ב. ב מה-עזרת ללא-כח הושעת זרוע לא-עז
ג. ג מה-יעצת ללא חכמה ותשיה לרב הודעת
ד. ד את-מי הגדת מלין ונשמת-מי יצאה ממך
ה. ה הרפאים יחוללו-- מתחת מים ושכניהם
ו. ו ערום שאול נגדו ואין כסות לאבדון
ז. ז נטה צפון על-תהו תלה ארץ על-בלימה
ח. ח צרר-מים בעביו ולא-נבקע ענן תחתם
ט. ט מאחז פני-כסה פרשז עליו עננו
י. י חק-חג על-פני-מים-- עד-תכלית אור עם-חשך
יא. יא עמודי שמים ירופפו ויתמהו מגערתו
יב. יב בכחו רגע הים ובתובנתו (ובתבונתו) מחץ רהב
יג. יג ברוחו שמים שפרה חללה ידו נחש ברח
יד. יד הן-אלה קצות דרכו-- ומה-שמץ דבר נשמע-בו ורעם גבורתו מי יתבונן