמות כל-עדתי
ח. ח ותקמטני לעד היה ויקם בי כחשי בפני יענה
ט. ט אפו טרף וישטמני--חרק עלי בשניו צרי ילטש עיניו לי
י. י פערו עלי בפיהם--בחרפה הכו לחיי יחד עלי יתמלאון
יא. יא יסגירני אל אל עויל ועל-ידי רשעים ירטני
יב. יב שלו הייתי ויפרפרני-- ואחז בערפי ויפצפצני ויקימני לו למטרה
יג. יג יסבו עלי רביו-- יפלח כליותי ולא יחמל ישפך לארץ מררתי
יד. יד יפרצני פרץ על-פני-פרץ ירץ עלי כגבור
טו. טו שק תפרתי עלי גלדי ועללתי בעפר קרני
טז. טז פני חמרמרה (חמרמרו) מני-בכי ועל עפעפי צלמות
יז. יז על לא-חמס בכפי ותפלתי זכה
יח. יח ארץ אל-תכסי דמי ואל-יהי מקום לזעקתי
יט. יט גם-עתה הנה-בשמים עדי ושהדי במרמים
כ. כ מליצי רעי אל-אלוה דלפה עיני
כא. כא ויוכח לגבר עם-אלוה ובן-אדם לרעהו
כב. כב כי-שנות מספר יאתיו וארח לא-אשוב אהלך