א. א ויען אליפז התמני ויאמר
ב. ב הלאל יסכן-גבר-- כי-יסכן עלימו משכיל
ג. ג החפץ לשדי כי תצדק ואם-בצע כי-תתם דרכיך
ד. ד המיראתך יכיחך יבוא עמך במשפט
ה. ה הלא רעתך רבה ואין-קץ לעונתיך
ו. ו כי-תחבל אחיך חנם ובגדי ערומים תפשיט
ז. ז לא-מים עיף תשקה ומרעב תמנע-לחם
ח. ח ואיש זרוע לו הארץ ונשוא פנים ישב בה
ט. ט אלמנות שלחת ריקם וזרעות יתמים ידכא
י. י על-כן סביבותיך פחים ויבהלך פחד פתאם
יא. יא או-חשך לא-תראה ושפעת-מים תכסך
יב. יב הלא-אלוה גבה שמים וראה ראש כוכבים כי-רמו
יג. יג ואמרת מה-ידע אל הבעד ערפל ישפוט
יד. יד עבים סתר-לו ולא יראה וחוג שמים יתהלך
טו. טו הארח עולם תשמור-- אשר דרכו מתי-און
טז. טז אשר-קמטו ולא-עת נהר יוצק יסודם
יז. יז האמרים לאל סור ממנו ומה-יפעל שדי למו
יח. יח והוא מלא בתיהם טוב ועצת רשעים רחקה מני
יט. יט יראו צדיקים וישמחו ונקי ילעג-למו
כ. כ אם-לא נכחד קימנו ויתרם אכלה אש
כא. כא הסכן-נא עמו ושלם בהם תבואתך טובה
כב. כב קח-נא מפיו תורה ושים אמריו בלבבך
כג. כג אם-תשוב עד-שדי תבנה תרחיק עולה מאהלך
כד. כד ושית-על-עפר בצר ובצור נחלים אופיר
כה. כה והיה שדי בצריך וכסף תועפות לך
כו. כו כי-אז על-שדי תתענג ותשא אל-אלוה פניך
כז. כז תעתיר אליו וישמעך ונדריך תשלם
כח. כח ותגזר-אמר ויקם לך ועל-דרכיך נגה אור
כט. כט כי-השפילו ותאמר גוה ושח עינים יושע
ל. ל ימלט אי-נקי ונמלט בבר כפיך