א. א רוחי חבלה ימי נזעכו קברים לי
ב. ב אם-לא התלים עמדי ובהמרותם תלן עיני
ג. ג שימה-נא ערבני עמך מי הוא לידי יתקע
ד. ד כי-לבם צפנת משכל על-כן לא תרמם
ה. ה לחלק יגיד רעים ועיני בניו תכלנה
ו. ו והציגני למשל עמים ותפת לפנים אהיה
ז. ז ותכה מכעש עיני ויצרי כצל כלם
ח. ח ישמו ישרים על-זאת ונקי על-חנף יתערר
ט. ט ויאחז צדיק דרכו וטהר-ידים יסיף אמץ
י. י ואולם--כלם תשבו ובאו נא ולא-אמצא בכם חכם
יא. יא ימי עברו זמתי נתקו-- מורשי לבבי
יב. יב לילה ליום ישימו אור קרוב מפני-חשך
יג. יג אם-אקוה שאול ביתי בחשך רפדתי יצועי
יד. יד לשחת קראתי אבי אתה אמי ואחתי לרמה
טו. טו ואיה אפו תקותי ותקותי מי ישורנה
טז. טז בדי שאל תרדנה אם-יחד על-עפר נחת