ב. ב הזאת חשבת למשפט אמרת צדקי מאל
ג. ג כי-תאמר מה-יסכן-לך מה-אעיל מחטאתי
ד. ד אני אשיבך מלין-- ואת-רעיך עמך
ה. ה הבט שמים וראה ושור שחקים גבהו ממך
ו. ו אם-חטאת מה-תפעל-בו ורבו פשעיך מה-תעשה-לו
ז. ז אם-צדקת מה-תתן-לו או מה-מידך יקח
ח. ח לאיש-כמוך רשעך ולבן-אדם צדקתך
ט. ט מרב עשוקים יזעיקו ישועו מזרוע רבים
י. י ולא-אמר--איה אלוה עשי נתן זמרות בלילה
יא. יא מלפנו מבהמות ארץ ומעוף השמים יחכמנו
יב. יב שם יצעקו ולא יענה-- מפני גאון רעים
יג. יג אך-שוא לא-ישמע אל ושדי לא ישורנה
יד. יד אף כי-תאמר לא תשורנו דין לפניו ותחולל לו
טו. טו ועתה--כי-אין פקד אפו ולא-ידע בפש מאד
טז. טז ואיוב הבל יפצה-פיהו בבלי-דעת מלין יכבר