א. א ברית כרתי לעיני ומה אתבונן על-בתולה
ב. ב ומה חלק אלוה ממעל ונחלת שדי ממרמים
ג. ג הלא-איד לעול ונכר לפעלי און
ד. ד הלא-הוא יראה דרכי וכל-צעדי יספור
ה. ה אם-הלכתי עם-שוא ותחש על-מרמה רגלי
ו. ו ישקלני במאזני-צדק וידע אלוה תמתי
ז. ז אם תטה אשרי מני הדרך ואחר עיני הלך לבי ובכפי דבק מאום
ח. ח אזרעה ואחר יאכל וצאצאי ישרשו
ט. ט אם-נפתה לבי על-אשה ועל-פתח רעי ארבתי
י. י תטחן לאחר אשתי ועליה יכרעון אחרין
יא. יא כי-הוא (היא) זמה והיא (והוא) עון פלילים
יב. יב כי אש היא עד-אבדון תאכל ובכל-תבואתי תשרש
יג. יג אם-אמאס--משפט עבדי ואמתי ברבם עמדי
יד. יד ומה אעשה כי-יקום אל וכי-יפקד מה אשיבנו
טו. טו הלא-בבטן עשני עשהו ויכננו ברחם אחד
טז. טז אם-אמנע מחפץ דלים ועיני אלמנה אכלה
יז. יז ואכל פתי לבדי ולא-אכל יתום ממנה
יח. יח כי מנעורי גדלני כאב ומבטן אמי אנחנה
יט. יט אם-אראה אובד מבלי לבוש ואין כסות לאביון
כ. כ אם-לא ברכוני חלצו ומגז כבשי יתחמם
כא. כא אם-הניפותי על-יתום ידי כי-אראה בשער עזרתי
כב. כב כתפי משכמה תפול ואזרעי מקנה תשבר
כג. כג כי פחד אלי איד אל ומשאתו לא אוכל
כד. כד אם-שמתי זהב כסלי ולכתם אמרתי מבטחי
כה. כה אם-אשמח כי-רב חילי וכי-כביר מצאה ידי
כו. כו אם-אראה אור כי יהל וירח יקר הלך
כז. כז ויפת בסתר לבי ותשק ידי לפי
כח. כח גם-הוא עון פלילי כי-כחשתי לאל ממעל
כט. כט אם-אשמח בפיד משנאי והתעררתי כי-מצאו רע
ל. ל ולא-נתתי לחטא חכי-- לשאל באלה נפשו
לא. לא אם-לא אמרו מתי אהלי מי-יתן מבשרו לא נשבע
לב. לב בחוץ לא-ילין גר דלתי לארח אפתח
לג. לג אם-כסיתי כאדם פשעי-- לטמון בחבי עוני
לד. לד כי אערוץ המון רבה-- ובוז-משפחות יחתני ואדם לא-אצא פתח
לה. לה מי יתן-לי שמע לי-- הן-תוי שדי יענני וספר כתב איש ריבי
לו. לו אם-לא על-שכמי אשאנו אענדנו עטרות לי
לז. לז מספר צעדי אגידנו כמו-נגיד אקרבנו
לח. לח אם-עלי אדמתי תזעק ויחד תלמיה יבכיון
לט. לט אם-כחה אכלתי בלי-כסף ונפש בעליה הפחתי
מ. מ תחת חטה יצא חוח--ותחת-שערה באשה תמו דברי איוב