א. א ויען בלדד השחי ויאמר
ב. ב עד-אנה תשימון קנצי למלין תבינו ואחר נדבר
ג. ג מדוע נחשבנו כבהמה נטמינו בעיניכם
ד. ד טרף נפשו באפו הלמענך תעזב ארץ ויעתק-צור ממקמו
ה. ה גם אור רשעים ידעך ולא-יגה שביב אשו
ו. ו אור חשך באהלו ונרו עליו ידעך
ז. ז יצרו צעדי אונו ותשליכהו עצתו
ח. ח כי-שלח ברשת ברגליו ועל-שבכה יתהלך
ט. ט יאחז בעקב פח יחזק עליו צמים
י. י טמון בארץ חבלו ומלכדתו עלי נתיב
יא. יא סביב בעתהו בלהות והפיצהו לרגליו
יב. יב יהי-רעב אנו ואיד נכון לצלעו
יג. יג יאכל בדי עורו יאכל בדיו בכור מות
יד. יד ינתק מאהלו מבטחו ותצעדהו למלך בלהות
טו. טו תשכון באהלו מבלי-לו יזרה על-נוהו גפרית
טז. טז מתחת שרשיו יבשו וממעל ימל קצירו
יז. יז זכרו-אבד מני-ארץ ולא-שם לו על-פני-חוץ
יח. יח יהדפהו מאור אל-חשך ומתבל ינדהו
יט. יט לא נין לו ולא-נכד בעמו ואין שריד במגוריו
כ. כ על-יומו נשמו אחרנים וקדמנים אחזו שער
כא. כא אך-אלה משכנות עול וזה מקום לא-ידע-אל